Ɛfɛsɛsema 1:1-23

  • Ahyebizalɛ (1, 2)

  • Sunsum nu nyilalɛ (3-7)

  • Ninyɛne kɔsɔɔti wɔ Kelaese anu (8-14)

    • “Ɔbali ninyɛne nwo gyima” wɔ ye mekɛ nloa (10)

    • Sunsum ne mɔɔ di “agyinlanu” la ɛzɔ bɛ nloa (13, 14)

  • Pɔɔlo yɛ Nyamenle mo wɔ Ɛfɛsɛsema diedi nwo na ɔyɛ asɔne ɔmaa bɛ (15-23)

1  Pɔɔlo, mɔɔ ɔlua Nyamenle ɛhulolɛ zo yeyɛ Kelaese Gyisɛse ɛzoanvolɛ la ɛlɛkɛlɛ ahɔmaa nwuanzanwuanzama mɔɔ wɔ Ɛfɛsɛse na bɛdi nɔhalɛ wɔ Kelaese Gyisɛse anu la:  Yɛ Ze Nyamenle nee Awulae Gyisɛse Kelaese ɛlo bɛ na ɔmaa bɛ anzodwolɛ.  Ayɛlɛyelɛ ɛha Nyamenle mɔɔ le yɛ Awulae Gyisɛse Kelaese ɔ Ze ne la, ɔluakɛ yeva sunsum nu nyilalɛ muala yeyila yɛ wɔ Kelaese anu wɔ anwuma,  kɛ mɔɔ ɔkpale yɛ kɛ yɛ nee Kelaese ɛyɛ ko kolaa na yeabɔ ewiade, kɛ yɛla ɛlɔlɛ ali na yɛ nwo ɛde mɔɔ nvonleɛ biala ɛnle yɛ nwo wɔ ɔ nyunlu la.  Na ɔlimoale ɔkpale yɛ kɛ ɔdua Gyisɛse Kelaese anwo zo yeava yɛ yeayɛ ɔ mra, kɛ mɔɔ ɔkulo na ɔsɔ ɔ nye la,  amaa yeayɛ ayɛlɛyelɛ yeamaa ye anyunlunyia ɛlolɛ ne mɔɔ ɔluale ye kulovolɛ ne anwo zo ɔvale ɔlole yɛ la.  Ɔlua ɔ nwo zo bɛlie yɛ wɔ ye mogya ne anu, ɛhɛe, bɛva yɛ ɛtane bɛhyɛ yɛ kɛ mɔɔ ye ɛlolɛ kpole ne de la.  Nyamenle maanle yɛnyianle ɛlolɛ ɛhye dɔɔnwo wɔ nrɛlɛbɛ nee ndelebɛbo* muala anu  na ɔmaanle yɛnwunle ye ɛhulolɛdeɛ nwo fealeranu edwɛkɛ nwuanzanwuanza ne. Yemɔ a sɔ ɔ nye kɛ mɔɔ ye bodane ne de la 10  kɛ mekɛ ne dwu a ɔbali ninyɛne nwo gyima, yeaboɔboa ninyɛne kɔsɔɔti anloa wɔ Kelaese anu, ninyɛne mɔɔ wɔ anwuma nee ninyɛne mɔɔ wɔ azɛlɛ ye azo la. Ɛhɛe, wɔ ye nu 11  ahenle mɔɔ yɛ nee ye le ko la anu a bɛyɛ yɛ koliagyama a, kɛ mɔɔ ahenle mɔɔ yɛ debie biala maa ɔ nee ye bodane yɛ ko la limoale kpale yɛ kɛ mɔɔ ye ɛhulolɛ ne de la, 12  amaa yɛdayɛ mɔɔ yɛlimoale yɛnyianle anyelazo wɔ Kelaese anu la, yɛaye ye ayɛlɛ na yɛawula ye anyunlunyia. 13  Bɛdabɛ noko, mekɛ mɔɔ bɛdele nɔhalɛ ne, bɛ ngoanelielɛ nwo edwɛkpa ne la, bɛnyianle ye nu anyelazo. Mɔɔ bɛliele bɛlile la, ɔluale ɔ nwo zo ɔvale sunsum nwuanzanwuanza ne mɔɔ ɔvale ɔbɔle ɛwɔkɛ la ɔzɔle bɛ nloa, 14  mɔɔ di agyinlanu* kɛ yɛbanyia agyapadeɛ, mɔɔ ye bodane a le kɛ bɛbalie Nyamenle menli bɛava bɛaye ye anyunlunyia ne ayɛlɛ. 15  Ɛhye ati a medame noko mekɛ mɔɔ mendele diedi mɔɔ bɛlɛ ye wɔ Awulae Gyisɛse anu nee ɛlɔlɛ mɔɔ bɛda ye ali bɛkile nwuanzanwuanzama ne amuala la, 16  meangyakyi kɛ mebayɛ bɛ mo wɔ nwo a. Dahuu mebɔ bɛ duma wɔ me asɔneyɛlɛ nu, 17  kɛ yɛ Awulae Gyisɛse Kelaese Nyamenle ne, anyunlunyia Selɛ ne, ɛmaa bɛ nrɛlɛbɛ sunsum na ɔboa bɛ ɔmaa bɛde ninyɛne mɔɔ ɔye ɔkile la abo wɔ mekɛ mɔɔ bɛlɛnyia ɔ nwo nɔhalɛ ndelebɛbo la. 18  Yebuke bɛ ahonle ne mɔ anye wienyi, amaa bɛanwu anyelazo ne mɔɔ ɔvɛlɛle bɛ ɔrale nu, anyunlunyia anwonyia ne mɔɔ ɔbava yeamaa nwuanzanwuanzama ne kɛ agyapadeɛ la, 19  tumi kpole ɛhye mɔɔ ɔfa ɔmaa yɛdayɛ diedima la da ali wɔ kɛzi ɔfa ye anwosesebɛ bedevinli ne ɔdi gyima la anu, 20  mɔɔ ɔvale ɔlile gyima wɔ mekɛ mɔɔ ɔdwazole Kelaese ɔvile mowuamra anu ɔmaanle ɔdɛnlanle ɔ sa fema zo wɔ anwuma, 21  ɛleka mɔɔ tɛla arane nee tumivolɛma nee anwosesebɛ nee mgbolema nee duma biala la, tɛ ewiade ɛhye* anu angome na mɔɔ ɛlɛba la noko anu. 22  Eza ɔvale ninyɛne kɔsɔɔti ɔwulale ɔ gyakɛ abo na ɔmaanle ɔnleanle debie biala azo wɔ asafo ne anu, 23  yemɔ a le ye sonlabaka ne, mɔɔ ye subane da ali wɔ nu na ɔmaa debie biala di munli la.

Ɔbodwɛkɛ

Anzɛɛ “adwenle kpalɛ.”
Anzɛɛ “to ɔ bo (ezukoa); si mɔɔ bara la azo (awoba).”
Anzɛɛ “mekɛ ɛhye.” Nea Edwɛkɛbohilelɛ.