Dwɔn 16:1-33

  • Gyisɛse ɛdoavolɛma kola yia ewule (1-4a)

  • Sunsum nwuanzanwuanza gyima (4b-16)

  • Ɛdoavolɛma nyanelilɛ bahakyi fɛlɛkolilɛ (17-24)

  • Gyisɛse di ewiade zo konim (25-33)

16  “Meha ɛhye mehile bɛ amaa bɛamkpo me.  Menli baye bɛ avi nyianu sua nu. Nɔhalɛ nu, mekɛ ɛlɛba mɔɔ awie biala mɔɔ kɛhu bɛ la bazuzu kɛ ɔlɛfa yeazonle Nyamenle a.  Noko bɛbayɛ ɛhye mɔ amuala ɔluakɛ bɛnze Selɛ ne yɛɛ bɛnze me.  Na meha ɛhye mehile bɛ amaa mekɛ mɔɔ ɔwɔ kɛ bɛsisi la dwu a, bɛahakye kɛ menganle mengilele bɛ. “Meanga ɛhye meangile bɛ wɔ mɔlebɛbo ne, ɔluakɛ ɛnee mewɔ bɛ nwo ɛkɛ.  Noko kɛkala melɛkɔ Mɔɔ zoanle me la anwo lɔ; noko bɛ nuhua ko bɔbɔ ɛtɛbizale me kɛ, ‘Nienwu a ɛlɛkɔ a?’  Noko kɛmɔ meha ɛhye mehile bɛ la ati, nyane ɛyi bɛ ahonle nu tɛkɛɛ.  Noko akee, meka nɔhalɛ ne meahile bɛ, bɛ kpalɛyɛlɛ ti a melɛkɔ a. Ɔluakɛ saa meangɔ a boavolɛ ne ɛnrɛra bɛ nwo; noko saa mekɔ a, mebazoa ye meamaa yeara bɛ nwo ɛkɛ.  Na saa ɔba a, ɔbamaa awie biala anwu mɔɔ ɛtane kile, mɔɔ tenleneyɛlɛ kile, nee mɔɔ ndɛnebualɛ kile la:  mɔɔ limoa la fale ɛtane nwo, ɔluakɛ bɛannyia diedi wɔ me nu; 10  akee ɔfale tenleneyɛlɛ nwo, ɔluakɛ melɛkɔ Selɛ ne anwo lɔ na bɛnrɛnwu me bieko; 11  akee ɔfale ndɛnebualɛ nwo, ɔluakɛ bɛbua mɔɔ nea ewiade ɛhye azo la ndɛne. 12  “Ninyɛne dɔɔnwo wɔ ɛkɛ mɔɔ ɔwɔ kɛ meka mekile bɛ a, noko bɛnrɛde ɔ bo kɛkala. 13  Noko, saa boavolɛ ne, sunsum ne mɔɔ maa bɛnwu nɔhalɛ ne la ba a, ɔbamaa bɛade nɔhalɛ ne abo kpalɛ ɔluakɛ ɔnrɛbɔ ɔ ti anu ɔnrɛdendɛ, ɔbaha mɔɔ ɔkɛde la, na yeaha ninyɛne mɔɔ ɔwɔ kɛ ba la yeahile bɛ. 14  Ɔbawula me anyunlunyia ɔluakɛ mɔɔ yede yevi me ɛkɛ la yɛɛ ɔbaha yeahile bɛ a. 15  Debie biala mɔɔ me Ze lɛ la le me ɛdeɛ. Ɛhye ati a mese mɔɔ yede yevi me ɛkɛ ne la yɛɛ ɔbaha yeahile bɛ la. 16  Yeha ekyii bɛnrɛnwu me bieko, yɛɛ yeha ekyii eza bɛbanwu me.” 17  Akee ye ɛdoavolɛma ne bie mɔ bizebizale bɛ nwo kɛ: “Duzu a edwɛkɛ ɛhye mɔɔ yeha yehile yɛ la kile a, ‘Yeha ekyii bɛnrɛnwu me bieko, yɛɛ yeha ekyii eza bɛbanwu me,’ yɛɛ, ‘ɔluakɛ melɛkɔ Selɛ ne anwo lɔ’?” 18  Yemɔti ɛnee bɛlɛka kɛ: “Yeha ekyii ne mɔɔ ɔhanle la kile duzu? Yɛnze mɔɔ ɔlɛka nwolɛ edwɛkɛ la.” 19  Gyisɛse nwunle kɛ bɛkpondɛ kɛ bɛbiza ye, yemɔti ɔzele bɛ kɛ: “Kɛmɔ menganle kɛ: ‘Yeha ekyii bɛnrɛnwu me bieko, yɛɛ yeha ekyii eza bɛbanwu me la ati a, bɛlɛbizebiza bɛ nwo edwɛkɛ a?’ 20  Meka nɔhalɛ ne meahile bɛ, bɛbazu alɔbɔlɛ ɛzunlɛ noko ewiade ne bali fɛlɛko; bɛbali nyane noko bɛ nyanelilɛ ne bahakyi fɛlɛkolilɛ. 21  Saa raalɛ ɛlɛwo a, ɔte nyane ɔluakɛ ye mekɛ ɛdwu, noko saa ɔwo kakula ne a, ɔngakye nyanelilɛ ne bieko ɔluakɛ ɔ nye die kɛ yewo sonla yedo ewiade ye anu la. 22  Ɔti bɛdabɛ noko, kɛkala bɛbali nyane; noko mebanwu bɛ bieko na fɛlɛkolilɛ bayi bɛ ahonle nu tɛkɛɛ na awie biala ɛnrɛhola ɛnrɛlie bɛ fɛlɛkolilɛ ne. 23  Kenle zɔhane, bɛnrɛbiza me edwɛkɛ bieko. Meka nɔhalɛ ne meahile bɛ, debie biala mɔɔ bɛkɛbiza Selɛ ne wɔ me duma nu la, ɔkɛva ɔkɛmaa bɛ. 24  Too mɔɔ yeradwu ɛnɛ la, bɛtɛbizale debie ko bɔbɔ wɔ me duma nu. Bɛbiza, na bɛ sa kɛha ye amaa bɛ fɛlɛkolilɛ ne ali munli. 25  “Meha ɛhye mɔ mehile bɛ wɔ mrɛlɛ nu. Mekɛ ɛlɛba mɔɔ menrɛdendɛ menrɛhile bɛ wɔ mrɛlɛ nu bieko a, emomu mebaha Selɛ ne anwo edwɛkɛ wienyi meahile bɛ. 26  Kenle zɔhane, bɛbabiza debie bɛavi Selɛ ne ɛkɛ wɔ me duma nu; ɛhye mɔɔ meha la, mengile kɛ mebabiza debie meamaa bɛ. 27  Ɔluakɛ Selɛ ne kulo bɛ, kɛ mɔɔ ɛnee bɛkulo me na bɛlie bɛli kɛ mele Nyamenle agyakɛnugyinlavolɛ la. 28  Membale ewiade ye kɛ Selɛ ne agyakɛnugyinlavolɛ. Kɛkala melɛfi ewiade meahɔ Selɛ ne anwo lɔ.” 29  Ye ɛdoavolɛma ne hanle kɛ: “Nea! Kɛkala ɛlɛka debie biala wienyi, ɛnga ye wɔ mrɛlɛ nu. 30  Kɛkala yɛnwu ye kɛ ɛze debie biala na ɔngyia kɛ awie kɛbiza wɔ edwɛkɛ. Ɛhye ati yɛdie yɛdi kɛ ɛvi Nyamenle anwo lɔ a ɛrale a.” 31  Gyisɛse buale bɛ kɛ: “Akee bɛlie bɛli ɔ? 32  Nea! Mekɛ ɛlɛba, nɔhalɛ nu yedwu bɔbɔ, mɔɔ bɛ nuhua ko biala banriandi ahɔ ye sua nu na yeaha me ngomekye a. Noko ɔnrɛha me ngome ɔluakɛ Selɛ ne boka me nwo. 33  Meha ɛhye mehile bɛ amaa ɔlua me nwo zo bɛanyia anzodwolɛ. Bɛbanwu amaneɛ dɔɔnwo wɔ ewiade ye anu, noko bɛnyia akɛnrasesebɛ! Meli ewiade ne anwo zo konim.”

Ɔbodwɛkɛ