Gyemise 4:1-17

  • Bɛmmayɛ ewiade ne agɔnwo (1-12)

    • Bɛzi Abɔnsam adenle (7)

    • Bɛbikye Nyamenle (8)

  • Anwomemaazo nwo kɔkɔbɔlɛ (13-17)

    • “Saa ɔyɛ Gyihova ɛhulolɛ” a (15)

4  Duzu a twehwe butule nee konle ba bɛ avinli a? Asoo tɛ bɛ nwonane nu atiakunluwɔzo ne mɔ mɔɔ dahuu nee bɛ ko wɔ bɛ nu* la ɔ?  Bɛkulo noko bɛnnyia ye. Bɛyɛ kodiawu na bɛ nye bolo, noko bɛ sa ɛnga ye. Bɛko na bɛdi butule. Bɛ sa ɛnga ye ɔluakɛ bɛmbiza.  Saa bɛbiza a bɛ sa ɛnga ye ɔluakɛ bɛnva adwenle kpalɛ bɛmbiza, bɛbiza kɛ bɛfa bɛali bɛ nwonane nu atiakunluwɔzo ne anzi.  Agyalɛzɛkyelɛma,* bɛnze kɛ ewiade agɔnwolɛvalɛ maa bɛyɛ Nyamenle kpɔvolɛ ɔ? Ɔti, awie biala mɔɔ kulo kɛ ɔyɛ ewiade ne agɔnwo la yɛ ɔ nwo Nyamenle kpɔvolɛ.  Anzɛɛ bɛdwenle kɛ ngɛlɛlera ne ka ye mgbane kɛ: “Sunsum ne mɔɔ wɔ yɛ nu la kɔ zo yɛ anyebolo ɔ”?  Noko ɛlolɛ ne mɔɔ ɔfa ɔmaa la le kpole. Yemɔti ɔse: “Nyamenle si anwomemaazoma adenle, na ɔdo bɛdabɛ mɔɔ bɛbɛlɛ bɛ nwo aze la.”  Ɔti bɛbɛlɛ bɛ nwo aze bɛmaa Nyamenle; bɛzi Abɔnsam adenle, na ɔvi bɛ nwo ɔbanriandi.  Bɛbikye Nyamenle, na ɔbabikye bɛ. Bɛwowo bɛ sa anwo, bɛmɛ ɛtanevolɛma, na bɛde bɛ ahonle nu, bɛmɛ mɔɔ bɛ adwenle le nwiɔ nwiɔ la.  Bɛli nyane nee alɔbɔlɛ na bɛzu. Bɛmaa bɛ ɛzelekɛ ɛhakyi ɛzunlɛ na bɛ fɛlɛkolilɛ ɛyɛ alɔbɔlɛlilɛ. 10  Bɛbɛlɛ bɛ nwo aze wɔ Gyihova* anyunlu, na ɔbamaa bɛ zo. 11  Mediema, bɛmmatendɛ bɛtia bɛ nwo. Awie biala mɔɔ tendɛ tia adiema anzɛɛ bua ɔ diema ndɛne la tendɛ tia mɛla na ɔbua mɛla ndɛne. Na saa ɛbua mɛla ndɛne a ɛnee ɛnli mɛla zo, emomu ɛle ndɛnebuavolɛ. 12  Awie ko ala a le Mɛlamaavolɛ nee Ndɛnebuavolɛ a, ɔdaye a ɔkola ɔdie ngoane na ɔkola ɔsɛkye ye a. Na wɔmɔ, ɛdawɔ a le nwane mɔɔ ɛbua ɛ gɔnwo ndɛne a? 13  Akee bɛdie, bɛmɛ mɔɔ bɛka kɛ: “Ɛnɛ anzɛɛ ɛhyema yɛbahɔ sua ɛhye azo yɛahɔli ɛvolɛ ko wɔ ɛkɛ, na yɛali gua yɛanyia nvasoɛ,” 14  wɔ mekɛ mɔɔ bɛnze mɔɔ bado bɛ ɛhyema la. Ɔluakɛ bɛle kɛ ɛbɔlɛ mɔɔ bɛnwu ye mekɛ ekyi bie na ɔ bo zo minli la. 15  Emomu, ɔwɔ kɛ bɛka kɛ: “Saa ɔyɛ Gyihova* ɛhulolɛ na yɛde ngoane nu a, yɛbayɛ ɛhye anzɛɛ zɛhae.” 16  Noko bɛfa bɛ adubɛnwo ne bɛmemaa bɛ nwo zo. Adubɛnwo zɛhae mɔ amuala le ɛtane. 17  Yemɔti, saa awie ze mɔɔ le kpalɛ la na yeanyɛ a, ɔle ɛtane ɔmaa ye.

Ɔbodwɛkɛ

Giliki aneɛ nu, “bɛ nvɛyeba ne mɔ anu.”
Anzɛɛ “Bɛmɛ mɔɔ bɛnli nɔhalɛ la.”
Nea Edwɛkɛbohilelɛ.
Nea Edwɛkɛbohilelɛ.