1 Kɔlentema 16:1-24

  • Ndoboa maa Gyɛlusalɛm Kilisienema (1-4)

  • Pɔɔlo adendulɛ nwo ngyehyɛleɛ (5-9)

  • Timote nee Apɔlɔso ɛkpɔlalɛ nwo ngyehyɛleɛ (10-12)

  • Folɛdulɛ nee ahyebizalɛ (13-24)

16  Akee mɔɔ fale ndoboa mɔɔ bɛdielie bɛmaa nwuanzanwuanzama ne anwo la, bɛli adehilelɛ mɔɔ menvale memaanle Galeehyea asafo ne mɔ la azo.  Dapɛne biala kenle mɔɔ limoa la, ɔwɔ kɛ bɛ nuhua ko biala ye mɔɔ yenyia ye la bie to ahane, amaa saa meba a bɛanlielie ndoboa.  Na saa meba a, mrenyia mɔɔ bɛhɛlɛle kɛlata kɛ bɛlie bɛ bɛdo nu la, mebazoa bɛ meamaa bɛava bɛ ahyɛlɛdeɛ ne bɛahɔ Gyɛlusalɛm.  Na saa ɔfɛta kɛ mekɔ ɛkɛ ne noko a, bɛ nee me ahɔ.  Noko saa mekɔfa Masidonea a, mebara bɛ nwo ɛkɛ, ɔluakɛ mebava Masidonea;  na bie a mebali mekɛ ekyi anzɛɛ fɔsɛlɛ ne bɔbɔ wɔ ɛkɛ, amaa bɛahɔzɔho me ekyii na meahɔ ɛleka mɔɔ mekɔ la.  Na mengulo kɛ menwu bɛ ala a ɛnee me gyakɛ gyi adenle zo, saa Gyihova* maa adenle a, me nye la kɛ me nee bɛ badɛnla ahyɛ ekyii.  Noko mebadɛnla Ɛfɛsɛse ɛke kɔkpula kɛ Pɛntekɔso Ɛvoyia ne kɛdwu,  ɔluakɛ gyima kpole bie anwo adenle* ɛbuke ɛmaa me noko dwazotiama dɔɔnwo wɔ ɛkɛ. 10  Saa Timote ba a, bɛnlea na ye ahonle andu wɔ mekɛ mɔɔ ɔwɔ bɛ nwo ɛkɛ ne la, ɔluakɛ ɔlɛyɛ Gyihova* gyima ne kɛ mɔɔ melɛyɛ ye la. 11  Yemɔti awie biala mmabu ye kɛ ɔle kakula. Bɛgyakyi ye adenle wɔ anzodwolɛ nu amaa yeara me nwo ɛke, ɔluakɛ me nee mediema ne mɔ ɛlɛkendɛ ye. 12  Akee mɔɔ fale yɛ diema Apɔlɔso anwo la, menzɛlɛle ye ɛsesebɛ kɛ ɔ nee mediema ne mɔ ɛrɛla bɛ nwo lɔ. Ɔtɛyɛle ye adwenle kɛ ɔba kɛkala, noko saa ɔnyia adenle a ɔbara. 13  Bɛzinza, bɛgyinla kpundii wɔ diedi ne anu, bɛnyia akɛnrasesebɛ, bɛmaa bɛ nwo ɛyɛ se. 14  Bɛva ɛlɔlɛ bɛyɛ debie biala mɔɔ bɛyɛ la. 15  Mediema, akee metu bɛ folɛ: Bɛze kɛ Setɛfanase sua nu amra a le ɛdoavolɛma mɔɔ limoa wɔ Akaya a, na bɛdu bɛ nwo bɛmaa kɛ bɛkɛzonle nwuanzanwuanzama ne. 16  Bɛbɛlɛ bɛ nwo aze bɛmaa menli mɔɔ le zɛhae nee bɛdabɛ kɔsɔɔti mɔɔ bɛ nee bɛ yɛ gyima na bɛbɔ mɔdenle la. 17  Noko me nye ɛlie Setɛfanase nee Fɔtunatɛse nee Akeeyaekɛse ɛralɛ ne anwo, ɔluakɛ bɛnle ɛke la bɛboale me kpole. 18  Na bɛmaa me nye ɛlie kɛ mɔɔ bɛ nye liele la. Yemɔti bɛli menli zɛhae mɔ eni. 19  Asafo ne mɔ mɔɔ wɔ Ehyea la biza bɛ. Akoyela nee Pelesela nee asafo ne mɔɔ wɔ bɛ sua nu ɛkɛ la biza bɛ kpalɛ kpalɛ wɔ Awulae anu. 20  Mediema ne mɔ amuala biza bɛ. Bɛva bɛ nloa anwo ɛvolɛ nwuanzanwuanza bɛbizebiza bɛ nwo ahye. 21  Medame Pɔɔlo, mebiza bɛ, me sa anloa ɛne. 22  Saa awie ɛngulo Awulae a, munzule ɛha ye. O yɛ Awulae, bɛla! 23  Awulae Gyisɛse ɛlolɛ ne nee bɛ ɛdɛnla. 24  Me ɛlɔlɛ nee bɛ muala mɔɔ bɛle Kelaese Gyisɛse ɛdoavolɛma la ɛdɛnla.

Ɔbodwɛkɛ

Nea Edwɛkɛbohilelɛ.
Anzɛɛ “anlenkɛ.”
Nea Edwɛkɛbohilelɛ.