Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 18

Yɛ Nyamenle Agɔnwo Dahuu!

Yɛ Nyamenle Agɔnwo Dahuu!

Ɔhyia mɔdenlebɔlɛ na awie anyia agɔnwolɛ; ɔhyia mɔdenlebɔlɛ na awie agɔnwolɛ ahyɛ. Mɔdenle mɔɔ ɛbɔ kɛ ɛbayɛ Nyamenle agɔnwo dahuu la bamaa wɔanyia nyilalɛ dɔɔnwo. Gyisɛse hanle hilele menli mɔɔ liele ye lile la kɛ: “Nɔhalɛ ne bamaa bɛanyia fanwodi.” (Dwɔn 8:32) Duzu a ɛhye kile a?

Ɛbahola wɔanyia fanwodi kɛkala. Ɛ nwo badɔ wɔ avi Seetan adalɛ edwɛkɛ nee ngilehilelɛ mɔɔ ɛbu zo la anwo. Ɛ nwo badɔ wɔ, ɛnrɛyɛ kɛ menli mgbe dɔɔnwo mɔɔ bɛnlɛ anyelazo ɔluakɛ bɛnze Gyihova la ati. (Wulomuma 8:22) Nyamenle agɔnwo mɔ ɛnzulo “ewule.”​—Hibuluma 2:14, 15.

Ɛbahola wɔanyia fanwodi wɔ Nyamenle ewiade fofolɛ ne anu. Nea fanwodi mɔɔ yɛ nwanwane mɔɔ ɛbahola wɔanyia ye kenle bie a! Wɔ Paladaese azɛlɛ ne azo, yɛbanyia fanwodi yɛavi konle, anwodolɛ nee ɛtaneyɛlɛ sa nu. Yɛbanyia fanwodi yɛavi ehyia nee ɛhɔne sa nu. Yɛbanyia fanwodi yɛavi ɛrelera ɛyɛlɛ nee ewule nwo. Yɛbanyia fanwodi yɛavi ɛzulolɛ, nzisi, nee mgbɔvodɛne nwo. Baebolo ne ka ye wɔ Nyamenle anwo kɛ: “Ɛbuke ɛ sa nu, ɛmaa tease abɔdeɛ biala akunlu dwo ɔ nwo.”​—Edwɛndolɛ 145:16.

 Nyamenle agɔnwo mɔ badɛnla aze dahuu. Dahuu ngoane le ahyɛlɛdeɛ mɔɔ sonle bolɛ mɔɔ Nyamenle bava amaa bɛdabɛ mɔɔ bɛkpondɛ kɛ bɛfa ye agɔnwolɛ la amuala a. (Wulomuma 6:23) Wɔmɔ suzu mɔɔ dahuu ngoane bahile amaa wɔ la anwo nea!

Ɛbanyia mekɛ wɔayɛ ninyɛne dɔɔnwo. Bie a ɛbahulo kɛ ɛsukoa kɛzi bɛfa debie mɔɔ bɛfa bɛbɔ edwɛne la bɛbɔ edwɛne. Anzɛɛ ɛbahulo kɛ ɛbazukoa nvoninli ɛdɔlɔlɛ anzɛɛ ɛkɛyɛ kapentanli. Bie a ɛbahulo kɛ ɛbazukoa nane nane anzɛɛ mbaka nwo debie. Anzɛɛ bie a ɛkpondɛ kɛ ɛtudu adenle amaa wɔanwu menli ngakyile nee maanle ngakyile. Dahuu ngoane mɔɔ ɛbanyia la bamaa wɔahola wɔayɛ ɛhye mɔ amuala kɔsɔɔti!

Ɛbanyia mekɛ wɔava agɔnwolɛ dɔɔnwo. Aze mɔɔ ɛbadɛnla ye dahuu la bamaa wɔanwu menli gyɛne dɔɔnwo mɔɔ ɛrayɛ Nyamenle agɔnwo mɔ la. Ɛbanwu bɛ ɛlolɛ ahyɛlɛdeɛ nee bɛ subane mgbalɛ, na bɛbayɛ ɛ gɔnwo mɔ noko. Ɛbahulo bɛ edwɛkɛ na bɛdabɛ bɛahulo wɔ edwɛkɛ. (1 Kɔlentema 13:8) Dahuu ngoane mɔɔ ɛbanyia la bamaa wɔanyia mekɛ wɔava awie biala mɔɔ wɔ azɛlɛ ne azo la agɔnwolɛ! Mɔɔ tɛla biala la, ɛ nee Gyihova agɔnwolɛvalɛ ne anu bayɛ se mekɛ mɔɔ ɛvoya ne mɔ ɛlɛse la. Ɔrɛla ye kɛ ɛbayɛ Nyamenle agɔnwo dahuu!