Gyima ne 15:1-41

  • Mrenyia zo ɛpɛlɛ nwo kpolerazulɛ wɔ Anteɔko (1, 2)

  • Bɛvale edwɛkɛ ne bɛhɔle Gyɛlusalɛm (3-5)

  • Mgbanyima nee ɛzoanvolɛma yia (6-21)

  • Neazo eku ne kɛlata (22-29)

    • Bɛhwe bɛ nwo bɛvi mogya nwo (28, 29)

  • Kɛlata maanle asafo ne mɔ anwosesebɛ (30-35)

  • Pɔɔlo nee Baanabase avinli tetele (36-41)

15  Menli bie vi Dwudiya rale na bɛbɔle ɔ bo bɛhilehilele mediema ne mɔ kɛ: “Saa bɛampɛ bɛ mrenyia zo kɛ mɔɔ Mosisi mɛla ne kile la a, bɛnrɛnyia ngoane.”  Na mɔɔ akɛsakɛsa nee kpolerazulɛ ekyi hɔle zo wɔ bɛ nee Pɔɔlo nee Baanabase avinli la, bɛyɛle ngyehyɛleɛ kɛ Pɔɔlo nee Baanabase yɛɛ bɛ nuhua bie mɔ ɛhɔnwu ɛzoanvolɛma ne nee mgbanyima ne mɔ mɔɔ wɔ Gyɛlusalɛm la wɔ edwɛkɛ* ɛhye anwo.  Yemɔti mekɛ mɔɔ asafo ne hɔzɔhonle bɛ dwule adenle nu la, mrenyia ɛhye mɔ doale zo hɔvale Fonehyea nee Samɛlea, bɛhanle kɛzi maanle maanle ne anu amra ɛhakyi na bɛlɛsonle Nyamenle la bɛhilele bɛ, na mediema ne mɔ amuala anye liele.  Mɔɔ bɛdwule Gyɛlusalɛm la, asafo ne nee ɛzoanvolɛma ne nee mgbanyima ne mɔ liele bɛ kɛnlɛma, na bɛhanle ninyɛne dɔɔnwo mɔɔ Nyamenle luale bɛ nwo zo yɛle la bɛhilele bɛ.  Noko bɛdabɛ mɔɔ ɛnee bɛboka Falasiima eku ne anwo na bɛrayɛ diedima la vi bɛ mbia ne mɔ azo dwazole na bɛhanle kɛ: “Ɔhyia kɛ bɛpɛ bɛ mrenyia zo na bɛmaa bɛdi Mosisi Mɛla ne azo.”  Yemɔti ɛzoanvolɛma ne nee mgbanyima ne mɔ yiale nu kɛ bɛsuzu edwɛkɛ ɛhye anwo.  Mɔɔ bɛvale mekɛ tendenle bɛzuzule edwɛkɛ ne anwo kpalɛ la, Pita dwazole na ɔzele bɛ kɛ: “Ayi mɔ, mediema, bɛze ye wienyi kɛ mɔlebɛbo ne ala yɛɛ Nyamenle kpale me wɔ bɛ avinli kɛ maanle maanle ne anu amra ɛlua me nloa anu edwɛkɛ zo ɛde edwɛkpa ne na bɛlie bɛli a.  Na Nyamenle mɔɔ ze ahonle nu la vale sunsum nwuanzanwuanza ne maanle bɛ ɔvale ɔlile daselɛ, kɛ mɔɔ ɔyɛle ɔmaanle yɛdayɛ noko la.  Na yeammaa ngakyile biala amba yɛmɛ nee bɛmɛ avinli, emomu bɛ diedi ne ati ɔdele bɛ ahonle nu. 10  Yemɔti duzu ati a bɛlɛfa adesoa ɛnlomboɛ mɔɔ yɛ nee yɛ nlenyia mɔ yɛangola ye soa la bɛado bɛ nwo zo bɛava bɛaha Nyamenle ɛya ɛ? 11  Noko yɛlɛ diedi kɛ bɛbalua Awulae Gyisɛse ɛlolɛ ne azo bɛalie yɛ ngoane na zɔhane ala a bɛdabɛ noko bɛ ɛdeɛ ne de a.” 12  Akee bɛ muala bɛyɛle koonwu, na bɛdiele Baanabase nee Pɔɔlo bɛmaanle bɛhanle nwanwane ninyɛne nee sɛkɛlɛneɛ dɔɔnwo mɔɔ Nyamenle ɛlua bɛ nwo zo ɛyɛ ye wɔ maanle maanle ne anu la. 13  Mɔɔ bɛdendɛle bɛwiele la, Gyemise buale kɛ: “Ayi mɔ, mediema, bɛdie me. 14  Semɛyɔn ɛhilehile kɛzi Nyamenle limoale hakyile ɔ nye wɔ maanle maanle ne anu na ɔyele menli bie wɔ bɛ avinli ɔmaanle ye duma ne la anu wienyi. 15  Na ɛhye nee edwɛkɛ mɔɔ Ngapezoma ne hanle la le ko, bɛhɛlɛ kɛ: 16  ‘Ɛhye mɔ anzi, mebazia meara na meamaa Devidi ɛdanlɛsua* ne mɔɔ ɛbubu ɛgua la zo; mebayɛ mɔɔ ɛzɛkye la boɛ na meazi ye bieko, 17  amaa menli mɔɔ ɛha la nee maanle maanle ne anu amra, bɛdabɛ mɔɔ bɛfa me duma bɛfɛlɛ bɛ la akpondɛ Gyihova* ɛsesebɛ, kɛ Gyihova* mɔɔ ɛlɛyɛ ninyɛne ɛhye mɔ la se la ɛne, 18  bɛze ninyɛne ɛhye mɔ vi tete.’ 19  Ɔti me adwenle a le kɛ, ɔnle kɛ bɛgyegye bɛdabɛ mɔɔ bɛvi maanle maanle ne anu na bɛhakyi bɛlɛba Nyamenle ɛkɛ ne la, 20  emomu bɛhɛlɛ bɛhɔmaa bɛ kɛ bɛhwe bɛ nwo bɛvi ninyɛne mɔɔ awozonle ɛzonlenlɛ ɛgua nwolɛ evinli, adwɔmane ɛbɛla,* nane mɔɔ bɛlofo ye,* nee mogya nwo. 21  Na ɔvi tete ne Mosisi ɛnyia menli ɛha ɔ nwo edwɛkɛ wɔ azua ngakyile zo ɔluakɛ bɛkenga ɔ nwo edwɛkɛ wɔ nyianu azua nu ɛnwomenlelielɛ kenle biala.” 22  Akee ɛzoanvolɛma ne nee mgbanyima ne mɔ nee asafo ne amuala zile kpɔkɛ kɛ bɛye menli bie wɔ bɛ avinli bɛazoa bɛ bɛamaa bɛ nee Pɔɔlo nee Baanabase ahɔ Anteɔko; bɛzoanle Dwudase mɔɔ bɛfɛlɛ ye Baasabase nee Saelase, mɔɔ bɛle mrenyia titili wɔ mediema ne mɔ avinli la. 23  Bɛhɛlɛle ɛhye na bɛvale bɛzoanle bɛ kɛ: “Bɛ mediema ɛzoanvolɛma ne nee mgbanyima ne mɔ, fa ahɔmaa mediema mɔɔ wɔ Anteɔko, Selea nee Selesea mɔɔ bɛle maanle maanle ne anu amra la: Yɛbiza bɛ! 24  Kɛmɔ yɛde kɛ bie mɔ vi yɛ nu ɛra bagyegye bɛ na bɛlɛbɔ mɔdenle bɛahwe bɛ bɛavi adenle ne anwo wɔ mekɛ mɔɔ yɛanga ye zɔ yɛangile bɛ la ati, 25  yɛyɛ adwenle ko yɛbɔ kpɔkɛ na yɛdu menli kɛ bɛ nee yɛ alɔvolɛ Baanabase nee Pɔɔlo ɛrɛla bɛ nwo lɔ, 26  mrenyia mɔɔ ɛva bɛ ngoane* ɛbɔ afɔle ɛmaa Awulae Gyisɛse Kelaese duma ne la. 27  Yemɔti yɛlɛsoa Dwudase nee Saelase yɛaboka bɛ nwo amaa bɛdabɛ noko bɛava bɛ nloa bɛaha edwɛkɛ ko ne ala. 28  Ɔluakɛ sunsum nwuanzanwuanza ne nee yɛdayɛ mumua ne, yɛngulo kɛ yɛkɛva adesoa biala yɛkɛdo bɛ nwo zo kyesɛ ninyɛne ɛhye mɔ mɔɔ anwo hyia la ala: 29  kɛ bɛhwe bɛ nwo bɛvi ninyɛne mɔɔ bɛva bɛbɔ afɔle bɛmaa awozonle, mogya, nane mɔɔ bɛlofo ye,* nee adwɔmane ɛbɛla* nwo, saa bɛnea bɛ nwo boɛ wɔ ninyɛne ɛhye mɔ anwo a, ɔbawie bɛ boɛ. Bɛnyia kpɔkɛdelɛ kpalɛ!” 30  Yemɔti mɔɔ mrenyia ɛhye mɔ vile ɛkɛ ne la, bɛhɔle Anteɔko na bɛboɔboale ekpunli ne anu amra amuala anloa na bɛvale kɛlata ne bɛmaanle bɛ. 31  Mɔɔ bɛgengale bɛwiele la, bɛlile fɛlɛko kpole wɔ anwosesebɛmaanlɛ ne anwo. 32  Na kɛmɔ Dwudase nee Saelase le ngapezoma la ati, bɛmaanle ɛdendɛlɛ dɔɔnwo bɛvale bɛmaanle mediema ne mɔ anwosesebɛ. 33  Na mɔɔ bɛdɛnlanle ɛkɛ ne mekɛ ekyi la, bɛgyakyile bɛ adenle wɔ anzodwolɛ nu bɛmaanle bɛhɔle mediema mɔɔ zoanle bɛ la anwo lɔ. 34  —— 35  Noko Pɔɔlo nee Baanabase hale Anteɔko, bɛ nee awie mɔ hilehilele na bɛbɔle Gyihova* edwɛkpa ne nolo. 36  Mekɛ bie anzi, Pɔɔlo hanle hilele Baanabase kɛ: “Akee maa* yɛzia yɛhɔkpɔla mediema mɔɔ wɔ azua mɔɔ yɛbɔle Gyihova* edwɛkɛ ne nolo wɔ zo la, na yɛnlea kɛzi bɛ nwo de la.” 37  Ɛnee Baanabase ɛyɛ ye adwenle kɛ ɔfa Dwɔn mɔɔ bɛfɛlɛ ye Maake la yeahɔ. 38  Noko ɛnee Pɔɔlo ɛnlie ɛndo nu kɛ bɛ nee ye kɛhɔ, ɔluakɛ ɔgyakyile bɛ wɔ Pamefelea na ɔ nee bɛ angɔnyɛ gyima ne. 39  Ɛhye vale ɛya nee akɛsakɛsa kpole rale, yemɔti bɛ avinli tetele; na Baanabase vale Maake na bɛvale nyevile zo bɛhɔle Saepelɛse. 40  Pɔɔlo vale Saelase na mɔɔ mediema ne mɔ vale bɛ wulale Gyihova* ɛlolɛ ne abo la, ɔ nee ye hɔle. 41  Ɔhɔvale Selea nee Selesea ɔmaanle asafo ne mɔ anwosesebɛ.

Ɔbodwɛkɛ

Anzɛɛ “kpolerazulɛ.”
Anzɛɛ “kpɔda; sua.”
Nea Edwɛkɛbohilelɛ.
Nea Edwɛkɛbohilelɛ.
Giliki, por·neiʹa. Nea Edwɛkɛbohilelɛ.
Anzɛɛ “bɛandwi ye mogya bɛangua la.”
Anzɛɛ “ɛkɛla.”
Anzɛɛ “bɛandwi ye mogya bɛangua la.”
Giliki, por·neiʹa. Nea Edwɛkɛbohilelɛ.
Nea Edwɛkɛbohilelɛ.
Anzɛɛ ɔkola ɔkile, “yɛbɔ mɔdenle biala.”
Nea Edwɛkɛbohilelɛ.
Nea Edwɛkɛbohilelɛ.