Felepaema 2:1-30

  • Kilisiene mɛlɛbɛnwoaze (1-4)

  • Kelaese mɛlɛbɛnwoaze nee ye ɛkpogyalɛ (5-11)

  • Bɛyɛ bɛ ngoanelielɛ nwo gyima (12-18)

    • Bɛda kɛ ahɛnlaneɛ (15)

  • Bɛzoanle Timote nee Ɛpafulodaetɛse (19-30)

2  Yemɔti, saa Kelaese anu anwosesebɛmaanlɛ bie wɔ ɛkɛ a, saa ɛlɔlɛ nu arɛlekyekyelɛ bie wɔ ɛkɛ a, saa sunsum nu agɔnwolɛvalɛ* bie wɔ ɛkɛ a, saa ahunluyelɛyelalɛ nee anwunvɔnezelɛ bie wɔ ɛkɛ a,  bɛnyia adwenle ko na bɛnyia ɛlɔlɛ ko, bɛyɛ ko wɔ debie biala anu, bɛnyia nzuzulɛ ko na bɛmaa me fɛlɛkolilɛ ne ɛli munli.  Bɛmmafa manzonlehwenlɛ anzɛɛ anwomemaazo bɛyɛ debie biala, emomu bɛbɛlɛ bɛ nwo aze* na bɛbu bɛ gɔnwo mɔ bɛdɛla bɛ nwo,  bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.  Bɛnyia adwenle ɛhye mɔɔ ɛnee Kelaese Gyisɛse lɛ la bie,  yemɔ bɔbɔ mɔɔ ɛnee ɔle kɛ Nyamenle la, yeandwenle nwo yeampele kɛ ɔ nee Nyamenle kɛzɛ.  Kyɛkyɛ, emomu ɔgyakyile debie biala mɔɔ ɔlɛ la, ɔyɛle ɔ nwo akɛlɛ na ɔrale kɛ sonla.  Mɔɔ tɛla ɛhye la, mekɛ mɔɔ ɔrale kɛ sonla la, ɔbɛlɛle ɔ nwo aze na ɔyɛle tieyɛ ɔhɔle ewule nu, ɛhɛe, ɔwule amaneɛnwunlɛ baka* zo.  Ɛhye ati, Nyamenle kpogyale ye zo na ɔmaanle ye dibilɛ kpole kpalɛ na ɔlole ye ɔmaanle ye duma mɔɔ tɛla duma biala la, 10  yemɔti ɔwɔ kɛ awie biala koto wɔ Gyisɛse duma nu—bɛdabɛ mɔɔ bɛwɔ anwuma nee azɛlɛ ye azo nee azɛlɛ bo la amuala— 11  na ɔwɔ kɛ awie biala ka ye baguase kɛ Gyisɛse Kelaese le Awulae ɔfa ɔwula Nyamenle Selɛ ne anyunlunyia. 12  Zɔhane ati, me kulovolɛma, kɛ mɔɔ mekɛ biala bɛyɛ tieyɛ, tɛ mekɛ mɔɔ mewɔ bɛ nwo lɔ la angome na kɛkala mɔɔ menle bɛ nwo lɔ bɔbɔ la, bɛhɔ zo bɛva ɛzulolɛ nee anwowozolɛ bɛyɛ bɛ ngoanelielɛ nwo gyima. 13  Na kɛmɔ ɔsɔ Nyamenle anye la ati, ɔlɛyɛ gyima wɔ bɛ nu amaa bɛanyia ɛhulolɛ na eza bɛahola bɛayɛ. 14  Bɛmmatendɛ bɛ nzo abo na bɛsu kpolera wɔ bɛ debie biala ɛyɛlɛ nu, 15  amaa bɛ ahonle nu ade mɔɔ nvonleɛ biala ɛnle bɛ nwo, kɛ Nyamenle amra mɔɔ ɛtane ɛnle bɛ nwo wɔ awolɛndoazo ɛhye mɔɔ yɛ ɛtane na ɔnyɛ mɔɔ le kpalɛ la anu, na bɛda wɔ bɛ avinli kɛ ahɛnlaneɛ wɔ ewiade, 16  na bɛzɔ ngoane edwɛkɛ ne anu boɛ. Amaa meanyia debie meagyinla zo meali fɛlɛko wɔ Kelaese kenle ne, na meanwu kɛ meanzu ɛnriandilɛ ne mgbane anzɛɛ meanyɛ me gyima ne mgbane. 17  Noko, saa bɛwola me bɛgua kɛ nza mɔɔ bɛva bɛbɔ afɔle bɛmaa ɛzonlenlɛ nwuanzanwuanza* mɔɔ bɛ diedi ɛmaa bɛra nu la bɔbɔ a, me nye die yɛɛ me nee bɛ yɛ muala yɛdi fɛlɛko. 18  Zɔhane ala a ɔwɔ kɛ bɛdabɛ noko bɛ nye die na bɛ nee me di fɛlɛko a. 19  Kɛkala, me nye la kɛ saa ɔyɛ Awulae Gyisɛse ɛhulolɛ a ɔnrɛhyɛ biala na meazoa Timote wɔ bɛ nwo lɔ, amaa saa mete bɛ nganeɛ a yeamaa me anwosesebɛ. 20  Ɔluakɛ menlɛ awie biala mɔɔ ye subane le kɛ ɔdaye mɔɔ dwenle bɛ nwo kpalɛ a. 21  Ɔluakɛ bɛdabɛ mɔɔ bɛha la amuala ɛlɛkpondɛ mɔɔ hyia bɛ la, na tɛ mɔɔ hyia Gyisɛse Kelaese la ɔ. 22  Noko bɛze kɛzi ɔlale ɔ nwo ali kɛ ɔfɛta, na ɔ nee me yɛle gyima kɛ kakula nee ye papa ɔmaanle edwɛkpa ne dɛlɛle la. 23  Yemɔti, ɔdaye a me nye la kɛ saa menwu kɛzi ninyɛne ɛlɛkɔ zo amaa me ala a mebazoa ye a. 24  Nɔhalɛ nu, melɛ anwodozo wɔ Awulae anu kɛ ɔnrɛhyɛ medame mumua ne mebara. 25  Noko kɛkala, menwu kɛ ɔhyia kɛ mesoa Ɛpafulodaetɛse, me diema nee me gɔnwo gyimayɛvolɛ nee me gɔnwo sogyanli, mɔɔ bɛdule ye kɛ ɔrazonle me la wɔ bɛ nwo lɔ, 26  ɔluakɛ ɔ nwo ɛlɛdɔ bɛ muala na ɔlɛdi nyane kɛ bɛdele kɛ ɔ nwo dole ye la. 27  Nɔhalɛ nu, ɔ nwo dole ye mɔɔ anrɛɛ ɔwu a; noko Nyamenle nwunle ye anwunvɔne, na tɛ ɔ ngome, emomu medame noko, anrɛɛ me nyanelilɛ ne kɛbo zolɛ. 28  Zɔhane ati, melɛsoa ye meamaa yeara bɛ nwo lɔ ndɛndɛ, amaa saa bɛnwu ye a bɛali fɛlɛko bieko na medame noko me adwenleadwenle ne azo ade. 29  Yemɔti bɛva fɛlɛkolilɛ bɛlie ye kɛ mɔɔ bɛdie Awulae ɛdoavolɛma amuala la, na bɛbu menli mɔɔ le zɛhae la kɛ bɛsonle bolɛ, 30  ɔluakɛ Kelaese gyima* ne ati ɔhale ekyii na yeawu, ɔvale ye ngoane* ɔdole esiane nu amaa yeagyinla bɛ gyakɛ anu yeazonle me kɛmɔ bɛnle ɛke la ati.

Ɔbodwɛkɛ

Giliki aneɛ nu, “bɛ gɔnwo mɔ anwo ɛdwenlenlɛ.”
Anzɛɛ “bɛnyia mɛlɛbɛnwoaze adwenle.”
Nea Edwɛkɛbohilelɛ.
Anzɛɛ “ɛzonlenlɛ gyima.”
Anzɛɛ ɔkola ɔkile, “Awulae gyima.”
Anzɛɛ “ɛkɛla.”