1 Kɔlentema 15:1-58

  • Kelaese ewudwazo ne (1-11)

  • Ewudwazo le diedi nwo ngyinlazo (12-19)

  • Kelaese ewudwazo ne di agyinlanu (20-34)

  • Nwonane nu sonlabaka, sunsum nu sonlabaka (35-49)

  • Mɔɔ ɛnwu nee mɔɔ ɛmkpɔlɔ ɛlɛ (50-57)

  • Bɛyɛ dɔɔnwo wɔ Awulae gyima ne anu (58)

15  Mediema, akee mekakye bɛ edwɛkpa ne mɔɔ menganle mengilele bɛ, na bɛliele bɛdole nu, na bɛzɔ nu kpundii la.  Eza bɛlua edwɛkpa ne mɔɔ menganle mengilele bɛ la azo bɛlɛdie bɛ ngoane, saa bɛsɔ nu kpundii a, kyesɛ bie a bɛrayɛle diedima mgbane.  Na edwɛkɛ mɔɔ limoa mɔɔ medame noko menyianle mɔɔ menvale memaanle bɛ la a le kɛ yɛ ɛtane ti a Kelaese wule a, kɛ mɔɔ Ngɛlɛlera ne kile la;  na bɛziele ye, na ye kenle nsa ne azo bɛdwazole ye kɛ mɔɔ Ngɛlɛlera ne kile la;  na ɔyele ɔ nwo ɔhilele Sifase,* yɛɛ akee Bulu Nee Nwiɔ ne.  Ɛhye anzi ɔyele ɔ nwo ɔhilele mediema mɔɔ bo 500 wɔ mekɛ ko anu, na bɛ nuhua dɔɔnwo tɛte aze, bie mɔ ɛwu* bɔbɔ ɛdeɛ.  Akee ɔyele ɔ nwo ɔhilele Gyemise yɛɛ ɛzoanvolɛma ne amuala.  Awieleɛ ne, ɔyele ɔ nwo ɔhilele medame noko mɔɔ mele kɛ awie mɔɔ ye mekɛ andwu na bɛawo ye la.  Na medame a mele ekyi kpalɛ wɔ ɛzoanvolɛma ne anu a, na menfɛta kɛ bɛkɛvɛlɛ me ɛzoanvolɛ ɔluakɛ menyɛle Nyamenle asafo ne kpɔdekpɔde. 10  Noko ɔlua Nyamenle ɛlolɛ ne azo mele kɛ mɔɔ mede la. Na ye ɛlolɛ ne mɔɔ ɔvale ɔlole me la anyɛ mgbane, emomu meyɛ gyima medɛla bɛ muala; noko tɛ medame ɔ, na Nyamenle ɛlolɛ ne mɔɔ wɔ me nwo zo la ɔ. 11  Ɛhye ati saa medame o, anzɛɛ bɛdabɛ o, edwɛkɛ ko ne ala a yɛ muala yɛka a, yɛɛ yemɔ ala a bɛlie bɛli a. 12  Akee saa yɛlɛka kɛ bɛdwazo Kelaese bɛvi mowuamra anu a, kɛ ɔyɛ mɔɔ bɛ nuhua bie mɔ se bɛnrɛdwazo mowuamra ɛ? 13  Nɔhalɛ nu, saa bɛnrɛdwazo mowuamra a, ɛnee noko bɛandwazo Kelaese. 14  Na saa bɛtɛdwazole Kelaese a, ɛnee yɛ edwɛkɛhanlɛ ne le mgbane, yɛɛ bɛ diedi ne noko le mgbane. 15  Eza noko bɛbanwu yɛ kɛ yɛdi Nyamenle anwo daselɛ adalɛ, ɔluakɛ yɛli Nyamenle anwo daselɛ kɛ yedwazo Kelaese, mɔɔ saa bɛnrɛdwazo mowuamra a ɛnee ɔkile kɛ yeandwazo ye la. 16  Na saa bɛnrɛdwazo mowuamra a, ɛnee noko bɛtɛdwazole Kelaese. 17  Eza saa bɛtɛdwazole Kelaese a ɛnee bɛ diedi ne le mgbane; na bɛtɛte bɛ ɛtane ne mɔ anu. 18  Eza noko bɛdabɛ mɔɔ bɛwu kɛ Kelaese ɛdoavolɛma la ɛminli bɔkɔɔ. 19  Saa ngoane ɛhye anu ala a yɛnyia anyelazo wɔ Kelaese anu a, ɛnee noko yɛyɛ anwunvɔne kpole yɛtɛla awie biala. 20  Noko kɛkala, bɛdwazo Kelaese bɛvi mowuamra anu kɛ bɛdabɛ mɔɔ bɛwu la anu ma mɔɔ limoa. 21  Na kɛ mɔɔ ewule luale sonla ko anwo zo a rale la, zɔhane ala a ewudwazo ɛlua sonla ko anwo zo ɛra a. 22  Na kɛ mɔɔ Adam ati menli kɔsɔɔti wu la, zɔhane ala a Kelaese ati menli kɔsɔɔti banyia ngoane a. 23  Noko awie biala ɛdeɛ bayɛ ye mekɛ nloa: Kelaese a le ma mɔɔ limoa a, ɛhye anzi bɛdabɛ mɔɔ bɛle Kelaese ɛdeɛ la wɔ ye ɛralɛ ne anu. 24  Akee awieleɛ ne, ɔbava Belemgbunlililɛ ne yeamaa ye Nyamenle nee ɔ Ze ne, wɔ mekɛ mɔɔ yezɛkye arane nee tumi kɔsɔɔti la. 25  Na ɔwɔ kɛ ɔdi belemgbunli kɔkpula kɛ Nyamenle kɛva agbɔvolɛ kɔsɔɔti kɛwula ɔ gyakɛ abo la. 26  Na kpɔvolɛ mɔɔ li amozi mɔɔ ɔbazɛkye ye la a le ewule. 27  Na Nyamenle “ɛva ninyɛne kɔsɔɔti ɛwula ɔ gyakɛ abo.” Noko saa ɔka kɛ ‘bɛva ninyɛne kɔsɔɔti bɛwula ɔ gyakɛ abo a,’ ɔda ali kɛ Mɔɔ vale ninyɛne kɔsɔɔti wulale ɔ gyakɛ abo la ɛmboka nwo. 28  Na saa bɛfa ninyɛne kɔsɔɔti bɛwula ɔ gyakɛ abo a, akee Ralɛ ne noko bava ɔ nwo awula Mɔɔ vale ninyɛne kɔsɔɔti wulale ɔ gyakɛ abo la abo, na Nyamenle ali ninyɛne kɔsɔɔti azo tumi. 29  Saa tɛ ye zɔhane a, ɛnee duzu a bɛdabɛ mɔɔ bɛlɛsɔne bɛ bɛahɔ ewule nu la bayɛ ɛ? Saa bɛnrɛdwazo mowuamra fee a, ɛnee kɛmɔti a bɛsɔne bɛ bɛkɔ ewule nu ɛ? 30  Kɛmɔti a yɛdayɛ noko yɛwɔ esiane nu dɔnehwele* biala ɛ? 31  Dahuu ewule sianle me. Mediema, mefa fɛlɛko mɔɔ medi ye bɛ nwo wɔ yɛ Awulae Kelaese Gyisɛse anu la meazi zolɛ. 32  Saa me nee nane anwo ɛzulolɛ ɛho kɛ mɔɔ menli yɛ ye wɔ Ɛfɛsɛse la a, ɛnee duzu nvasoɛ a menyia ye a? Saa bɛnrɛdwazo mowuamra a, ɛnee “bɛmaa yɛli na yɛnlo, ɔluakɛ ɛhyema ɛnee yɛwu.” 33  Bɛmmamaa bɛbɛlɛbɛla bɛ. Agɔnwolɛ ɛtane sɛkye ɛbɛla* kpalɛ. 34  Bɛmaa bɛ nye ɛla ɛkɛ na bɛyɛ mɔɔ le kpalɛ la na bɛmmayɛ ɛtane, ɔluakɛ bɛ nuhua bie mɔ ɛnlɛ Nyamenle anwo nɔhalɛ ndelebɛbo. Melɛka ɛhye meamaa bɛabɔ anyiemgba. 35  Noko akee, awie baha kɛ: “Kɛzi bɛbadwazo mowuamra ɛ? Sonlabaka boni a bɛbava bɛara a?” 36  Sonla mɔɔ ɛnlɛ adwenle a! Mɔɔ ɛdua la ɛnnyia ngoane kyesɛ ɔdimoa ɔkpɔlɔ.* 37  Na mɔɔ ɛdua la, tɛ yemɔ a le baka ne mɔɔ bafifi la, ɛdua ma ne ala, bie a hwiiti anzɛɛ ma gyɛne bie; 38  noko Nyamenle maa ɔyɛ baka kɛ mɔɔ ɔkulo la, na ɔmaa ma ko biala nyia ɔ ti anwo baka. 39  Nwonane kɔsɔɔti ɛnle ko, asolo sonla nwonane, asolo nane nwonane, asolo nloma nwonane, yɛɛ asolo fɛlɛ nwonane. 40  Na anwomanyunlu abɔdeɛ wɔ ɛkɛ yɛɛ azɛlɛ ye azo abɔdeɛ wɔ ɛkɛ; noko asolo anwomanyunlu abɔdeɛ anyunlunyia yɛɛ asolo azɛlɛ ye azo abɔdeɛ noko ɛdeɛ. 41  Asolo sɛnzɛne ne anyunlunyia yɛɛ asolo siane ne anyunlunyia, yɛɛ asolo nwɔlɔra ne mɔ anyunlunyia; na nwɔlɔra bɔbɔ, asolo ko biala anyunlunyia. 42  Zɔhane ala a mowuamra ɛdwazolɛ ne de a. Mɔɔ bɛdua la kpɔlɔ; mɔɔ bɛdwazo ye la ɛmkpɔlɔ. 43  Bɛdua ye anyiemgba nu; bɛdwazo ye anyunlunyia nu. Bɛdua ye bɛtɛɛyɛlɛ nu; bɛdwazo ye tumi nu. 44  Bɛdua ye nwonane nu sonlabaka; bɛdwazo ye sunsum nu sonlabaka. Saa nwonane nu sonlabaka wɔ ɛkɛ a, ɛnee sunsum nu sonlabaka noko wɔ ɛkɛ. 45  Yemɔti bɛhɛlɛ kɛ: “Adam ne mɔɔ limoa la rayɛle sonla* mɔɔ de aze.” Adam ne mɔɔ li amozi la rayɛle sunsum mɔɔ maa ngoane. 46  Noko tɛ sunsum nu ɛdeɛ ne a limoa a. Nwonane nu ɛdeɛ ne a limoa a, na akee sunsum nu ɛdeɛ ne adoa ye. 47  Sonla ne mɔɔ limoa la vi azɛlɛ ye azo yɛɛ bɛvale ndɛtɛlɛ a bɛbɔle ye a; sonla ne mɔɔ tɔ zo nwiɔ la vi anwuma. 48  Kɛ mɔɔ sonla ne mɔɔ bɛvale ndɛtɛlɛ bɛbɔle ye la de la, zɔhane ala a menli mɔɔ wɔ azɛlɛ ye azo la de a; na bɛdabɛ mɔɔ bɛwɔ anwuma la le kɛ mɔɔ vi anwuma rale la. 49  Na kɛ mɔɔ yɛle mɔɔ bɛvale ndɛtɛlɛ bɛbɔle ye la ɛsaso la, zɔhane ala a yɛbayɛ mɔɔ vi anwuma la ɛsaso a. 50  Noko mediema, meka meahile bɛ kɛ nwonane nee mogya ɛnrɛhola ɛnrɛnyia Nyamenle Belemgbunlililɛ ne, yɛɛ mɔɔ kpɔlɔ la ɛnrɛnyia mɔɔ ɛmkpɔlɔ la. 51  Nea! meka fealeranu edwɛkɛ nwuanzanwuanza bie meahile bɛ: Yɛ muala yɛnrɛla wɔ ewule nu, emomu yɛ muala yɛbahakyi, 52  ndɛndɛ ne ala, bɛkabɔ bɛ nye bɛade la, wɔ aweɛne tendenle ne mɔɔ li amozi la anu. Ɔluakɛ aweɛne ne babɔ, na bɛbadwazo mowuamra kɛ menli mɔɔ ɛmkpɔlɔ la, na yɛbahakyi. 53  Na mɔɔ kpɔlɔ la kakyi yɛ mɔɔ ɛmkpɔlɔ, na mɔɔ wu la kakyi yɛ mɔɔ ɛnnwu ɛlɛ. 54  Na saa mɔɔ kpɔlɔ la kakyi yɛ mɔɔ ɛmkpɔlɔ, na mɔɔ wu la kakyi yɛ mɔɔ ɛnnwu ɛlɛ la a, akee edwɛkɛ ne mɔɔ bɛhɛlɛ la bara nu kɛ: “Bɛme ewule bɔkɔɔ.” 55  “Ewule, wɔ konimlilɛ ne wɔ ni? Ewule, wɔ bɔlɔ ne wɔ ni?” 56  Bɔlɔ ne mɔɔ fa ewule ba la a le ɛtane, yɛɛ ɛtane tumi a le Mɛla ne.* 57  Noko yɛyɛ Nyamenle mo kɛ ɔdua yɛ Awulae Gyisɛse Kelaese anwo zo ɔmaa yɛdi konim a! 58  Yemɔti me mediema alɔvolɛ, bɛgyinla kpundii, bɛzi pi, dahuu bɛyɛ dɔɔnwo wɔ Awulae gyima ne anu, na bɛnwu ye kɛ Awulae ati bɛ ɛvɛlɛ ɛnrɛyɛ gyɛne.

Ɔbodwɛkɛ

Eza bɛfɛlɛ ye Pita.
Giliki aneɛ nu, “ɛla wɔ ewule nu.”
Anzɛɛ “mekɛ.”
Anzɛɛ “subane.”
Giliki aneɛ nu, “ɔwu.”
Anzɛɛ “ɛkɛla.”
Anzɛɛ “yɛɛ Mɛla ne maa ɛtane nyia tumi.”