1 Pita 4:1-19

  • Bɛyɛ Nyamenle ɛhulolɛdeɛ kɛ Kelaese (1-6)

  • Ninyɛne kɔsɔɔti awieleɛ ɛbikye (7-11)

  • Nwu amaneɛ kɛ Kilisienenli (12-19)

4  Kɛmɔ Kelaese nwunle amaneɛ wɔ nwonane nu la ati, bɛdabɛ noko bɛva adwenle* ko ne ala bɛziezie bɛ nwo; ɔluakɛ awie mɔɔ ɛnwu amaneɛ wɔ nwonane nu la ɛhwe ɔ nwo ɛvi ɛtane nwo  amaa ye ngoane mekɛ mɔɔ ɛha wɔ nwonane nu la yeanva yeanyɛ mɔɔ menli kulo la, emomu yeava yeayɛ Nyamenle ɛhulolɛdeɛ.  Dɛba ne bɛvale mekɛ dɔɔnwo bɛyɛle mɔɔ maanle maanle ne kulo la, bɛvale bɛ nwo bɛwulale anyiemgba ɛbɛla,* atiakunluwɔzo ɛtane, nza dɔɔnwo ɛnlonlɛ, anyelielɛ mgbane mgbane, nzama agɔnwolɛvalɛ, nee awozonle ɛzonlenlɛ mɔɔ le kyibadeɛ la anu.  Kɛkala ɔsi bɛ nwo kɛ bɛ nee bɛ ɛngɔ zo ɛmbɔ ɛbɛla mgbane mgbane ɛhye mɔ la, yemɔti bɛtendɛ bɛtia bɛ.  Noko menli ɛhye mɔ babu mgbonda ahile ahenle mɔɔ ɛziezie ɔ nwo kɛ ɔbabua anyewɔzoamra nee mowuamra ndɛne la.  Ɛhye ati a bɛhanle edwɛkpa ne bɛhilele mowuamra noko a, na saa bɛbua bɛ ndɛne nwonane nu kɛ mɔɔ menli kpondɛ bɔbɔ la a, bɛadɛnla aze sunsum nu kɛ mɔɔ Nyamenle kpondɛ la.  Ninyɛne kɔsɔɔti awieleɛ ɛbikye. Yemɔti bɛmaa bɛ adwenle nu ɛla ɛkɛ, na bɛzinza* bɛyɛ asɔne.  Mɔɔ hyia kpalɛ la, bɛva ɛlɔlɛ mɔɔ anu yɛ se la bɛhulo bɛ nwo ngoko, ɔluakɛ ɛlɔlɛ keda ɛtane dɔɔnwo azo.  Bɛzonle bɛ nwo nyɛvolɛ mɔɔ adendɛbɛnzoabo biala ɛnle nu a. 10  Kɛzi awie ko biala ahyɛlɛdeɛ mɔɔ yenyia ye la de la, bɛva bɛzonle bɛ nwo ngoko kɛ Nyamenle ɛlolɛ ne mɔɔ bɛla ye ali wɔ ndenle ngakyile zo la anwo azonvolɛ kpalɛ. 11  Saa awie ka edwɛkɛ a, bɛmaa ɔha Nyamenle edwɛkɛ; saa awie sonle a bɛmaa ɔgyinla anwosesebɛ ne mɔɔ Nyamenle fa maa la azo ɔyɛ zɔ; amaa debie biala anu bɛalua Gyisɛse Kelaese anwo zo bɛawula Nyamenle anyunlunyia. Yemɔ a anyunlunyia nee anwosesebɛ le ye ɛdeɛ dahuu a. Amen. 12  Alɔvolɛ, bɛmmamaa sɔnea mɔɔ anu yɛ se kɛ senle mɔɔ bɛwɔ nu la si bɛ nwo, kɛ asɛɛ debie ɛzulolɛ bie ɛrado bɛ. 13  Emomu, bɛli fɛlɛko wɔ Kelaese amaneɛ ne mɔɔ bɛdabɛ noko bɛlɛnwu bie la anwo, amaa saa bɛye ye anyunlunyia ne noko bɛkile a bɛ nye alie na bɛali fɛlɛko kpole. 14  Saa Kelaese duma nu ti bɛbɔ bɛ aholoba a, bɛmaa bɛ nye ɛlie, ɔluakɛ anyunlunyia sunsum ne, mɔɔ le Nyamenle sunsum ne, wɔ bɛ nwo zo. 15  Noko bɛmmamaa bɛ nuhua biala nwu amaneɛ kɛ ɔle kodiawu anzɛɛ awule anzɛɛ ɛtanevolɛ anzɛɛ yeva ɔ nloa yedo awie edwɛkɛ nu. 16  Na saa awie nwu amaneɛ kɛ Kilisienenli a, ɔmmamaa ɔyɛ ye nyiane, emomu ɔhɔ zo ɔwula Nyamenle anyunlunyia wɔ mekɛ mɔɔ duma ɛhye la ɔ nwo zo la. 17  Ɔluakɛ mekɛ ɛdwu kɛ ndɛnebualɛ ne bɔ ɔ bo wɔ Nyamenle sua nu. Na saa ɔbɔ ɔ bo wɔ yɛ nwo zo a, ɛnee kɛzi ɔkɛwie ye wɔ bɛdabɛ mɔɔ bɛndie Nyamenle edwɛkpa ne la anwo zo ɛ? 18  “Na saa ɔyɛ se kɛ bɛkɛlie tenlenenli ngoane a, ɛnee duzu a bado amumuyɛnli nee ɛtanevolɛ a?” 19  Zɔhane ati, bɛmaa bɛdabɛ mɔɔ Nyamenle ɛhulolɛdeɛ ti bɛlɛnwu amaneɛ la ɛhɔ zo ɛva bɛ nwo* ɛdo Bɔvolɛ nɔhavo ne anwo zo wɔ mekɛ mɔɔ bɛlɛyɛ kpalɛ la.

Ɔbodwɛkɛ

Anzɛɛ “kpɔkɛzilɛ.”
Giliki, a·selʹgei·a. Nea Edwɛkɛbohilelɛ.
Anzɛɛ “bɛyɛ bɛ nye gyɛlɛmgbɛɛnye.”
Anzɛɛ “bɛ ɛkɛla.”