Galeehyeama 5:1-26

  • Kilisiene fanwodi (1-15)

  • Sunsum kile yɛ adenle (16-26)

    • Nwonane ne gyima ne mɔ (19-21)

    • Sunsum ne ma (22, 23)

5  Kelaese ɛlie yɛ yemaa yɛnyia fanwodi ɛhye. Yemɔti bɛgyinla kpundii, bɛmmamaa adenle bɛmaa bɛyɛ bɛ ngɛkɛlɛ bieko.  Nea! medame Pɔɔlo, meka meahile bɛ kɛ saa bɛmaa bɛpɛ bɛ mrenyia zo a, Kelaese anwo ɛnlɛ nvasoɛ ɛmmaa bɛ.  Bieko, mekakye awie biala mɔɔ bɛpɛ ye mrenyia zo la kɛ ɔwɔ kɛ ɔdi Mɛla ne amuala azo.  Saa bɛbɔ mɔdenle kɛ bɛfa mɛla bɛabua bɛ nwo benle a, ɛnee bɛhwe bɛ nwo bɛvi Kelaese anwo; na bɛnrɛnyia ye ɛlolɛ ne.  Yɛmɛ, yɛlua sunsum ne azo yɛlɛkendɛ tenleneyɛlɛ ne mɔɔ yɛ nye la zo mɔɔ gyi diedi zo la ɛsesebɛ.  Ɔluakɛ wɔ Kelaese anu, yɛpɛ yɛ mrenyia zo o, yɛtɛpɛle o, ɔngyia, mɔɔ hyia la a le diedi mɔɔ fa ɛlɔlɛ yɛ gyima la.  Ɛnee bɛlɛbɔ mɔdenle* kpalɛ. Nwane a zile bɛ adenle kɛ bɛmmatie nɔhalɛ ne bieko a?  Edwɛkɛ ɛhye ɛnvi Ahenle mɔɔ ɛvɛlɛ bɛ la ɛkɛ.  Mgbɔvonle ekyi maa ɛdɔkɛ ne amuala nyinyia. 10  Medie medi kɛ bɛdabɛ mɔɔ bɛ nee Awulae le ko la ɛnrɛnyia adwenle fofolɛ biala; na ahenle mɔɔ ɛlɛgyegye bɛ la, saa ɔle nwane bɔbɔ a, ɔbanyia ndɛnebualɛ mɔɔ fɛta ye la. 11  Mediema, mame, saa mrenyia zo ɛpɛlɛ nwo edwɛkɛ a metɛka a, ɛnee duzu ati a bɛtɛyɛ me kpɔdekpɔde a? Saa ye zɔhane a, ɛnee bɛye amaneɛnwunlɛ baka* ne anwo azedolɛ bolɛ ne bɛvi ɛkɛ. 12  Me kunlu a anrɛɛ menli mɔɔ ɛlɛbɔ mɔdenle kɛ bɛmaa bɛadɔ aze la kɛza bɛ nwo.* 13  Mediema, bɛvɛlɛ bɛ kɛ bɛranyia fanwodi; noko bɛmmadua fanwodi ɛhye azo bɛdi nwonane nu atiakunluwɔzo nzi, emomu bɛva ɛlɔlɛ bɛzonle bɛ nwo ngoko. 14  Ɔluakɛ bɛbɔ Mɛla ne amuala kpɔkɛ ko kɛ: “Kulo ɛ gɔnwo kɛ ɛ nwo.” 15  Na saa bɛkɔ zo bɛkeka bɛ nwo na bɛmeme bɛ nwo a, ɛnee bɛnlea na bɛanzɛkye bɛ nwo. 16  Mame mese, Bɛhɔ zo bɛmaa sunsum ne ɛhile bɛ adenle na bɛnrɛnyia nwonane nu atiakunluwɔzo fee. 17  Na nwonane nu atiakunluwɔzo ne ko tia sunsum ne yɛɛ sunsum ne ko tia nwonane ne; bɛ mu nwiɔ bɛnga fee, yemɔti ninyɛne mɔɔ bɛkulo kɛ bɛyɛ la bɛngola bɛnyɛ. 18  Bieko, saa sunsum ne kile bɛ adenle a, ɛnee bɛnle mɛla bo. 19  Nwonane ne gyima ne mɔ da ali wienyi, bɛmɛ a le adwɔmane ɛbɛla,* evinli nyɛleɛ, anyiemgba ɛbɛla,* 20  awozonle ɛzonlenlɛ, sunsum ɛtane nyɛleɛ,* ɛkpɔlɛ, konle, nungule, ɛya, manzonle, mgbakyemgbakyenu, ngilehilenu, 21  anyebolo, nzabolɛ, anyelielɛ mgbane mgbane,* nee ninyɛne mɔɔ le kɛ ɛhye mɔ la. Melɛbɔ bɛ kɔkɔ wɔ ninyɛne ɛhye mɔ anwo kɛ mɔɔ menlimoale membɔle bɛ kɔkɔ la, kɛ bɛdabɛ mɔɔ bɛyɛ ninyɛne ɛhye mɔ la ɛnrɛnyia Nyamenle Belemgbunlililɛ ne. 22  Noko sunsum ne ma a le ɛlɔlɛ, anyelielɛ, anzodwolɛ, abotane, atiakunlukɛnlɛma, kpalɛyɛlɛ, diedi, 23  mɛlɛbɛnwoaze, bɛnwozohomolɛ. Mɛla biala ɛntia ɛhye mɔ. 24  Bieko, bɛdabɛ mɔɔ bɛle Kelaese Gyisɛse ɛdeɛ la ɛbɔ nwonane nu atiakunluwɔzo nee ye ɛhulolɛdeɛ ne mɔ baka nu. 25  Saa sunsum ne kile yɛ adenle a, bɛmaa yɛhɔ zo yɛli sunsum ne adehilelɛ nzi pɛpɛɛpɛ. 26  Bɛmmamaa yɛmemaa yɛ nwo zo, yɛ nee yɛ gɔnwo mɔ su, na yɛ nye bolo bɛ.

Ɔbodwɛkɛ

Giliki aneɛ nu, “ɛnee bɛlɛnriandi.”
Nea Edwɛkɛbohilelɛ.
Ɔkile kɛ bɛnrɛfɛta kɛ bɛdi mɛla ne azo.
Giliki, por·neiʹa. Nea Edwɛkɛbohilelɛ.
Giliki, a·selʹgei·a. Nea Edwɛkɛbohilelɛ.
Anzɛɛ “sunsum nu ngitanwolilɛ.”
Anzɛɛ “anyelielɛ molozo.”