1 Timote 5:1-25

  • Kɛzi bɛ nee mgbavolɛ nee mgbanyima di la (1, 2)

  • Ahunlanvolɛ ɛboalɛ (3-16)

    • Awie sua nu amra ɛnleanlɛ (8)

  • Bɛbu mgbanyima mɔɔ bɔ mɔdenle la (17-25)

    • ‘Ɛ ko ne ati anrɛɛ no nwanye ekyi’ (23)

5  Mmatwi kpanyinli nyunlu. Emomu tendɛ kile ye kɛ selɛ, mgbavolɛ kɛ mediema mrenyia,  mraalɛ mgbanyinli kɛ mame mɔ, mbɛlɛra kɛ mediema mraalɛ, wɔ anwodelɛ muala anu.  Di ahunlanvolɛ mɔɔ ɛnlɛ neavolɛ* la eni.  Na saa kunlavolɛ bie lɛ mralɛ anzɛɛ nlɔnra a, ɛhye mɔ ɛlimoa ɛzukoa nyamenlezonlenlɛ kpalɛ wɔ bɛ azua nu na bɛdua bɛ awovolɛ nee bɛ nana mɔ kakɛ mɔɔ ɔfɛta la, ɔluakɛ ɛhye sɔ Nyamenle anye.  Kunlavolɛ mɔɔ ɛnlɛ awie ɛnnea ye la, fa ɔ nye to Nyamenle anwo zo na ɔkɔ zo ɔbodo ɔyɛ asɔne alehyenlɛ nee aledwolɛ.  Na mɔɔ fa ɔ nwo maa nwonane ne atiakunluwɔzo la de aze ɛdeɛ, noko yewu.  Ɔti kɔ zo fa adehilelɛ* ɛhye mɔ maa, amaa awie annyia edwɛkɛ biala anga wɔ bɛ nwo.  Nɔhalɛ nu saa awie ɛnnea ɔdaye ye menli, titili ye sua nu amra a, ɛnee yekpo diedi ne na ɔle ɛtanevolɛ ɔtɛla sonla mɔɔ ɛnlɛ diedi la.  Mmakɛlɛ kunlavolɛ biala duma ɛboka nwo kyesɛ yebo ɛvolɛ 60, na ɛnee ɔ hu le kokye ala, 10  yelie duma wɔ gyima kpalɛ nwo, ɔtetele ngakula, ɔliele nyɛvolɛ, ɔwowole nwuanzanwuanzama agyakɛ anwo, ɔboale menli mɔɔ wɔ anwongyelelɛ nu, na ɔdule ɔ nwo ɔmaanle gyima kpalɛ biala. 11  Noko, mmakɛlɛ ahunlanvolɛ mbɛlɛra aluma ɛboka nwo, ɔluakɛ saa bɛ nla nwo atiakunluwɔzo ne dwazo a, bɛtwe bɛ nwo bɛfi Kelaese anwo na bɛkulo kɛ bɛkɔ agyalɛ. 12  Na bɛbanyia ndɛnebualɛ ɔluakɛ bɛkpo bɛ alimoa diedi* ne. 13  Mekɛ ko ne ala bɛsɛkye bɛ mekɛ, bɛduolua azua nu; tɛ kɛ bɛsɛkye bɛ mekɛ ala, eza bɛka awie mɔ anwo edwɛkɛ, bɛfa bɛ nloa bɛwulowula awie mɔ edwɛkɛ nu na bɛkeha edwɛkɛ mɔɔ ɔnle kɛ bɛka la. 14  Yemɔti mekulo kɛ ahunlanvolɛ mbɛlɛra ne mɔ kɔ agyalɛ, bɛwo mralɛ, bɛnea sua nu, amaa agbɔvolɛ annyia adenle anga edwɛkɛ ɛtane antia yɛ. 15  Nɔhalɛ nu, bie mɔ ɛhwe bɛ nwo ɛhɔli Seetan anzi dɛbadɛba. 16  Saa diedinli raalɛ bie lɛ ahunlanvolɛ wɔ ye abusua nu a, ɔboa bɛ na yeanyɛ adesoa yeammaa asafo ne. Na asafo ne ahola aboa ahunlanvolɛ mɔɔ ɛnlɛ neavolɛ* la. 17  Bɛbu mgbanyima mɔɔ di bɛ nyunlu wɔ adenle kpalɛ zo la kpole kpalɛ, titili bɛdabɛ mɔɔ bɛbɔ mɔdenle wɔ ɛdendɛlɛ nee ngilehilelɛ nu la. 18  Ɔluakɛ ngɛlɛlera ne se, “Mmakyekye ɛnlankɛ mɔɔ ɛlɛwoso ma la anloa,” eza ɔse, “Gyimayɛvolɛ ahatualɛ fɛta ye.” 19  Mmadie somolɛ mɔɔ bɛkɛbɔ kpanyinli* la ɛto nu kyesɛ ɔgyi alasevolɛ nwiɔ anzɛɛ nsa anloa anu edwɛkɛ zo. 20  Twi menli mɔɔ kɔ zo yɛ ɛtane la anyunlu wɔ menli mɔɔ wɔ ɛkɛ la kɔsɔɔti anyunlu, amaa yeayɛ kɔkɔbɔlɛ yeamaa menli mɔɔ ɛha la.* 21  Meka meahile wɔ wɔ Nyamenle nee Kelaese Gyisɛse yɛɛ anwumabɔvolɛma mɔɔ bɛkpa bɛ la anyunlu kɛ di adehilelɛ ɛhye mɔ azo, na mmanea menli nyunlu anzɛɛ mmayɛ nyeyenu biala. 22  Mmapele ɛ nwo ɛfa ɛ sa ɛgua awie biala anwo zo;* mmamaa awie mɔ ɛtane noko ka wɔ; kɔ zo maa ɛ nwo ɛde. 23  Mmano nzule bieko,* emomu ɛ ko nee ɛ nwo mɔɔ ta toto wɔ la ati, anrɛɛ no nwanye ekyi. 24  Menli ne bie mɔ ɛtane da ali wienyi na ɔkɔwie ndɛnebualɛ nu, noko bie mɔ ɛdeɛ da ali nzinlii. 25  Zɔhane ala a gyima kpalɛ noko da ali wienyi a, na mɔɔ ɛnla ali bɔbɔ la bɛngola bɛnvea zolɛ.

Ɔbodwɛkɛ

Anzɛɛ “ahunlanvolɛ mɔɔ bɛhyia”; kile kɛ, bɛnlɛ awie mɔɔ boa bɛ.
Anzɛɛ “folɛdulɛ.”
Anzɛɛ “alimoa ɛwɔkɛ.”
Anzɛɛ “ahunlanvolɛ mɔɔ bɛhyia”; kile kɛ, bɛnlɛ awie mɔɔ boa bɛ.
Anzɛɛ “asafo nu kpanyinli.”
Giliki aneɛ nu, “amaa menli mɔɔ ɛha la azulo.”
Kile kɛ, mmapele ɛ nwo ɛkpa awie biala.
Anzɛɛ “Mmano nzule ngome ala.”