2 Kɔlentema 7:1-16

  • Yɛwowo yɛ nwo wɔ evinli biala anwo (1)

  • Pɔɔlo di fɛlɛko wɔ Kɔlentema anwo (2-4)

  • Taetɛse fa amaneɛ kpalɛ ba (5-7)

  • Nyamenle nu arɛlebɔlɛ nee anlubɛnwo (8-16)

7  Alɔvolɛ, kɛmɔ bɛbɔ yɛ ɛwɔkɛ ɛhye mɔ la ati, bɛmaa yɛwowo yɛ nwo wɔ nwonane nee sunsum nu evinli biala anwo, amaa yɛ nwo ade kpalɛ wɔ Nyamenle ɛzulolɛ nu.  Bɛbuke bɛ ahonle nu bɛmaa yɛ. Yɛtɛyɛle awie biala ɛtane, yɛtɛsɛkyele awie biala, yɛtɛkpondɛle awie biala anwo zo nvasoɛ.  Menga ɛhye kɛ mefa meabua bɛ fɔlɛ. Ɔluakɛ melimoa meha kɛ bɛwɔ yɛ ahonle nu kɛ yɛ nee bɛ bawu na yɛ nee bɛ adɛnla ngoane nu.  Mekola mefa akɛnrasesebɛ kpole metendɛ mekile bɛ. Mefa bɛ metu me nloa anu kpalɛ. Arɛlekyekyelɛ ɛyi me tɛkɛɛ; medi fɛlɛko kpole wɔ yɛ anwongyelelɛ kɔsɔɔti anu.  Nɔhalɛ nu, mɔɔ yɛrale Masidonea la, yɛ sonlabaka* ne mɔ anwo andɔ bɛ, emomu yɛyiale ngyegyelɛ wɔ adenle biala anu—ɛnee konle wɔ gua zo yɛɛ ɛzulolɛ wɔ yɛ avinli.  Noko Nyamenle mɔɔ kyekye bɛdabɛ mɔɔ bɛ rɛle ɛbɔ la arɛle la luale Taetɛse ɛralɛ ne azo kyekyele yɛ rɛle;  na tɛ ye ɛralɛ ne angome, emomu arɛlekyekyelɛ ne noko mɔɔ ɔnyianle ye wɔ bɛ ɛkɛ ne, wɔ mekɛ mɔɔ ɔrahanle kɛzi bɛ nwo ɛlɛdɔ me, nyane kpole mɔɔ bɛlɛdi, nee kɛzi bɛdwenle* me nwo kpalɛ la; yemɔti ɔmaanle menlile fɛlɛko kpole.  Na saa me kɛlata ne maanle bɛ rɛle bɔle bɔbɔ a, menli nwolɛ nyane. Saa alimoa ne menlile nwolɛ nyane bɔbɔ a (menwunle kɛ kɛlata ne maanle bɛlile nyane mekɛ ekyi bie ala),  kɛkala medi fɛlɛko, tɛ kɛ bɛ rɛle bɔle la ati ɔ, emomu kɛmɔ bɛ rɛle bɔle na bɛnlunle bɛ nwo la ati ɔ. Ɔluakɛ bɛ rɛle bɔle wɔ adenle mɔɔ sɔ Nyamenle anye la azo, amaa yɛdayɛ ti, edwɛkɛ ɛtane biala ando bɛ. 10  Ɔluakɛ arɛlebɔlɛ mɔɔ sɔ Nyamenle anye la maa bɛnu bɛ nwo na ɔkɔwie ngoanelielɛ nu, bɛnli nwolɛ nyane; noko ewiade arɛlebɔlɛ maa ewule. 11  Bɛnlea kɛzi bɛ rɛle mɔɔ bɔle wɔ adenle mɔɔ sɔ Nyamenle anye azo la maanle bɛbɔle mɔdenle la, bɛhilele kɛ bɛnli ɛzonle, bɛvale ɛya, ɛzulolɛ hanle bɛ, bɛ nwo lɔle me, bɛyelele bɛ nwo, bɛlile nvonleɛ ne anwo gyima! Adenle biala anu bɛhilele kɛ bɛ nwo te wɔ edwɛkɛ ɛhye anu. 12  Mengɛlɛle bɛ, noko tɛ mɔɔ yɛle ɛtane ne anzɛɛ mɔɔ bɛvonle ye la ati ɔ, emomu amaa bɛ mɔdenle mɔɔ bɛbɔ ye wɔ yɛ nwo la ala ali wɔ bɛ avinli wɔ Nyamenle anyunlu. 13  Ɛhye ati a yɛ rɛle ɛkyekye la. Noko tɛ yɛ rɛle mɔɔ ɛkyekye la angome, emomu yɛdi fɛlɛko kpole wɔ Taetɛse anyelielɛ ne anwo ɔluakɛ bɛ kɔsɔɔti bɛmaanle ɔlile fɛlɛko wɔ ye ahonle* nu. 14  Na saa menvale bɛ mendule me nloa anu mengilele ye a, bɛangua me nyunlu aze; emomu kɛ mɔɔ debie biala anu yɛka nɔhalɛ ne yɛkile bɛ la, zɔhane ala a yɛ nloa anu mɔɔ yɛdule yɛhilele Taetɛse la noko ɛyɛ nɔhalɛ a. 15  Bieko, ɔlɛ bɛ nwo ɛlɔlɛ kpole na ɔkakye tieyɛ mɔɔ bɛ muala bɛyɛle, kɛzi bɛvale ɛzulolɛ nee anwowozolɛ bɛliele ye la. 16  Me nye die kɛ wɔ debie biala anu melɛ anwodozo wɔ bɛ nu la.

Ɔbodwɛkɛ

Giliki aneɛ nu, “yɛ nwonane.”
Giliki aneɛ nu, “kɛzi bɛbɔ mɔdenle bɛdwenle.”
Giliki aneɛ nu, “sunsum.”