1 Timote 3:1-16

  • Mɔɔ maa neavolɛma fɛta (1-7)

  • Mɔɔ maa asafo nu azonvolɛ fɛta (8-13)

  • Nyamenlezonlenlɛ kpalɛ nwo fealeranu edwɛkɛ (14-16)

3  Ɛhye le nɔhalɛ edwɛkɛ: Saa awie kpondɛ kɛ ɔyɛ neavolɛ a, ɛnee ɔkulo gyima kpalɛ.  Ɔti ɔwɔ kɛ neavolɛ yɛ awie mɔɔ edwɛkɛ ɛnle ɔ nwo, ɔ ye kokye, ɔ nye gyi ɔ ti anwo, ye adwenle nu la ɛkɛ,* ɔyɛ ye ninyɛne pɛpɛɛpɛ, ɔdie nyɛvolɛ, ɔkola ɔkilehile,  ɔnle nzanli, ɔnle basabasa,* emomu ɔte edwɛkɛ bo, ɔngulo butulelilɛ, ɔ nye ɛmbolo ezukoa,  ɔle awie mɔɔ nea ye sua nu amra kpalɛ, ɔ mra fa enililɛ bɛlɛ bɛ nwo aze maa ye  (na saa awie ɛngola ɛnnea ye sua nu amra kpalɛ a, kɛ ɔkɛyɛ na yeahola yeanlea Nyamenle asafo ne azo ɛ?),  ɔnle kɛ ɔyɛ diedinli fofolɛ,* anrɛɛ ɔkɛmemaa ɔ nwo zo na bɛkɛbua ye ndɛne kɛ mɔɔ bɛbua Abɔnsam la.  Bieko, ɔwɔ kɛ menli mɔɔ ɛnle asafo ne anu la ka ɔ nwo edwɛkɛ kpalɛ amaa menli angua ɔ nyunlu aze* na yeandɔ Abɔnsam ɛhane nu.  Zɔhane ala a ɔwɔ kɛ asafo nu azonvolɛ anye ka aze a, bɛ nloa ɛnle nwiɔ nwiɔ,* bɛnle nzama, bɛnlua anyebolo adenle zo bɛnnyia bɛ nwo,  na bɛfa adwenle mɔɔ anu te la bɛsɔ diedi ne anwo fealeranu edwɛkɛ nwuanzanwuanza ne anu. 10  Bieko, bɛlimoa bɛzɔ menli zɛhae mɔ bɛnlea kɛ bɛfɛta; na saa edwɛkɛ ɛnle bɛ nwo a bɛamaa bɛazonle. 11  Zɔhane ala a ɔwɔ kɛ mraalɛ noko anye ka aze a, bɛnzɛkye menli duma, bɛ nye gyi bɛ ti anwo, bɛdi nɔhalɛ wɔ debie biala anu. 12  Ɔwɔ kɛ asafo nu sonvolɛ aye yɛ kokye, ɔnea ɔ mra nee ye sua nu amra kpalɛ. 13  Bɛdabɛ mɔɔ bɛsonle kpalɛ la ɛlɛdie duma kpalɛ amaa bɛ nwo na bɛkola bɛtendɛ akɛnrasesebɛ zo wɔ diedi nu, wɔ Kelaese Gyisɛse anu. 14  Melɛkɛlɛ ɛhye mearɛlɛ wɔ, noko me nye la kɛ ɔnrɛhyɛ mebara ɛ nwo lɔ, 15  na saa mekyɛ a, wɔanwu kɛzi ɔwɔ kɛ ɛbɔ wɔ ɛbɛla wɔ Nyamenle sua nu, mɔɔ le tease Nyamenle ne asafo ne, nɔhalɛ ne pila nee ye adiabo la. 16  Nɔhalɛ nu, nyamenlezonlenlɛ kpalɛ nwo fealeranu edwɛkɛ nwuanzanwuanza ɛhye le kpole amgba: ‘Bɛlale ye ali wɔ nwonane nu, bɛbuale ye benle wɔ sunsum nu, ɔyele ɔ nwo ɔhilele anwumabɔvolɛma, bɛhanle ɔ nwo edwɛkɛ wɔ maanle maanle ne anu, ewiade amra liele ye lile, bɛliele ye anwuma wɔ anyunlunyia nu.’

Ɔbodwɛkɛ

Anzɛɛ “ɔze nrɛlɛbɛ.”
Anzɛɛ “ɔngulo konle.”
Anzɛɛ “ɔnle kɛ ɔyɛ awie mɔɔ rale asafo ne anu la ɛtɛkyɛle a.”
Anzɛɛ “amaa yeambɔ anyiemgba.”
Anzɛɛ “bɛnle mɛlɛbɛla.”