2 Timote 1:1-18

  • Ahyebizalɛ (1, 2)

  • Pɔɔlo yɛ Nyamenle mo wɔ Timote diedi nwo (3-5)

  • Maa Nyamenle ahyɛlɛdeɛ ne ɛzɔ (6-11)

  • Sɔ edwɛkɛ kpalɛ ne anu (12-14)

  • Pɔɔlo agbɔvolɛ nee agɔnwolɛma (15-18)

1  Pɔɔlo, mɔɔ ɔlua Nyamenle ɛhulolɛ zo meyɛ Kelaese Gyisɛse ɛzoanvolɛ kɛ mɔɔ ngoane ne mɔɔ ɔlua Kelaese Gyisɛse anwo zo ɛwɔkɛ ne de la,  ɛlɛkɛlɛ ahɔmaa, me ra kulovolɛ Timote: Nyamenle Selɛ ne nee yɛ Awulae Kelaese Gyisɛse ɛlo wɔ, ɔze wɔ anwunvɔne na ɔmaa wɔ anzodwolɛ.  Meyɛ Nyamenle mɔɔ mefa adwenle mɔɔ anu te mesonle ye kɛ mɔɔ me nlenyia mɔ yɛle la mo kɛ me rɛle ɛnvi wɔ wɔ me modolɛ nu alehyenlɛ nee aledwolɛ la.  Saa mekakye wɔ ɛzunlɛ ne a, me nwo dɔ wɔ na mekulo kɛ menwu wɔ amaa me nye alie kpole.  Na mekakye wɔ nɔhalɛ diedi ne, mɔɔ alimoa ne ɔwɔ wɔ nana Loyese nee wɔ mame Yunise anu la, na melɛ anwodozo kɛ ɔwɔ ɛdawɔ noko wɔ nu.  Ɛhye ati mekakye wɔ kɛ, Nyamenle ahyɛlɛdeɛ ne mɔɔ menvale me sa menguale ɛ nwo zo mɔɔ ɛnyianle la, maa ɔzɔ kɛ senle.  Ɔluakɛ Nyamenle ammaa yɛ foanvoanle sunsum, emomu ɔmaanle yɛ tumi nee ɛlɔlɛ nee adwenle mɔɔ anu te la.  Yemɔti mmamaa Awulae anwo daselɛlilɛ ne nee medame mɔɔ ɔdaye ti meyɛ pilizanli la me nwo yɛ wɔ nyiane, emomu, ɛdawɔ noko dua Nyamenle tumi ne azo nwu edwɛkpa ne anwo amaneɛ ne bie.  Ɔliele yɛ na ɔvale ɛvɛlɛlɛ nwuanzanwuanza ɔvɛlɛle yɛ, tɛ yɛ gyima ti ɔ, emomu ɔdaye ye bodane nee ye ɛlolɛ ti ɔ. Ɔluale Kelaese Gyisɛse anwo zo ɔvale ɛhye ɔmaanle yɛ ɔvi tete, 10  noko kɛkala bɛlua yɛ Ngoanedievolɛ Kelaese Gyisɛse mɔɔ bɛla ye ali la anwo zo bɛmaa yela ali wienyi, yeye ewule yevi ɛkɛ na yemaa yelua edwɛkpa ne azo yela ngoane nee sonlabaka mɔɔ ɛmkpɔlɔ la ali yehile yɛ, 11  na ɛhye ati a bɛkpale me edwɛkpakavolɛ, ɛzoanvolɛ yɛɛ kilehilevolɛ a. 12  Ɛhye noko ati a melɛnwu amaneɛ ɛhye a, noko menze nwolɛ nyiane. Ɔluakɛ meze Ahenle mɔɔ melie ye meli la na medie medi kɛ ɔbahola yeabɔ mɔɔ meva mewula ɔ sa nu la anwo bane kɔkpula kenle zɔhane. 13  Kɔ zo sɔ edwɛkɛ kpalɛ* nwo ngyinlazo* mɔɔ ɛdele ɛvile me ɛkɛ la anu, na kɔ zo da wɔ diedi nee ɛlɔlɛ ali kɛ awie mɔɔ nee Kelaese Gyisɛse lua la. 14  Dua sunsum nwuanzanwuanza ne mɔɔ wɔ yɛ nu la moalɛ zo nea debie kpalɛ ɛhye mɔɔ bɛva bɛwula ɛ sa nu la azo boɛ. 15  Ɛze kɛ menli mɔɔ wɔ Ehyea maanzinli ne anu la kɔsɔɔti ɛhwe bɛ nwo ɛvi me nwo, Fegyɛlɛse nee Hɛmɔgyɛnize boka bɛ nwo. 16  Awulae ɛze Onɛsefɔlɛse sua nu amra anwunvɔne, ɔluakɛ ɛnee ɔta ɔmaa me anwosesebɛ na yeanyɛ ye nyiane kɛ mela efiade. 17  Emomu, mɔɔ ɔrale Wulomu la, ɔbɔle mɔdenle ɔkpondɛle me na ɔnwunle me. 18  Awulae ɛmaa Gyihova* ɛze ye anwunvɔne wɔ kenle zɔhane. Ɛdawɔ ɛze kɛzi ɔboale me dɔɔnwo wɔ Ɛfɛsɛse la.

Ɔbodwɛkɛ

Anzɛɛ “edwɛkɛ mɔɔ nvasoɛ wɔ zo.”
Anzɛɛ “neazo.”
Nea Edwɛkɛbohilelɛ.