Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 10

Kɛ Ɔkɛyɛ Na Wɔanwu Nɔhalɛ Ɛzonlenlɛ Ne La

Kɛ Ɔkɛyɛ Na Wɔanwu Nɔhalɛ Ɛzonlenlɛ Ne La

Saa ɛkulo kɛ ɛyɛ Nyamenle agɔnwo a, ɔwɔ kɛ ɛsonle ye wɔ adenle mɔɔ ɔdie ɔto nu la azo. Gyisɛse hanle kɛ “nɔhalɛ azonvolɛ” bazonle Nyamenle wɔ “nɔhalɛ nu.” (Dwɔn 4:23, 24) Adenle kpalɛ kokye a wɔ ɛkɛ ne mɔɔ bɛdua zo bɛsonle Nyamenle a. (Ɛfɛsɛsema 4:4-6) Nɔhalɛ ɛzonlenlɛ kɔ dahuu ngoane nu, yɛɛ adalɛ ɛzonlenlɛ kɔ ɛzɛkyelɛ nu.​—Mateyu 7:13, 14.

Ɛbahola wɔanwu nɔhalɛ ɛzonlenlɛ ɔlua menli mɔɔ wɔ nu mɔɔ ɛbanlea bɛ nyɛleɛ la azo. Kɛmɔ Gyihova le kpalɛ la ati, ɔwɔ kɛ ye nɔhalɛ azonvolɛ yɛ menli mgbalɛ. Kɛ mɔɔ akutue baka kpalɛ so ma kpalɛ la, zɔhane ala a nɔhalɛ ɛzonlenlɛ ne maa yɛnyia menli mgbalɛ a.​—Mateyu 7:15-20.

Gyihova agɔnwo mɔ lɛ ɛbulɛ kpole maa Baebolo ne. Bɛze kɛ Baebolo ne vi Nyamenle ɛkɛ. Bɛfa mɔɔ ɔka la bɛbɔ bɛ ɛbɛla, bɛfa bɛdi bɛ ngyegyelɛ nwo gyima, na bɛdua zo bɛsukoa Nyamenle anwo debie. (2 Timote 3:16) Bɛbɔ mɔdenle bɛyɛ mɔɔ bɛka la.

 Gyihova agɔnwo mɔ kulo bɛ nwo. Gyisɛse hilehilele menli Nyamenle anwo debie, ɔyɛle bɛdabɛ mɔɔ bɛnde kpɔkɛ la ayile ɔhilele kɛ ɔkulo menli. Bɛdabɛ mɔɔ bɛwɔ nɔhalɛ ɛzonlenlɛ nu la noko lɛ ɛlɔlɛ maa menli gyɛne. Kɛ mɔɔ Gyisɛse yɛle ye la, bɛndwenle kɛ bɛle kpalɛ bɛtɛla ehyiavolɛma anzɛɛ menli mɔɔ asolo bɛ aneɛ la. Gyisɛse hanle kɛ menli balua ɛlɔlɛ mɔɔ ye ɛdoavolɛma lɛ maa bɛ nwo ngoko la azo anwu bɛ.​—Dwɔn 13:35.

Nyamenle agɔnwo mɔ di Nyamenle duma, Gyihova ne eni. Saa awie ɛnva wɔ duma ɛnvɛlɛ wɔ a, asoo ɔbayɛ ɛ gɔnwo kpalɛ? Kyɛkyɛ! Saa yɛlɛ yɛ gɔnwo a, yɛfa ye duma yɛfɛlɛ ye na yɛka ɔ nwo edwɛkɛ kpalɛ yɛkile awie mɔ. Yemɔti menli mɔɔ kulo kɛ bɛyɛ Nyamenle agɔnwo la ɔwɔ kɛ fa ye duma fɛlɛ ye na bɛka ɔ nwo edwɛkɛ bɛkile awie mɔ. Gyihova kpondɛ kɛ yɛyɛ zɔ.​—Mateyu 6:9; Wulomuma 10:13, 14.

Nyamenle agɔnwo mɔ kilehile menli Nyamenle Belemgbunlililɛ ne anwo debie, kɛ mɔɔ Gyisɛse yɛle la. Nyamenle Belemgbunlililɛ ne a le anwuma arane ne mɔɔ bayɛ azɛlɛ ne paladaese a. Nyamenle agɔnwo mɔ ka Nyamenle Belemgbunlililɛ ne anwo edwɛkpa ɛhye kile awie mɔ.​—Mateyu 24:14.

Gyihova Alasevolɛ bɔ mɔdenle kɛ bɛbayɛ Nyamenle agɔnwo. Bɛbu Baebolo ne yɛɛ bɛkulo bɛ nwo. Eza bɛdi Nyamenle duma ne eni na bɛfa bɛfɛlɛ ye yɛɛ bɛka Nyamenle Belemgbunlililɛ ne anwo edwɛkɛ bɛkile awie mɔ. Gyihova Alasevolɛ a wɔ nɔhalɛ ɛzonlenlɛ ne anu ɛnɛ a.