Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE 15

Maa Ɛ Nye Ɛlie Wɔ Ɛvɛlɛ Nwo

Maa Ɛ Nye Ɛlie Wɔ Ɛvɛlɛ Nwo

‘Awie biala ɛlie ɔ nye wɔ ye ɛvɛlɛ nwo.’​—NOLOBƆVO NE 3:13.

1-3. (a) Kɛzi menli dɔɔnwo te nganeɛ wɔ bɛ gyima nwo ɛ? (b) Gyima nwo adwenle boni a Baebolo ne maa nwolɛ anwosesebɛ a, na kpuyia boni mɔ a yɛbazuzu nwolɛ wɔ tile ɛhye anu a?

MENLI dɔɔnwo mɔɔ wɔ ewiade ye ɛnɛ la anye ɛnlie gyima mɔɔ bɛyɛ la anwo. Kɛmɔ bɛfa mekɛ dɔɔnwo bɛyɛ gyima mɔɔ bɛ nye ɛnlie nwo la ati, bɛfa adendɛbɛnzoabo a bɛkɔ gyima alehyenlɛ ko biala a. Kɛ ɔkɛyɛ na menli mɔɔ lɛ gyima nwo adwenle zɛhae la anye alie bɛ gyima nwo na bɛ kunlu adwo ɛ?

2 Baebolo ne maa yɛ anwosesebɛ kɛ yɛnyia gyima ɛsesebɛ nwo adwenle kpalɛ. Ɔse gyima nee ma mɔɔ vi nu ba la le nyilalɛ. Sɔlɔmɔn hɛlɛle kɛ: “Ɔle Nyamenle ahyɛlɛdeɛ mɔɔ yeva yemaa sonla kɛ awie biala kɛli kɛnlo na ɔkɛlie ɔ nye wɔ ye ɛvɛlɛ nwo.” (Nolobɔvo ne 3:13) Gyihova mɔɔ ɔkulo yɛ, na ɔ nye die yɛ boɛyɛlɛ nwo la kpondɛ kɛ yɛ kunlu dwo yɛ gyima nwo na yɛ nye die ma mɔɔ vi nu ba la anwo. Amaa yɛahɔ zo yɛadɛnla ye ɛhulolɛ ne anu la, ɔwɔ kɛ yɛbɔ yɛ ɛbɛla yɛmaa ɔ nee adwenle mɔɔ ɔlɛ wɔ gyima nwo nee ye ngyinlazo mɔɔ fane gyimayɛlɛ nwo la yɛ ko.​—Bɛgenga Nolobɔvo ne 2:24; 5:18.

3 Wɔ tile ɛhye anu, yɛbazuzu kpuyia nna bie anwo: Kɛ ɔkɛyɛ na yɛ nye alie yɛ ɛvɛlɛ nwo ɛ? Gyima boni mɔ a ɔnle kɛ nɔhalɛ Keleseɛnema yɛ a? Kɛ ɔkɛyɛ na yɛ gyima angeda sunsum nu ninyɛne zo ɛ? Na gyima boni a hyia kpole kpalɛ mɔɔ ɔwɔ kɛ yɛyɛ a? Mɔɔ lumua la, bɛmaa yɛzuzu neazo mɔɔ gyimayɛvoma nwiɔ mɔɔ tɛla biala wɔ aleɛabo​—Gyihova Nyamenle nee Gyisɛse Kelaese yɛle la anwo.

 GYIMAYƐVOLƐ BEDEVINLI NE NEE GYIMAYƐVOLƐ NE MƆƆ ƐBE

4, 5. Kɛzi Baebolo ne maa yɛnwu kɛ Gyihova le gyimayɛvolɛ kpalɛ ɛ?

4 Gyihova a le Gyimayɛvolɛ Bedevinli ne a. Mɔlebɛbo 1:1 ka kɛ: “Mɔlebɛbo ne Nyamenle bɔle anwuma nee aze.” Mekɛ mɔɔ Nyamenle bɔle ninyɛne mɔɔ wɔ azɛlɛ ye azo wiele la, ɔhanle kɛ debie biala mɔɔ yeyɛ la le “kpalɛ kpole.” (Mɔlebɛbo 1:31) Mɔɔ ɔhanle la kile kɛ ɛnee ɔ kunlu dwo gyima mɔɔ yeyɛ wɔ azɛlɛ ye azo amuala la anwo. Ɔda ali kɛ, Gyihova, ‘anyelielɛ Nyamenle ne’ anye liele gyima kpalɛ mɔɔ ɔyɛle la anwo.​—1 Temɔte 1:11.

5 Yɛ Nyamenle ne mɔɔ kulo gyima la ɛngyakyi gyimayɛlɛ ɛlɛ. Bɛbɔle azɛlɛ ye azo ninyɛne kɔsɔɔti bɛwiele la anzi mekɛ tendenle, Gyisɛse hanle kɛ: “Egya yɛ gyima kenle biala.” (Dwɔn 5:17) Duzu a Selɛ ne ɛlɛyɛ a? Ɔvi anwuma, ɛleka mɔɔ ɔde la yehɔ zo yehile alesama adenle na yenlea bɛ nwo zo. Yebɔ “abɔdeɛ fofolɛ,” Keleseɛnema mɔɔ bɛva sunsum bɛwo bɛ mɔɔ nee Gyisɛse bali tumi wɔ anwuma la. (2 Kɔlentema 5:17) Ɔlɛyɛ gyima yeamaa ye bodane mɔɔ ɔlɛ ɔmaa alesama la ara nu​—amaa menli mɔɔ bɛkulo ye la anyia dahuu ngoane wɔ ewiade fofolɛ bie anu. (Wulomuma 6:23) Gyihova nea mɔɔ vi ye gyima ne anu ɛra la a ɔ nye die nwo. Menli mgbe dɔɔnwo ɛlie Belemgbunlililɛ nrɛlaleɛ ne ɛdo nu, Nyamenle ɛmaa bɛbikye ye, na bɛlɛkɔ zo bɛayɛ nzenzaleɛ wɔ bɛ ɛbɛlabɔlɛ nu amaa bɛadɛnla ye ɛhulolɛ ne anu.​—Dwɔn 6:44.

6, 7. Duzu a kile kɛ Gyisɛse vale mekɛ tendenle yɛle gyima ɛsesebɛ a?

6 Ɔvi mekɛ tendenle yɛɛ Gyisɛse ɛlie duma kɛ awie mɔɔ yɛ gyima ɛsesebɛ a. Kolaa na yeara azɛlɛ ye azo kɛ dasanli la, ɔzonlenle kɛ ‘dwinvolɛ mɔɔ ɔdi ɔ ti anwo’ anzɛɛ Nyamenle gyimayɛvolɛ mɔɔ ɛbe wɔ ninyɛne kɔsɔɔti, ‘mɔɔ wɔ anwuma nee mɔɔ wɔ aze,’ la ɛbɔlɛ nu. (Mrɛlɛbulɛ 8:22-31; Kɔlɔsaema 1:15-17) Mekɛ mɔɔ Gyisɛse wɔ azɛlɛ ye azo  la, ɔhɔle zo ɔyɛle gyima ɛsesebɛ. Wɔ ye ngakula nu yɛɛ ɔzukoale adwinlililɛ a, na bɛvɛlɛle ye “kapenta.” * (Maake 6:3) Gyima ɛhye yɛ se kpalɛ yɛɛ ɔhyia mɔdenlebɔlɛ, ɔluakɛ zɔhane mekɛ ne ɛnee milahyinli mɔɔ bɛfa bɛbu mbaka, ɛleka mɔɔ bɛtɔne ndaboa, yɛɛ lateleke mɔɔ bɛfa bɛyɛ gyima la ɛnle ɛkɛ. Yɛ Gyisɛse mɔɔ ɛlɛkpakye ye ndaboa​—bie a ɔdaye mumua ne ɔlɛbu mbaka, na yeazoa yeara ɛleka mɔɔ ɔyɛ ye gyima ne la anwo nvoninli wɔ wɔ adwenle nu. Asoo ɛnwu kɛ ɔlɛsisi azua​—ɔlɛfa ndaboa yeagua zolɛ na ɔlɛbɔ zolɛ, ɔlɛyɛ nlenkɛ na ɔlɛbobɔ mbia ɔ? Ɔda ali kɛ, Gyisɛse nyianle ahunlundwolɛ mɔɔ bɛbɔ mɔdenle bɛyɛ gyima ɛsesebɛ a bɛnyia la bie.

7 Gyisɛse bɔle mɔdenle yɛlɛ ye ɛzonlenlɛ gyima ne. Ɔvale ɛvolɛ nsa nee foa ɔyɛle gyima ɛhye mɔɔ hyia tɛla biala la anyebolo zo. Kɛmɔ ɛnee ɔkulo kɛ menli dɔɔnwo te edwɛkɛ ne la ati, ɔvale ye mekɛ kɔsɔɔti ɔyɛle gyima, ɔbɔle ye nwonlomɔ ɔyɛle toonwo nɔɔzo. (Luku 21:37, 38; Dwɔn 3:2) Ɔhɔkpɔsale ‘azua nee namunamu zo na ɔbɔle Nyamenle Belemgbunlililɛ ne anwo edwɛkpa ne nolo.’ (Luku 8:1) Gyisɛse pɛle adenle tendenle mɔɔ zolɛ le munlutu la na ɔhanle edwɛkpa ne ɔhilele menli.

8, 9. Adenle boni azo a Gyisɛse anye liele ye ɛvɛlɛ nwo a?

8 Asoo Gyisɛse anye liele gyima ɛsesebɛ mɔɔ ɔyɛle wɔ ɛzonlenlɛ gyima ne anu la anwo? Ɛhɛe! Ɔguale Belemgbunlililɛ nɔhalɛ ne ma, na ɔgyakyile egyinli mɔɔ nuhua ma ɛbolo na ɔwɔ kɛ bɛte la ɔ nzi. Nyamenle gyima ne mɔɔ ɔyɛle la manle Gyisɛse anwosesebɛ, yemɔti ɛnee ɔngulo kɛ ɔdi aleɛ bɔbɔ amaa yeawie gyima ne yɛ. (Dwɔn 4:31-38) Nea ahunlundwolɛ mɔɔ ɔbayɛ kɛ Gyisɛse nyianle wɔ mekɛ mɔɔ ɔwiele ye azɛlɛ ye azo ɛzonlenlɛ gyima ne na ɔhanle nwolɛ nɔhalɛ edwɛkɛ ɔhilele ɔ Ze  la: “ Mehile wɔ anyunlunyia ne wɔ azɛlɛ ye azo; mewie gyima mɔɔ ɛvale ɛmanle me la di.”​—Dwɔn 17:4.

9 Ɔle nɔhalɛ kɛ Gyihova nee Gyisɛse anye die bɛ ɛvɛlɛ nwo, na ɛhye le neazo kpalɛ maa yɛ. Gyihova anwo ɛlɔlɛ ka yɛ maa ‘yɛbɔ mɔdenle kɛ yɛkɛyɛ kɛ ɔdaye ala la.’ (Ɛfɛsɛsema 5:1) Gyisɛse anwo ɛlɔlɛ ka yɛ maa ‘yɛfa ɔ gyakɛ.’ (1 Pita 2:21) Akee bɛmaa yɛnlea kɛzi yɛdayɛ noko yɛ nye bahola alie yɛ ɛvɛlɛ nwo la.

KƐ ƆKƐYƐ NA YƐ NYE ALIE YƐ ƐVƐLƐ NWO LA

Saa ɛfa Baebolo ngyinlazo ɛdi gyima a, ɛ nye bahola alie wɔ ɛvɛlɛ nwo

10, 11. Duzu a baboa yeamaa yɛanyia yɛ gyima nwo adwenle kpalɛ a?

10 Gyima hyia wɔ nɔhalɛ Keleseɛnema ɛbɛlabɔlɛ nu. Yɛkulo kɛ yɛ nye die na yɛ kunlu dwo yɛ gyima nwo, noko saa yɛ nye ɛnlie gyima mɔɔ yɛyɛ la anwo a ɛhye bahola ayɛ se. Kɛ ɔkɛyɛ na yɛ nye alie yɛ gyima nwo wɔ tɛnlabelɛ zɛhae mɔ anu ɛ?

11 Ɔwɔ kɛ yɛnyia adwenle kpalɛ. Yɛnrɛhola yɛnrɛhakyi tɛnlabelɛ ne, noko yɛbahola yɛahakyi yɛ subane. Saa yɛdwenledwenle adwenle mɔɔ Nyamenle lɛ wɔ gyima nwo la anwo a, ɔbaboa yeamaa yɛanyia gyima nwo adwenle kpalɛ. Kɛ neazo la, saa ɛle abusua tile a, ɔwɔ kɛ ɛnwu kɛ gyima mɔɔ ɛyɛ, ɔnva nwo kɛ bie a menli ɛmbu ye la, boa maa ɛkola ɛfa wɔ abusua ne nwonane nu ngyianlɛ ɛmaa bɛ. Ɛhye ati, wɔ kulovolɛma mɔɔ ɛnea bɛ la ɛnle debie ekyi wɔ Nyamenle anye zo. Ye Edwɛkɛ ne ka kɛ, saa awie ɛnnea ye sua nu amra a, ‘ɛnee ɔle sonla ɛtane ɔtɛla mɔɔ ɛnlɛ diedi la.’ (1 Temɔte 5:8) Saa ɛnwu kɛ wɔ gyima ne boa maa ɛdi bodane bie anwo gyima, ɛdi ɛzonle mɔɔ ɛlɛ wɔ Nyamenle anyunlu la anwo gyima a, ɔbamaa ɛ kunlu adwo ɛ nwo na wɔanyia anyelielɛ mɔɔ ɛ gɔnwo mɔ gyimayɛvoma ɛnlɛ bie la.

12. Ndenle boni azo a gyima ɛsesebɛ mɔɔ yɛyɛ nee nɔhalɛlilɛ maa yɛnyia nyilalɛ a?

12 Ɔwɔ kɛ yɛbɔ mɔdenle na yɛdi nɔhalɛ. Saa yɛbɔ mɔdenle  yɛyɛ gyima na yɛyɛ ye kpalɛ a yɛbanyia nyilalɛ. Gyimayɛvoma mɔɔ kulo gyima na bɛbɔ mɔdenle la sonle bolɛ kpole wɔ bɛ gyimamenle ne mɔ anye zo. (Mrɛlɛbulɛ 12:24; 22:29) Kɛmɔ yɛle nɔhalɛ Keleseɛnema la ati, ɔwɔ kɛ yɛdi nɔhalɛ wɔ yɛ gyima nu​—ɔnle kɛ yɛwua yɛ gyimamenle ne ezukoa, ye ninyɛne, anzɛɛ ye mekɛ. (Ɛfɛsɛsema 4:28) Kɛmɔ yɛnwunle ye wɔ Tile 14 ne anu la, nvasoɛ wɔ nɔhalɛlilɛ zo. Saa awie le gyimayɛvolɛ mɔɔ di nɔhalɛ a bɛdie ye bɛdi. Saa yɛ gyimamenle nwu gyima ɛsesebɛ mɔɔ yɛyɛ anzɛɛ ɔnnwu ye bɔbɔ a, yɛ kunlu dwo yɛ nwo ɔluakɛ yɛze kɛ “yɛ adwenle nu le wienyi,” yɛɛ ɔsɔ Nyamenle ne mɔɔ yɛkulo ye la anye.​—Hibuluma 13:18; Kɔlɔsaema 3:22-24.

13. Duzu a bahola avi neazo kpalɛ mɔɔ yɛyɛ wɔ yɛ gyima nu la anu ara a?

 13 Ɔwɔ kɛ yɛnwu kɛ yɛ subane kola wula Nyamenle anyunlunyia. Saa yɛfa Keleseɛne ɛbɛlabɔlɛ kpalɛ nwo ngyinlazo yɛdi gyima wɔ ɛleka mɔɔ yɛyɛ gyima la a, menli nwu ye. Duzu a bavi nu ara a? Ɛhye bahola “amaa ngilehilelɛ ne mɔɔ fane Nyamenle yɛ Ngoanedievolɛ ne anwo la ayɛ nvasoɛ.” (Taetɛse 2:9, 10) Ɛhɛe, yɛ subane bahola amaa awie mɔ anwu adenle mɔɔ yɛdua zo yɛsonle la kɛ ɔle kɛnlɛma na bɛ nye alie nwo. Saa ɛ gɔnwo gyimayɛvolɛ bie anye die nɔhalɛ ne anwo ɔluakɛ ɛyɛ neazo kpalɛ wɔ gyima nu la ati a, nea kɛzi ɛ nye balie nwolɛ a! Mɔɔ anwo hyia kpalɛ la, suzu ɛhye anwo: Nvasoɛ boni a wɔ zo tɛla kɛ ɛkɛnwu kɛ wɔ subane kpalɛ wula Gyihova anyunlunyia na ɔmaa ɔ nye die a?​—Bɛgenga Mrɛlɛbulɛ 27:11; 1 Pita 2:12.

YƐFA NWUNU YƐKPONDƐ GYIMA

14-16. Saa yɛlɛsi gyima nwo kpɔkɛ a, kpuyia mɔɔ hyia la boni mɔ a ɔwɔ kɛ yɛsuzu nwolɛ a?

14 Baebolo ne ɛngile gyima bie mɔɔ le kpalɛ nee mɔɔ ɛnle kpalɛ la. Ɛhye ɛngile kɛ yɛkola yɛyɛ gyima biala mɔɔ yɛnnea kɛzi ɔde la a. Ngɛlɛlera ne kola boa yɛ maa yɛkpondɛ gyima kpalɛ mɔɔ enililɛ wɔ nu na ɔsɔ Nyamenle anye la na yɛkpo gyima mɔɔ ɛnzɔ ɔ nye la. (Mrɛlɛbulɛ 2:6) Saa yɛlɛsi gyima nwo kpɔkɛ a, kpuyia nwiɔ bie mɔɔ hyia la wɔ ɛkɛ mɔɔ ɔwɔ kɛ yɛsuzu nwo a.

15 Asoo yɛyɛ gyima ɛhye a ɔbahile kɛ yɛlɛyɛ debie mɔɔ Baebolo ne tendɛ tia la ɔ? Nyamenle Edwɛkɛ ne tendɛ tia debiewualɛ, adalɛbɔlɛ, yɛɛ ananze mɔɔ bɛyɛ la. (Adendulɛ 20:4; Gyima ne 15:29; Ɛfɛsɛsema 4:28; Yekile 21:8) Yemɔti, yɛkpo gyima biala mɔɔ bamaa yɛayɛ ninyɛne ɛhye mɔ la. Gyihova anwo ɛlɔlɛ ka yɛ maa yɛkpo gyima biala mɔɔ bamaa yɛado Nyamenle mɛla la.​—Bɛgenga 1 Dwɔn 5:3.

16 Asoo yɛyɛ gyima ɛhye a ɔbahile kɛ yɛlɛboa anzɛɛ yɛlɛsi  nyɛleɛ ɛtane bie adua ɔ? Suzu neazo ɛhye anwo. Ɔnle ɛtane kɛ yɛbayɛ gyima wɔ ɛleka mɔɔ bɛdie nyɛvolɛ la. Noko, saa dɔketa bie fa Keleseɛnenli bie kɛ ɔyɛ gyima zɛhae wɔ asopiti bie mɔɔ bɛye ɛkolɛ wɔ ɛkɛ la anu ɛ? Nɔhalɛ nu, ye gyima ne ɛnrɛmaa ɔnrɛyɛ debie mɔɔ kile kɛ ɔdaye mumua ne a ɔye ɛkolɛ ne a. Noko akee, asoo gyima mɔɔ ɔyɛ ye dahuu la ɛmboa asopiti ne mɔɔ bɛye ɛkolɛ wɔ ɛkɛ la​—nyɛleɛ mɔɔ Nyamenle Edwɛkɛ ne tendɛ tia la ɔ? (Adendulɛ  21:22-24) Kɛmɔ yɛkulo Gyihova la ati, yɛngulo kɛ yɛbikye nyɛleɛ biala mɔɔ Baebolo ne tendɛ tia la.

17. (a) Saa yɛlɛsi gyima bie anwo kpɔkɛ a ninyɛne boni a ɔwɔ kɛ yɛsuzu nwo a? (Nea ɛlɛka “ Ɔwɔ Kɛ Meyɛ Gyima Ne Ɔ?”) (b) Kɛ ɔkɛyɛ na yɛ adwenle aboa yɛ yeamaa yɛazi kpɔkɛ mɔɔ sɔ Nyamenle anye la ɛ?

17 Saa yɛsuzu kpuyia nwiɔ mɔɔ hyia mɔɔ wɔ ɛdendɛkpunli 15 yɛɛ 16 ne anu la mualɛ ne anwo kpalɛ a, ɔbaboa yeamaa yɛanyia gyima nwo ngyegyelɛ dɔɔnwo sɔbelɛ. Bieko, ninyɛne bie mɔ wɔ ɛkɛ mɔɔ ɔwɔ kɛ yɛbɔ mɔdenle yɛsuzu nwolɛ kpalɛ wɔ mekɛ mɔɔ yɛlɛsi gyima nwo kpɔkɛ la. * Ɔnle kɛ yɛnea kɛ akɛlɛ nɔhavo ne bayɛ gyinlabelɛ biala mɔɔ yɛbahɔ nu la anwo mɛla. Ɔwɔ kɛ yɛfa nwunu yɛdi gyima wɔ ɛhye anwo. Kɛmɔ yɛzukoale ye wɔ Tile 2  ne anu la, ɔwɔ kɛ yɛsukoa Nyamenle Edwɛkɛ ne, yɛfa yɛbɔ yɛ ɛbɛla alehyenlɛ biala na yɛdua zo yɛtete yɛ adwenle ne. Saa yɛdua ‘debiezukoalɛ’ zo yɛtete yɛ adwenle tumi ne a, yɛ adwenle ne baboa yeamaa yɛazi kpɔkɛ mɔɔ sɔ Nyamenle anye la na yɛadɛnla ye ɛhulolɛ ne anu.​—Hibuluma 5:14.

NYIA GYIMA NWO ADWENLE MƆƆ FƐTA

18. Kɛmɔti a ɔnla aze kɛ yɛbazi kpɔkɛ mɔɔ ɔnrɛzɛkye yɛ ɛzonlenlɛ la ɛ?

18 Ɔnla aze kɛ yɛbazi kpɔkɛ mɔɔ ɔnrɛzɛkye yɛ ɛzonlenlɛ la wɔ “awieleɛ mekɛ” ɛhye mɔɔ “anwongyelelɛ dɔɔnwo” wɔ nu la anu. (2 Temɔte 3:1) Ɔnla aze kɛ yɛbanyia gyima mɔɔ yɛbayɛ ye dahuu la. Kɛmɔ yɛle nɔhalɛ Keleseɛnema la ati, yɛdie yɛto nu kɛ ɔwɔ kɛ yɛyɛ gyima ɛsesebɛ na yɛahola yɛanlea yɛ mbusua. Noko saa yɛannea boɛ a, ngyegyelɛ mɔɔ wɔ gyima nu anzɛɛ nwonane afoa nu ninyɛne nwo adwenle mɔɔ ewiade ne lɛ la bahola azɛkye agɔnwolɛvalɛ mɔɔ yɛ nee Nyamenle lɛ la. (1 Temɔte 6:9, 10) Bɛmaa yɛnlea kɛzi ɔwɔ kɛ yɛnyia adwenle mɔɔ fɛta na yɛazɔ “mɔɔ le kpalɛ” anzɛɛ ninyɛne mɔɔ hyia kpole kpalɛ anu la.​—Felepaema 1:10.

19. Duzu ati a ɔfɛta kɛ yɛfa yɛ rɛle yɛwula Gyihova anu a, na duzu a ɛhye bamaa yɛahoati a?

19 Fa ɛ rɛle kɔsɔɔti wula Gyihova anu. (Bɛgenga Mrɛlɛbulɛ 3:5, 6.) Asoo ɔnfɛta kɛ yɛfa yɛ rɛle yɛwula Gyihova anu ɔ? Ɔfɛta, ɔluakɛ ɔdwenle yɛ nwo. (1 Pita 5:7) Ɔze mɔɔ yɛhyia la kpalɛ ɔtɛla yɛdayɛ mumua ne, yɛɛ ɔ sa ɛnrɛyɛ ezinra wɔ yɛ nwo zo ɛlɛ. (Edwɛndolɛ 37:25) Ɛhye ati, ɔwɔ kɛ yɛtie mɔɔ ye Edwɛkɛ ne ka kile yɛ la: “Bɛye ezukoa nwo anyebolo bɛvi bɛ ɛbɛla nu, na bɛmaa bɛ kunlu ɛdwo mɔɔ bɛlɛ ye la anwo. Ɔluakɛ Nyamenle ɛha kɛ, ‘Menrɛgyakyi bɛ ɛlɛ, yɛɛ me rɛle ɛnrɛvi bɛ fee.’” (Hibuluma 13:5) Menli mɔɔ bɛyɛ dahuu ɛzonlenlɛ gyima ne la di daselɛ kɛ Nyamenle kola maa yɛ sa ka mɔɔ yɛhyia nwo wɔ ɛbɛlabɔlɛ nu  la. Saa yɛnyia diedi kɛ Gyihova banlea yɛ a, ɔbamaa yɛahoati kɛ yɛbadwenledwenle yɛ abusua ne ɛnleanlɛ nwo somaa. (Mateyu 6:25-32) Yɛnrɛdoa gyima na yɛnrɛbu yɛ nye yɛnrɛgua sunsum nu ninyɛne, mɔɔ le kɛ edwɛkpa ne nolobɔlɛ nee debiezukoalɛ ɛhɔlɛ zo.​—Mateyu 24:14; Hibuluma 10:24, 25.

20. Duzu a kile kɛ ɛ nye gyi ɛleka ko a, na kɛ ɔkɛyɛ na wɔayɛ zɔ ɛ?

 20 Sie ɛ nye ɛleka ko. (Bɛgenga Mateyu 6:22, 23.) Yɛsie yɛ nye ɛleka ko a ɔkile kɛ yɛnva ninyɛne dɔɔnwo yɛngyegye yɛ nwo wɔ ɛbɛlabɔlɛ nu. Keleseɛnenli mɔɔ anye gyi ɛleka ko la fa ɔ nye sie bodane ko azo​—Nyamenle ɛhulolɛdeɛyɛlɛ. Saa yɛ nye gyi debie zo a, yɛnrɛmaa gyima mɔɔ ezukoa dɔɔnwo wɔ nu la ɛkpondɛlɛ nee ninyɛne mgbole ɛyɛlɛ wɔ ɛbɛlabɔlɛ nu ɛnrɛyɛ yɛ adwenledwenle. Yɛnrɛmaa adwuleso ninyɛne nee nwonane afoa nu ninyɛne mɔɔ bɛbɔ nwolɛ nolo kɛ yemɔ a bamaa menli nye alie la ɛnrɛgyegye yɛ. Kɛ ɔkɛyɛ na wɔazie ɛ nye ɛleka ko ɛ? Mmatwe kakɛ mɔɔ anwo ɛngyia la ɛto ɛ nwo zo. Mmasoa nwonane afoa nu ninyɛne dɔɔnwo mɔɔ kola sɛkye wɔ mekɛ na ɔfa adwenledwenle ɔba la ɛgua ɛ nwo zo. Tie Baebolo ne folɛdulɛ mɔɔ se yɛmaa yɛ nye ɛzɔ “mɔɔ yɛdi nee mɔɔ yɛkeda la.” (1 Temɔte 6:8) Bɔ mɔdenle biala maa wɔ ɛbɛlabɔlɛ ɛyɛ sikalɛ.

21. Duzu ati a ɔwɔ kɛ yɛdumua yɛyɛ ninyɛne mɔɔ hyia la ɛ, na duzu a ɔwɔ kɛ yɛfa yɛdumua yɛ ɛbɛlabɔlɛ nu a?

21 Fa sunsum nu ninyɛne sie ɛ nye zo na pele dwu nwolɛ. Kɛmɔ yɛnrɛhola yɛnrɛyɛ ninyɛne kɔsɔɔti la ati, ɔwɔ kɛ yɛfa mɔɔ hyia la yɛdumua. Yɛanyɛ ye zɔ a, ninyɛne mɔɔ anwo ɛngyia la balie yɛ mekɛ kɔsɔɔti na yeaheda ninyɛne mɔɔ hyia kpalɛ la azo. Ninyɛne boni mɔ a ɔwɔ kɛ yɛfa yɛdumua yɛ ɛbɛlabɔlɛ nu a? Menli dɔɔnwo mɔɔ wɔ ewiade ye anu la fa nwomazukoalɛ kpole mɔɔ bamaa bɛanyia gyima kpalɛ mɔɔ ezukoa wɔ nu la a sie bɛ nye zo a. Noko, Gyisɛse dule ye ɛdoavolɛma folɛ kɛ bɛlumua “bɛdwenle Nyamenle Belemgbunlililɛ ne . . . anwo kpalɛ.” (Mateyu 6:33) Ɛhɛe, kɛmɔ yɛle nɔhalɛ Keleseɛnema la ati, yɛfa Nyamenle Belemgbunlililɛ ne yɛdumua yɛ ɛbɛlabɔlɛ nu. Ɔwɔ kɛ yɛ ɛbɛlabɔlɛ kɔsɔɔti​—kpɔkɛ mɔɔ yɛsi, bodane mɔɔ gyi yɛ nye zo, yɛɛ ninyɛne mɔɔ yɛdi ɔ nzi la​—kile kɛ Belemgbunlililɛ ne nee Nyamenle ɛhulolɛdeɛyɛlɛ hyia yɛ kpalɛ tɛla nwonane afoa nu ninyɛne nee ewiade debie biala.

 BƆ MƆDENLE YƐ ƐZONLENLƐ GYIMA NE

Saa yɛfa edwɛkɛhanlɛ gyima ne yɛdumua yɛ ɛbɛlabɔlɛ nu a ɔkile kɛ yɛkulo Gyihova

22, 23. (a) Nɔhalɛ Keleseɛnema gyima titile a le boni, na kɛ ɔkɛyɛ na yɛahile kɛ gyima ɛhye hyia yɛ ɛ? (Nea ɛlɛka “ Me Kpɔkɛzilɛ Ne Manle Menyianle Anyelielɛ Nee Ahunlundwolɛ.”) (b) Duzu a wɔzi wɔ ahonle kɛ ɛbayɛ wɔ gyima nwo a?

22 Kɛmɔ yɛze kɛ yɛde awieleɛ mekɛ ne mɔɔ li amozi anu la ati, yɛbɔ mɔdenle yɛyɛ gyima titile mɔɔ ɔwɔ kɛ nɔhalɛ Keleseɛnema yɛ la​—edwɛkɛhanlɛ nee ɛdoavolɛyɛlɛ gyima ne. (Mateyu 24:14; 28:19, 20) Kɛmɔ yɛ Neazovolɛ, Gyisɛse yɛle la, yɛkulo kɛ yɛbɔ mɔdenle yɛyɛ ngoanelielɛ gyima ɛhye. Kɛ ɔkɛyɛ na yɛahile kɛ gyima ɛhye hyia yɛ kpalɛ ɛ? Nyamenle azonvolɛ dɔɔnwo tu bɛ nwo maa, fi ahonle muala nu yɛ edwɛkɛhanlɛ gyima ne kɛ asafo nu nolobɔlɛma. Bie mɔ ɛyɛ ngyehyɛleɛ na bɛlɛsonle kɛ adekpakyelɛma anzɛɛ edwɛkpatɛlɛvolɛma. Awovolɛ dɔɔnwo mɔɔ ɛnwu kɛ sunsum nu bodane hyia la, ɛmaa bɛ mra anwosesebɛ ɛmaa bɛva dahuu ɛzonlenlɛ gyima ne bɛzie bɛ nye zo. Asoo Belemgbunlililɛ ne anwo nolobɔlɛma mɔɔ bɔ mɔdenle la anye die bɛ ɛvɛlɛ nwo wɔ ɛzonlenlɛ gyima ne anu ɔ? Ɛhɛe, bɛ nye die! Saa yɛfi yɛ ahonle nu yɛsonle Gyihova a, yemɔ a le adenle titile mɔɔ yɛbalua zo yɛanyia anyelielɛ, ahunlundwolɛ nee nyilalɛ dɔɔnwo a.​—Bɛgenga Mrɛlɛbulɛ 10:22.

23 Yɛ nuhua bie mɔ fa mekɛ dɔɔnwo yɛ gyima na yɛahola yɛanlea yɛ mbusua. Kakye kɛ Gyihova kpondɛ kɛ yɛ nye die yɛ ɛvɛlɛ nwo. Saa yɛmaa yɛ subane nee yɛ nyɛleɛ nee adwenle mɔɔ ɔlɛ wɔ gyima nwo nee ye ngyinlazo yia a, yɛbanyia ahunlundwolɛ wɔ yɛ gyima nu. Ɛhye ati, bɛmaa yɛzi yɛ ahonle kɛ yɛnrɛmaa gyima bie ɛnrɛzɛkye gyima titile mɔɔ ɔwɔ kɛ yɛ la​—Nyamenle Belemgbunlililɛ ne anwo edwɛkpa ne nolobɔlɛ. Saa yɛfa gyima ɛhye yɛdumua yɛ ɛbɛlabɔlɛ nu a, ɔkile kɛ yɛkulo Gyihova na yɛkulo kɛ yɛtɛnla ye ɛhulolɛ ne anu.

^ ɛden. 6 Giliki edwɛkɛkpɔkɛ mɔɔ bɛhile ɔ bo “kapenta” la le “duma mɔɔ bɛfa bɛfɛlɛ awie mɔɔ fa ndaboa yɛ gyima, kɛ ɔfa ɔsi azua anzɛɛ ɔbobɔ mbia anzɛɛ ɔyɛ ndaboa gyima gyɛne biala la.”

^ ɛden. 17 Saa ɛkpondɛ ɛnwu kpɔkɛ mɔɔ ɔwɔ kɛ ɛsi wɔ gyima nwo la anu ngilehilenu dɔɔnwo a, nea The Watchtower, April 15, 1999, mukelɛ 28-30, nee July 15, 1982, mukelɛ 26.