Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 MOKANWO

Mogya Nu Ninyɛne Ngyikyi Ngyikyi Nee Ndenle Mɔɔ Bɛdua Zo Bɛyɛ Apelehyɛne

Mogya Nu Ninyɛne Ngyikyi Ngyikyi Nee Ndenle Mɔɔ Bɛdua Zo Bɛyɛ Apelehyɛne

Mogya nu ninyɛne ngyikyi ngyikyi. Bɛnyia mogya nu ninyɛne ngyikyi ngyikyi bɛfi mogya nu ninyɛne titile nna ne​—mogya nu ngoane ngɛkɛba kɔkɔlɛ, mogya nu ngoane ngɛkɛba fufule, mogya nu ngoane ngɛkɛba ndɛbandɛba yɛɛ mogya nu nzule anu. Kɛ neazo la, hemoglobin mɔɔ maa anwosesebɛ la wɔ mogya nu ngoane ngɛkɛba kɔkɔlɛ ne anu. Bɛfa hemoglobin mɔɔ bɛnyia bɛfi sonla anzɛɛ nane nu la bɛyɛ wuleravolɛma mɔɔ bɛ mogya zo ɛde kpole anzɛɛ mogya dɔɔnwo ɛvi bɛ nu la ayile.

Mogya nu nzule​—mɔɔ ɛya ko ngyɛnu 90 le nzule la lɛ mogya nu ninyɛne dɔɔnwo mɔɔ maa anwosesebɛ la. Ninyɛne mɔɔ maa mogya da, ninyɛne ngakyile mɔɔ ko tia ewule yɛɛ albumin mɔɔ maa anwosesebɛ la noko wɔ mogya nu nzule ne anu. Saa awie nyia ewule bie a, dɔketama bahola amaa bɛava gamma globulin mɔɔ bɛnyianle bɛvile awie mɔɔ zɔhane ewule ne bie ɛha ye na yehola yegyinla ɔ nloa la mogya nzule ne anu la bɛawɔ ye agbuyia. Bɛfa Interferons yɛɛ interleukins mɔɔ bie a bɛnyia bɛfi mogya nu ngoane ngɛkɛba fufule nu la bɛyɛ kansa nee ewule ngakyile bie mɔ ayile.

Asoo ɔwɔ kɛ Keleseɛnema maa bɛfa mogya nu ninyɛne ngyikyi ngyikyi bɛyɛ bɛ ayile ɔ? Baebolo ne ɛnga ɛhye anwo edwɛkɛ fɔɔnwo, yemɔti ɔwɔ kɛ awie biala dua ye adwenle ne azo si kpɔkɛ wɔ Nyamenle anyunlu. Bie mɔ ɛnlie mogya nu ninyɛne ngyikyi ngyikyi biala ɔluakɛ bɛte nganeɛ kɛ Nyamenle Mɛla mɔɔ ɔvale ɔmanle  Yizilayɛma la ɛnee kile kɛ saa bɛtwe mogya bɛfi nane bie anu a, “bɛhwi bɛgua aze kɛ asɛɛ nzule la.” (Mɛla ne 12:22-24) Bie mɔ noko, ɛnlie mogya anzɛɛ nuhua ninyɛne titile ne ɛdeɛ, noko bɛmaa bɛfa mogya nu ninyɛne ngyikyi ngyikyi bɛyɛ bɛ ayile. Bie a bɛsuzu kɛ ɔdwu ɛleka ne bie a, mogya nu ninyɛne ngyikyi ngyikyi ne ɛngola ɛngyinla ɛkɛ ɛmmaa zɔhane sonla ne mɔɔ bɛhwenle mogya ne bɛvile ye nu la.

Saa ɛlɛsi mogya nu ninyɛne ngyikyi ngyikyi nwo kpɔkɛ a, suzu kpuyia ɛhye mɔ anwo: Asoo meze kɛ mekpo mogya nu ninyɛne ngyikyi ngyikyi kɔsɔɔti a ɔkile kɛ menrɛmaa bɛnrɛva nyile bie mɔɔ ko tia ewule ngakyile anzɛɛ mɔɔ boa maa mogya gyinla ɛleka ko la bɛnrɛyɛ me ayile ɔ? Asoo mebahola meahilehile deɛmɔti menlie mogya nu ninyɛne ngyikyi ngyikyi bie anzɛɛ medie la anu meahile dɔketa bie ɔ?

Apelehyɛne bie mɔ. Apelehyɛne ɛhye mɔ bie a le hemodilution yɛɛ cell salvage. Hemodilution kile mogya mɔɔ bɛtwe bɛfi nwonane ne anu, bɛfa debie fofolɛ bɛsie ɔ gyakɛ anu, na nzinlii bɛfa bɛmaa wuleravolɛ ne bieko la. Cell salvage maa bɛkola bɛbɔ mogya ne anwo bane na bɛsia bɛfa mogya mɔɔ kɛvi awie nu wɔ mekɛ mɔɔ bɛlɛyɛ apelehyɛne la bɛmaa ye. Mogya mɔɔ vi hanlɛ nu anzɛɛ nwonane ne ɛleka bie la le mɔɔ bɛfa bɛgua debie nu bɛwowo nu na bɛsia bɛfa bɛmaa wuleravolɛ ne. Kɛmɔ dɔketa biala dua ndenle ngakyile zo a yɛ ɛhye la ati, ɔwɔ kɛ Keleseɛnenli nwu nuhua ne mɔɔ ye dɔketa kulo kɛ ɔyɛ la.

Saa ɛlɛsi ndenle ɛhye mɔ anwo kpɔkɛ a, biza ɛ nwo kɛ: ‘Saa bɛbahakyi me mogya ne anye bɛavi me nwonane ne anu na ɔnrɛyɛ  gyima wɔ mekɛ ekyi bie ala anu bɔbɔ a, asoo me adwenle bamaa meabu mogya ɛhye kɛ ɔtɛde me ɛdeɛ mɔɔ ɔngyia kɛ bɛtwi “bɛgua aze kɛ asɛɛ nzule la”? (Mɛla ne 12:23, 24) Saa bɛlɛyɛ me ayile na bɛtwe mogya bɛfi me nu, bɛfa ayile bie bɛfonla nu na bɛsia bɛfa bɛgua me nwonane ne anu a, asoo ɔnrɛgyegye me adwenle ne mɔɔ bɛva Baebolo ne bɛtete ye la ɔ? Asoo meze kɛ mekpo ayile kɔsɔɔti mɔɔ bɛfa me mogya bɛyɛ la a, ɔkile kɛ menrɛmaa bɛnrɛhwe me  mogya kɛ bɛneɛnlea nu, bɛnrɛva hemodialysis, anzɛɛ heart-lung machine bɛnrɛyɛ me ayile ɔ?’

Ɔwɔ kɛ Keleseɛnenli si kɛzi ɔbamaa bɛava ye mogya bɛali gyima wɔ apelehyɛne bie anu la anwo kpɔkɛ maa ɔ nwo. Zɔhane ala a ɔde wɔ ayileyɛlɛ nu neɛnleanu, ayileyɛlɛ ngakyile mɔɔ ɛdwu zo mɔɔ bɛtwe awie mogya, bɛfa ayile bɛfonla nu wɔ adenle bie azo na bɛsia bɛfa bɛmaa ye la anwo a.