Dwɔn 2:1-25

  • Kana atɔfolɛlielɛ; nzule hakyile nza (1-12)

  • Gyisɛse te ɛzonlenlɛ sua ne anwo (13-22)

  • Gyisɛse ze mɔɔ wɔ sonla ahonle nu (23-25)

2  Ye kenle nsa ne azo, bɛliele atɔfolɛ bie wɔ Kana mɔɔ wɔ Galeli la, na ɛnee Gyisɛse mame wɔ ɛkɛ ne bie.  Bɛdole ɛsalɛ bɛvɛlɛle Gyisɛse nee ye ɛdoavolɛma ne noko wɔ atɔfolɛlielɛ ne abo.  Mekɛ mɔɔ nza ne wiele la, Gyisɛse mame zele ye kɛ: “Bɛnlɛ nza.”  Noko Gyisɛse zele ye kɛ: “Raalɛ ye, duzu a me nee wɔ lɛ ye yɛ a?* Me mekɛ ɛtɛdwule.”  Ye mame hanle hilele sonvolɛma ne kɛ: “Mɔɔ ɔkɛha ɔkɛhile bɛ biala la, bɛyɛ.”  Dwuuma anwodelɛ nwo amaamuo ne ati, ɛnee mbuakɛ nsia mɔɔ bɛva awolɛ bɛyɛ la wɔ ɛkɛ, na ɛnee ko biala kola di nzule bokiti* mgbole nwiɔ anzɛɛ nsa.  Gyisɛse zele bɛ kɛ: “Bɛza nzule bɛgua mbuakɛ ne mɔ anu bɛmaa bɛyi tetɛkɛɛ.” Yemɔti bɛguale nzule nu bɛmaanle bɛyile.  Akee ɔzele bɛ kɛ: “Bɛza bie bɛhɔmaa mɔɔ ɛlɛnea atɔfolɛlielɛ ne azo la.” Ɔti bɛzale bie bɛhɔle.  Mekɛ mɔɔ atɔfolɛlielɛ ne azo neavolɛ ne zɔle nzule ne mɔɔ ɛhakyi nza la bie nleanle na ɔnze ɛleka mɔɔ ɔvi la (noko sonvolɛma ne mɔɔ zale nzule ne la bɛmɛ bɛze), atɔfolɛlielɛ ne azo neavolɛ ne vɛlɛle atɔfolɛ nrenyia ne 10  na ɔzele ye kɛ: “Awie biala dimoa fa nza kpalɛ ne finde, na mekɛ mɔɔ menli ne kɛbo la yeava mɔɔ ɛnle kpalɛ la yeara. Wɔmɔ, wɔva nza kpalɛ ne wɔzie dedee yeradwu bekezɛ.” 11  Gyisɛse yɛle ɛhye wɔ Kana mɔɔ wɔ Galeli la ɔvale ɔbɔle ye nwanwane gyima ne abo, na ɔyele ye anyunlunyia ne ɔhilele na ye ɛdoavolɛma ne liele ye lile. 12  Ɛhye anzi ɔ nee ye mame nee ɔ mediema mrenyia nee ye ɛdoavolɛma ne hɔle Kapɛnayɛm, noko bɛangyɛ ɛkɛ. 13  Ɛnee Dwuuma Akpabɛnwo ne ɛbikye, na Gyisɛse hɔle Gyɛlusalɛm. 14  Ɔnwunle menli mɔɔ tɔne nlankɛ nee mboane nee mɔlɔnoma la wɔ ɛzonlenlɛ sua ne anu yɛɛ menli mɔɔ senza ezukoa la kɛ bɛdede bɛ mbia zo. 15  Ɔvale nyɛma ɔyɛle empele ɔvoanle bɛdabɛ mɔɔ bɛlɛ mboane nee nlankɛ wɔ ɛzonlenlɛ sua ne anu la kɔsɔɔti na ɔwolale menli mɔɔ ɛlɛsenza ezukoa la ezukoa ne ɔguale na ɔbutubutule bɛ ɛkponle ne mɔ. 16  Akee ɔzele bɛdabɛ mɔɔ bɛlɛtɔne mɔlɔnoma ne la kɛ: “Bɛye ninyɛne ɛhye mɔ bɛvi ɛke! Bɛmmafa me Ze sua ne bɛyɛ gualilɛ sua!”* 17  Ye ɛdoavolɛma ne hakyele kɛ bɛhɛlɛ kɛ: “Wɔ sua ne anwo mɔdenlebɔlɛ bayi me tɛkɛɛ.” 18  Yemɔti Dwuuma ne buale ye kɛ: “Ninyɛne ɛhye mɔ mɔɔ ɛlɛyɛ la, sɛkɛlɛneɛ boni a ɛbahola wɔayɛ wɔahile kɛ ɛlɛ adenle ɛyɛ zɔ a?” 19  Gyisɛse buale bɛ kɛ: “Bɛbubu ɛzonlenlɛ sua ɛhye na mebava kenle nsa meazi.” 20  Dwuuma ne hanle kɛ: “Bɛvale ɛvolɛ 46 a bɛzile ɛzonlenlɛ sua ɛhye a, ɛbava kenle nsa wɔazi ɔ?” 21  Noko ɛnee ɔlɛka ye sonlabaka ne mɔɔ gyi ɛkɛ ne maa ɛzonlenlɛ sua ne la anwo edwɛkɛ. 22  Noko mekɛ mɔɔ bɛdwazole ye bɛvile mowuamra anu la, ye ɛdoavolɛma ne hakyele kɛ ɛnee ɔta ɔka ɛhye, na bɛliele ngɛlɛlera ne nee mɔɔ Gyisɛse hanle la bɛlile. 23  Noko mekɛ mɔɔ ɛnee ɔwɔ Gyɛlusalɛm wɔ Akpabɛnwo ɛvoyia ne abo la, menli dɔɔnwo mɔɔ nwunle nwanwane ninyɛne mɔɔ ɛnee ɔlɛyɛ la liele ye lile. 24  Noko Gyisɛse anva ɔ nwo ando bɛ nwo zo ɔluakɛ ɛnee ɔze bɛ muala 25  na ɛnee ɔngyia kɛ awie kɛli sonla nwo daselɛ kɛhile ye ɔluakɛ ɛnee ɔze mɔɔ wɔ sonla ahonle nu la.

Ɔbodwɛkɛ

Giliki aneɛ nu, “Kɛzi ɔfale me nee wɔ yɛ nwo ɛ, raalɛ ye?” Ɛhye le ɛrɛlɛdendɛ mɔɔ kile debie mɔɔ bɛnrɛyɛ la. “Raalɛ ye” mɔɔ ɔhanle la ɛngile kɛ ɔmbu debie.
Bokiti kpole ko biala kola di nzule litili 22.
Anzɛɛ “gua nu.”