Dwɔn 15:1-27

  • Vanye kpalɛ ne anwo ndonwo (1-10)

  • Mɛla mɔɔ maa yɛda Kelaese ɛlɔlɛ ali la (11-17)

    • ‘Ɛlɔlɛ biala ɛnle kpole ɛndɛla ɛhye’ (13)

  • Ewiade kpɔ Gyisɛse ɛdoavolɛma (18-27)

15  “Mame a mele nɔhalɛ vanye ne a, yɛɛ me Ze a le ɛyazonlɛnli ne a.  Ngane biala mɔɔ wɔ me nwo mɔɔ ɛnzo ma la ɔpɛ ye ɔto, na ɔyeye* biala mɔɔ so ma la anwo, amaa yeahola yeazo ma dɔɔnwo.  Edwɛkɛ ne mɔɔ meha mehile bɛ la ati, bɛ nwo ɛde dɛba.  Bɛ nee me ɛyɛ ko, na me nee bɛ bayɛ ko. Kɛ mɔɔ ngane ne angome ɛngola ɛnzo ma kyesɛ ɔwɔ vanye ne anwo la, bɛdabɛ noko bɛnrɛhola bɛnrɛzo ma kyesɛ bɛ nee me yɛ ko.  Mame a mele vanye ne a; bɛmɛ bɛle ngane ne mɔ. Awie biala mɔɔ nee me le ko na me nee ye le ko la so ma dɔɔnwo; ɔluakɛ saa menle nu a bɛnrɛhola bɛnrɛyɛ ɛhwee.  Saa awie nee me anyɛ ko a, bɛbapɛ ye na yeayɛ kɛ ngane mɔɔ ɛwu la. Menli boɔboa ngane ɛhye mɔ anloa na bɛfuandi bɛgua senle nu bɛyela bɛ.  Saa bɛ nee me le ko na me edwɛkɛ ne tɛnla bɛ ahonle nu a, bɛbiza debie biala mɔɔ bɛkulo la na bɛ sa kɛha ye.  Mɔɔ wula me Ze anyunlunyia la a le kɛ bɛkɛhɔ zo bɛkɛzo ma dɔɔnwo na bɛahile kɛ bɛle me ɛdoavolɛma.  Kɛ mɔɔ Selɛ ne kulo me na medame noko mekulo bɛ la; bɛdɛnla me ɛlɔlɛ ne anu. 10  Saa bɛdi me mɛla zo a bɛbadɛnla me ɛlɔlɛ ne anu kɛ mɔɔ meli Selɛ ne mɛla zo na mede ye ɛlɔlɛ ne anu la. 11  “Meha ɛhye mehile bɛ amaa bɛanyia me anyelielɛ ne bie na bɛ anyelielɛ ne ali munli. 12  Me mɛla ne a le ɛhye, bɛhulo bɛ nwo kɛ mɔɔ mehulo bɛ la. 13  Awie biala ɛnlɛ ɛlɔlɛ kpole ɛndɛla ɛhye, kɛ awie kɛva ye ngoane* kɛbɔ afɔle kɛmaa ɔ gɔnwo mɔ. 14  Saa bɛyɛ mɔɔ meha mehile bɛ la a, ɛnee bɛle me gɔnwo mɔ. 15  Menvɛlɛ bɛ ngɛkɛlɛ bieko, ɔluakɛ akɛlɛ ɛnze mɔɔ ɔ menle yɛ la. Na mevɛlɛ bɛ agɔnwolɛma ɔluakɛ debie biala mɔɔ mendele menvile me Ze ɛkɛ la, memaa bɛnwu ye. 16  Tɛ bɛmɛ a bɛkpale me a, medame a memkpale bɛ na menyele bɛ kɛ bɛhɔ na bɛhɔzo ma a na ɔwɔ kɛ bɛ ma ne kɔ zo tɛnla ɛkɛ, amaa debie biala mɔɔ bɛkɛbiza Selɛ ne wɔ me duma nu la, yeava yeamaa bɛ. 17  “Melɛka ɛhye meahile bɛ, amaa bɛahulo bɛ nwo. 18  Saa ewiade ne kpɔ bɛ a, bɛnwu ye kɛ ɔlimoale ɔkpɔle me kolaa na yeakpɔ bɛ. 19  Saa bɛwɔ ewiade ne afoa a, anrɛɛ ewiade ne anye balie mɔɔ le ye ɛdeɛ la anwo. Noko kɛmɔ bɛnle ewiade ne afoa na meye bɛ mevi ewiade ne anu la ati a ewiade ne kpɔ bɛ a. 20  Bɛhakye edwɛkɛ ne mɔɔ menganle mengilele bɛ la: Akɛlɛ ɛnle kpole ɛndɛla ɔ menle. Saa bɛyɛle me kpɔdekpɔde a, ɛnee bɛbayɛ bɛdabɛ noko kpɔdekpɔde; saa bɛlile me edwɛkɛ zo a, ɛnee bɛbali bɛdabɛ noko bɛ edwɛkɛ zo. 21  Noko me duma ne ati bɛbayɛ ɛhye mɔ amuala bɛatia bɛ, ɔluakɛ bɛnze Mɔɔ zoanle me la. 22  Saa meamba meammandendɛ meangile bɛ a, anrɛɛ ɛtane biala ɛnle bɛ nwo. Noko kɛkala bɛnlɛ bɛ ɛtane nwo nyelebɛnloa biala. 23  Awie biala mɔɔ kpɔ me la kpɔ me Ze noko. 24  Saa meanyɛ gyima mɔɔ awie biala ɛtɛyɛle bie ɛlɛ la wɔ bɛ avinli a, anrɛɛ ɛtane biala ɛnle bɛ nwo; noko kɛkala bɛnwu me yɛɛ bɛkpɔ me nee me Ze. 25  Noko ɛhye ɛzi amaa edwɛkɛ mɔɔ bɛhɛlɛ ye wɔ bɛ Mɛla ne anu la ara nu kɛ: ‘Mgbane gyɛne ala a bɛkpɔle me a.’ 26  Saa boavolɛ ne mɔɔ mebazoa ye meavi Selɛ ne ɛkɛ, sunsum ne mɔɔ maa bɛnwu nɔhalɛ ne mɔɔ vi Selɛ ne anwo lɔ la ba a, ɔbali me nwo daselɛ; 27  na ɔwɔ kɛ bɛdabɛ noko bɛdi daselɛ, ɔluakɛ ɔvi mɔlebɛbo ne amuala bɛ nee me a lua a.

Ɔbodwɛkɛ

Giliki aneɛ nu, “ɔte.”
Anzɛɛ “ɛkɛla.”