2 Pita 3:1-18

  • Agolobɛnwoma ɛndwenle ɛzɛkyelɛ mɔɔ ɛlɛba la anwo (1-7)

  • Gyihova ɛngyɛ ye ɛwɔkɛ nwo (8-10)

  • Bɛdwenle menli holɛ ko mɔɔ ɔwɔ kɛ bɛyɛ la anwo (11-16)

    • Anwuma fofolɛ nee azɛlɛ fofolɛ (13)

  • Bɛnlea boɛ na bɛambɛlɛbɛla bɛ (17, 18)

3  Alɔvolɛ, ɛhye a le me kɛlata mɔɔ tɔ zo nwiɔ mɔɔ melɛkɛlɛ bɛ a, na kɛ mɔɔ menganle ye wɔ alimoa ɛdeɛ ne anu la, mekakyehakye bɛ adwenle amaa nuhua ala ɛkɛ ne wienyi,  na bɛahakye edwɛkɛ mɔɔ ngapezoma nwuanzanwuanza ne mɔ ɛha ɛdo ɛkɛ ne yɛɛ mɛla ne mɔɔ Awulae nee Ngoanedievolɛ ne ɛlua bɛ ɛzoanvolɛma ne anwo zo ɛva ɛmaa bɛ la.  Mɔɔ limoa la, bɛnwu ɛhye kɛ mekɛ mɔɔ li awieleɛ la anu agolobɛnwoma mɔɔ di bɛ atiakunluwɔzo nzi la bara na bɛagolo bɛ nwo  bɛaha kɛ: “Ye ɛralɛ ne mɔɔ bɛbɔ nwolɛ ɛwɔkɛ la wɔ nienwu? Nea, ɔvi kenle mɔɔ yɛ nlenyia mɔ lale wɔ ewule nu la, kɛ debie biala de, ɔvi abɔdeɛ mɔlebɛbo la a ɔde a.”  Na bɛ nye fuu bɛmaa bɛ rɛle fi edwɛkɛ ɛhye kɛ dɛba ne ɛnee anwuma wɔ ɛkɛ na ɔlua Nyamenle edwɛkɛ zo azɛlɛ mɔɔ gyi ye kpundii la vi nzule nu rale na ɛnee nzule ɛbɔ ye ɛyia;  na ɔlua zo a nzule yile zɛkyele ewiade ne mɔɔ ɛnee wɔ ɛkɛ ne wɔ zɔhane mekɛ ne la.  Na ɔlua edwɛkɛ ko ne ala azo bɛva anwuma nee azɛlɛ ne mɔɔ wɔ ɛkɛ ne la bɛzie ɛkɛ bɛmaa senle na bɛlɛfa bɛahendɛ ndɛnebualɛ kenle ne nee amumuyɛma ɛzɛkyelɛ ne.  Noko alɔvolɛ, bɛmmamaa bɛ rɛle fi ɛhye kɛ kenle ko le Gyihova* anye zo ɛvolɛ apenle ko, yɛɛ ɛvolɛ apenle ko le ɔ nye zo kenle ko.  Gyihova* ɛngyɛ ye ɛwɔkɛ nwo kɛ mɔɔ bie mɔ bu ye kɛ ɔkyɛ la, emomu ɔlɛ bɛ nwo abotane ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo. 10  Na Gyihova* kenle ne bara ye kɛ awule la, nuhua a anwuma bava ɛnelɛ kpole apɛ nu a, na ninyɛne mɔɔ ɛlɔ katukatu la baholo, na azɛlɛ ne nee nuhua gyima bala ali. 11  Kɛmɔ ninyɛne ɛhye mɔ amuala baholo wɔ adenle zɛhae azo la ati, bɛdwenle menli holɛ ko mɔɔ ɔwɔ kɛ bɛyɛ ye wɔ ɛbɛlabɔlɛ nwuanzanwuanza nee nyamenlezonlenlɛ kpalɛ nu la anwo, 12  wɔ mekɛ mɔɔ bɛlɛkendɛ na bɛamaa Gyihova* kenle ne ɛralɛ ayɛ ndɛndɛ wɔ bɛ adwenle nu la,* nuhua a bɛbazɛkye anwuma wɔ sendɔlɔra nu na ninyɛne ne mɔɔ ɛlɔ katukatu la aholo a! 13  Na kɛ mɔɔ ye ɛwɔkɛ ne kile la, yɛlɛkendɛ anwuma fofolɛ nee azɛlɛ fofolɛ, na ɛhye mɔ anu a tenleneyɛlɛ badɛnla a. 14  Ɛhye ati alɔvolɛ, kɛmɔ bɛlɛkendɛ ninyɛne ɛhye mɔ la ati, bɛbɔ mɔdenle kɛ awieleɛ bɔkɔɔ ne bɛbanwu bɛ kɛ ngehanleɛ nee dɛne biala ɛnle bɛ nwo na bɛde anzodwolɛ nu. 15  Bieko, bɛbu yɛ Awulae abotane ne kɛ ngoanelielɛ kɛ mɔɔ yɛ diema kulovolɛ Pɔɔlo noko luale nrɛlɛbɛ ne mɔɔ bɛva bɛmaa ye la azo hɛlɛle bɛ la, 16  ɔhanle ɛhye mɔ anwo edwɛkɛ kɛ mɔɔ ɔyɛ ye wɔ ye ngɛlata ne mɔ amuala anu la. Noko ninyɛne bie mɔ mɔɔ bɛ bo ɛdelɛ yɛ se la wɔ nu, na bɛdabɛ mɔɔ bɛtɛkilehilele bɛ na bɛnzi pi la kyibehyiba ninyɛne ɛhye mɔ, kɛ mɔɔ bɛyɛ Ngɛlɛlera ne mɔɔ ɛha la bɛfa bɛsɛkye bɛ nwo la. 17  Zɔhane ati, bɛmɛ alɔvolɛ, kɛmɔ bɛze ɛhye dɛba la ati, bɛnlea boɛ na mɛladonlɛma anlua bɛ nvonleɛ zo ambɛlɛbɛla bɛ na mekɛ mɔɔ bɛgyi ye kpundii* la bɛandɔ aze. 18  Kyɛkyɛ, emomu bɛhɔ zolɛ bɛnyi wɔ yɛ Awulae nee Ngoanedievolɛ Gyisɛse Kelaese ɛlolɛ nee ɔ nwo ndelebɛbo nu. Yemɔ a anyunlunyia ɛha ye ɛnɛ nee dahuu a. Amen.

Ɔbodwɛkɛ

Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “bɛ nye ala kenle ne ɛsesebɛ la.”
Anzɛɛ “bɛgyi ye pi.”