1 Kɔlentema 2:1-16

  • Pɔɔlo edwɛkɛhanlɛ wɔ Kɔlente (1-5)

  • Nyamenle nrɛlɛbɛ le kpole (6-10)

  • Sunsum nu sonla nee nwonane nu sonla (11-16)

2  Ɔti mediema, mekɛ mɔɔ membale bɛ nwo lɔ la, meanva edwɛkɛ mgbole anzɛɛ sonla nrɛlɛbɛ meanga Nyamenle fealeranu edwɛkɛ nwuanzanwuanza ne meangile bɛ.  Na membɔle kpɔkɛ kɛ mebahwe bɛ adwenle meahɔ Gyisɛse Kelaese nee baka ne azo mɔɔ bɛhunle ye la azo ala.  Na menvale bɛtɛɛyɛlɛ nee ɛzulolɛ nee anwowozolɛ kpole a membale bɛ nwo ɛkɛ a;  na meanva sonla nrɛlɛbɛ nee edwɛkɛ mɔɔ bɛfa bɛbɛlɛbɛla la a menganle edwɛkɛ ne a, emomu me edwɛkɛ ne lale sunsum ne tumi ne ali,  amaa bɛ diedi ne angyinla sonla nrɛlɛbɛ zo, emomu yeagyinla Nyamenle tumi ne azo.  Na yɛbɔ nrɛlɛbɛ nolo yɛkile menli mɔɔ ɛnyi wɔ sunsum nu la, noko tɛ ewiade ɛhye anu nrɛlɛbɛ anzɛɛ ewiade tumivolɛma mɔɔ bɛbaye bɛ bɛavi ɛkɛ ne la ɛdeɛ ne ɔ.  Emomu, yɛka Nyamenle nrɛlɛbɛ mɔɔ wɔ fealeranu edwɛkɛ nwuanzanwuanza bie anu, nrɛlɛbɛ ne mɔɔ vea, mɔɔ Nyamenle vale ziele ɛkɛ ne kolaa na yeabɔ ewiade kɛ ɔbava yeawula yɛ anyunlunyia la yɛkile.  Nrɛlɛbɛ ɛhye, ewiade tumivolɛma anu biala annwu ye, ɔluakɛ saa bɛnwunle ye a anrɛɛ bɛangu anyunlunyia Awulae ne.*  Bɛhɛlɛ kɛ: “Ninyɛne mɔɔ Nyamenle ɛziezie ɛmaa bɛdabɛ mɔɔ bɛkulo ye la, ɛnyelɛ ɛtɛnwunle ye yɛɛ ɛnzolɛ ɛtɛtele yɛɛ awie biala ɛtɛdwenlenle nwolɛ.” 10  Na yɛdayɛ a Nyamenle ɛlua ye sunsum ne azo ɛye ɛhile yɛ a, ɔluakɛ sunsum ne neɛnlea ninyɛne kɔsɔɔti anu, bɔbɔ Nyamenle ninyɛne mɔɔ anu le kuloonwu la. 11  Na sonla boni a kɛhola kɛnwu awie ninyɛne nu kɛ sonla mumua ne sunsum* ne mɔɔ wɔ ye nu la ɛ? Zɔhane ala a awie biala ɛnze Nyamenle ninyɛne nu kɛ Nyamenle sunsum ne ala a. 12  Na tɛ ewiade sunsum a yɛnyianle a, emomu sunsum ne mɔɔ vi Nyamenle ɛkɛ la, amaa yɛahola yɛanwu ninyɛne mɔɔ Nyamenle ɛva ɛlo yɛ la. 13  Yɛka ninyɛne ɛhye mɔ anwo edwɛkɛ noko yɛnva sonla nrɛlɛbɛ yɛnga, emomu mɔɔ sunsum ne kilehile la a yɛka a, na yɛfa sunsum nu edwɛkɛ yɛkilehile sunsum nu ninyɛne nu. 14  Na sonla mɔɔ di ye atiakunluwɔzo nzi la ɛnlie Nyamenle sunsum ne ɛndo nu, na ɔle ngoaseasɛm ɔmaa ye; yɛɛ ɔnrɛnwu bɛ, ɔluakɛ bɛfa sunsum a bɛneɛnlea nu a. 15  Noko, sonla mɔɔ Nyamenle sunsum ne kile ye adenle la neɛnlea ninyɛne kɔsɔɔti anu, na yemɔ awie biala ɛnneɛnlea ye nu. 16  Na “nwane a ɛnwu Gyihova* adwenle mɔɔ ɔbahola yeahilehile ye a?” Noko yɛmɛ, yɛlɛ Kelaese adwenle.

Ɔbodwɛkɛ

Anzɛɛ “anrɛɛ bɛangu ye wɔ baka zo.”
Anzɛɛ “ye ahonle.”
Nea Edwɛkɛbohilelɛ.