Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 MOKANWO

Mekɛ Boni A Raalɛ Keda Ɔ Ti Zo A—Kɛmɔti A Ɔhyia Ɛ?

Mekɛ Boni A Raalɛ Keda Ɔ Ti Zo A—Kɛmɔti A Ɔhyia Ɛ?

Mekɛ boni a ɔwɔ kɛ Keleseɛne raalɛ keda ɔ ti zo wɔ ye ɛzonlenlɛ nu a, na kɛmɔti a ɔhyia ɛ? Maa yɛzuzu mɔɔ sunsum ne hanle ɛzoanvolɛ Pɔɔlo manle ɔhanle wɔ edwɛkɛ ɛhye anwo la anwo. Ɔmaa yɛnyia adehilelɛ mɔɔ hyia na yɛazi kpɔkɛ kpalɛ mɔɔ wula Nyamenle anyunlunyia la. (1 Kɔlentema 11:3-16, NW) Pɔɔlo maa yɛnwu ninyɛne nsa mɔɔ ɔwɔ kɛ yɛsuzu nwolɛ a: (1) debie mɔɔ ɔlɛyɛ mɔɔ ɔti ɔwɔ kɛ ɔkeda ɔ ti zo, (2) ɛleka mɔɔ ɔwɔ kɛ ɔkeda ɔ ti zo, yɛɛ (3) bodane mɔɔ ɔti ɔwɔ kɛ ɔdi folɛdulɛ ɛhye azo la.

Debie mɔɔ ɔlɛyɛ. Pɔɔlo bɔle ninyɛne nwiɔ aluma: asɔneyɛlɛ yɛɛ Nyamenle edwɛkɛhanlɛ. (Ngyehyɛnu 4, 5) Nɔhalɛ nu, asɔneyɛlɛ le edwɛkɛ mɔɔ bɛfa ɛbulɛ bɛka bɛkile Gyihova a. Nyamenle edwɛkɛ ne ɛhanlɛ fane Baebolo ne anu ngilehilelɛ mɔɔ Keleseɛnenli sonvolɛ bie yɛ ye ɛnɛ la anwo. Noko, asoo ɛnee Pɔɔlo ɛlɛsuzu kɛ ɔwɔ kɛ raalɛ keda ɔ ti zo wɔ mekɛ biala mɔɔ ɔyɛ asɔne anzɛɛ ɔkilehile nɔhalɛ edwɛkɛ mɔɔ wɔ Baebolo ne anu la ɔ? Kyɛkyɛ. Gyinlabelɛ mɔɔ nuhua a raalɛ kɛyɛ asɔne anzɛɛ ɔkɛhilehile la a kile kɛ ɔwɔ kɛ ɔkeda ɔ ti zo anzɛɛ ɔnle kɛ ɔyɛ zɔ a.

Ɛleka mɔɔ ɔwɔ. Pɔɔlo edwɛkɛ ne suzu gyinlabelɛ nwiɔ anzɛɛ ɛleka mɔɔ bɛyɛ gyima ne la anwo​—abusua ne nee asafo ne anu. Ɔka kɛ: “Raalɛ biala amenle a le ɔ hu . . . Raalɛ biala noko mɔɔ ɛlɛyɛ nzɛlɛlɛ anzɛɛ ɛlɛka Nyamenle edwɛkɛ na yeangeda ɔ ti zo la gua  ɔ hu anyunlu aze.” (Ngyehyɛnu 3, 5) Wɔ abusua ngyehyɛleɛ ne anu, raalɛ ɔ hu a Gyihova ɛhile kɛ ɔle ɔ ti a. Saa yeanlie ɔ hu tumi ne yeando nu, na ɔyɛ gyima mɔɔ Gyihova ɛva ɛwula ɔ sa nu la a, ɔbagua ɔ hu anyunlu aze. Kɛ neazo la, saa ɔhyia kɛ ɔyɛ Baebolo ɛzukoalɛ wɔ mekɛ mɔɔ ɔ hu wɔ ɛkɛ ne la a, ɔbaheda ɔ ti zo yeava yeahile kɛ ɔdie ye tumi ne ɔto nu. Saa bɛzɔne ɔ hu anzɛɛ bɛtɛsɔnenle ye bɔbɔ a ɔbayɛ ɛhye, ɔluakɛ yemɔ a ɔle abusua ne ati a. * Saa ɔyɛ asɔne anzɛɛ ɔkilehile wɔ mekɛ mɔɔ ɔ ra kakula nrenya mɔɔ bɛzɔne ye la wɔ ɛkɛ a, ɔdaye noko ɔbaheda ɔ ti zo, tɛ kɛ kakula nrenya ne a le abusua ne ati ɔ, noko kɛmɔ mediema mrenya mɔɔ bɛzɔne bɛ la lɛ tumi wɔ Keleseɛne asafo ne anu la ati ɔ.

Pɔɔlo hanle asafo ne anu gyinlabelɛ noko anwo edwɛkɛ kɛ: “Saa awie kulo kɛ ɔsu ɛhye anwo kpolera a, mɔɔ melɛ ye meka la a le kɛ yɛmɛ anzɛɛ Nyamenle [asafo] ne mɔ, yɛnlɛ amaamuo fofolɛ bieko wɔ ɛzonlenlɛ nu kɛ ɛhye ala.” (Ngyehyɛnu 16) Wɔ Keleseɛne asafo ne anu, mrenya mɔɔ bɛzɔne bɛ la a lɛ tileyɛlɛ nwo adenle a. (1 Temɔte 2:11-14; Hibuluma 13:17) Mrenya angomekye a bɛkpa bɛ kɛ mgbanyinli nee azonvolɛ mɔɔ Nyamenle ɛmaa bɛ gyima kɛ bɛnlea Nyamenle mboane ne azo a. (Gyima ne 20:28) Noko akee, ɔdwu mekɛ ne bie a gyinlabelɛ ne maa Keleseɛne raalɛ yɛ gyima mɔɔ mrenya mɔɔ fɛta na bɛzɔne bɛ ta yɛ la. Kɛ neazo la, bie a ɛnee ɔwɔ kɛ ɔnea daselɛlilɛ nyianu zo ɔluakɛ nrenya mɔɔ fɛta mɔɔ bɛzɔne ye la ɛnle ɛkɛ anzɛɛ ɛtɛbale la ati. Anzɛɛ bie a ɔbayɛ sua nu Baebolo ɛzukoalɛ mɔɔ bɛlumua bɛyɛ nwolɛ ngyehyɛleɛ la wɔ mekɛ mɔɔ nrenya mɔɔ bɛzɔne ye wɔ ɛkɛ la. * Kɛmɔ gyima zɛhae mɔ amgba boka Keleseɛne asafo ne gyima ne anwo la ati, ɔbaheda ɔ ti zo yeava yeahile kɛ ɔlɛyɛ gyima mɔɔ bɛta bɛfa bɛwula nrenya sa nu la.

Noko akee, yɛ ɛzonlenlɛ ne foa dɔɔnwo wɔ ɛkɛ ne mɔɔ ɔngyia kɛ adiema raalɛ keda ɔ ti zo wɔ nu a. Kɛ neazo la, ɔngyia kɛ ɔkeda ɔ ti  zo wɔ mekɛ mɔɔ ɔlɛmaa mualɛ wɔ Keleseɛne nyianu bo, ɔ nee ɔ hu anzɛɛ nrenya mɔɔ bɛzɔne ye ɛlɛyɛ azua nu daselɛlilɛ, anzɛɛ ɔ nee ɔ mra ngakula mɔɔ bɛtɛsɔnenle bɛ ɛlɛsukoa debie anzɛɛ ɛlɛyɛ asɔne la. Nɔhalɛ nu, nwolɛ kpuyia gyɛne noko wɔ ɛkɛ, na saa adiema raalɛ bie ɛnnwu mɔɔ ɔwɔ kɛ ɔyɛ wɔ nwolɛ a, ɔbahola yeayɛ neɛnleanu bieko yeaboka nwolɛ. * Saa yemɔ anzi ye adwenle nu tɛyɛ ye kesee na ɔte nganeɛ kɛ ɔwɔ kɛ ɔyɛ zɔ na ɔkeda ɔ ti zo a ɔnle ɛtane, kɛmɔ bɛhile ye wɔ nvoninli ne anu la.

Bodane. ngyehyɛnu 10 ne, yɛnwu ninyɛne nwiɔ mɔɔ ɔti Keleseɛne raalɛ kɛhulo kɛ ɔkɛheda ɔ ti zo la: “Ɔlua [anwumabɔvolɛ] ne mɔ ati, ɔwɔ kɛ raalɛ biala keda ɔ ti zo.” Mɔɔ lumua la, yɛ edwɛkɛkpɔkɛ ‘tumi sɛkɛlɛneɛ’ nzonlɛ. Saa raalɛ keda ɔ ti zo a, ɔfa ɔkile kɛ ɔdie tumi mɔɔ Gyihova ɛva ɛmaa mrenya mɔɔ bɛzɔne bɛ wɔ asafo ne anu la ɔto nu. Ɔdua ɛhye azo ɔda ɛlɔlɛ mɔɔ ɔlɛ nee nɔhalɛ mɔɔ ɔdi ɔmaa Gyihova Nyamenle la ali. Yɛnwu adwenle mɔɔ tɔ zo nwiɔ wɔ edwɛkɛ ne mɔɔ se ɔlua ‘anwumabɔvolɛ ne mɔ ati’ la anu. Saa raalɛ keda ɔ ti zo a, kɛzi ɔka sunsum nu abɔdeɛ ɛhye mɔ mɔɔ lɛ tumi la ɛ?

Anwumabɔvolɛ ne mɔ anye die kɛ bɛkɛnwu kɛ bɛbu Nyamenle tumi mɔɔ wɔ Gyihova ahyehyɛdeɛ ne mɔɔ wɔ anwuma nee azɛlɛ ye azo la anu amuala. Eza bɛnyia nvasoɛ bɛfi alesama mɔɔ tɔ sinli la neazo mɔɔ bɛyɛ wɔ ɛhye anwo la anu. Kɛ ɔde ye biala la, ɔwɔ kɛ bɛdabɛ noko bɛdie Gyihova ngyehyɛleɛ ne bɛto nuhua​—sɔnea mɔɔ bɛ nuhua dɔɔnwo angola anli zo wɔ dɛba ne la. (Dwuudu 6) Ɛnɛ, anwumabɔvolɛ ne mɔ kola nwu Keleseɛne raalɛ mɔɔ lɛ anwubielɛ, ndelebɛbo na ɔze nrɛlɛbɛ kpole ɔtɛla adiema nrenya mɔɔ bɛzɔne ye wɔ asafo ne anu noko ɔyɛ ye ndɛndɛ ɔbɛlɛ ɔ nwo aze  ɔmaa ye tumi ne la anwo neazo ngakyile. Bie wɔ ɛkɛ ne bɔbɔ a, raalɛ ne le Keleseɛnenli mɔɔ bɛkpokpa ye mɔɔ nzinlii ɔbaboka menli mɔɔ nee Kelaese bali agya la anwo. Awieleɛ ne, raalɛ zɛhae banyia gyinlabelɛ kpole mɔɔ tɛla anwumabɔvolɛ ne mɔ ɛdeɛ ne la, na ɔ nee Kelaese ali tumi wɔ anwuma. Neazo kɛnlɛma mɔɔ bɛyɛ bɛkile anwumabɔvolɛ ne mɔ ɛnɛ la boni a le ɛhye! Nea nwolɛ adenle kɛnlɛma mɔɔ mediema mraalɛ kɔsɔɔti lɛ kɛ bɛkɛvi tieyɛ nu bɛkɛbɛlɛ bɛ nwo aze bɛkɛva bɛkɛhile bɛ nɔhalɛlilɛ nee tumi mɔɔ bɛdie bɛto nu wɔ anwumabɔvolɛ mgbe dɔɔnwo ɛhye mɔ mɔɔ di nɔhalɛ la anyunlu a!

^ ɛden. 3 Keleseɛne raalɛ ɛlɛyɛ asɔne a ɔnrɛmaa ɔ ne zo wɔ mekɛ mɔɔ ɔ hu mɔɔ le diedinli wɔ ɛkɛ la, kyesɛ gyinlabelɛ mɔɔ ɔnda ɔnzi mɔɔ le kɛ anwodolɛ bie ɛmaa ɔ hu ɛdɔ mumule la anu.

^ ɛden. 1 Ɔngyia kɛ adiema raalɛ keda ɔ ti zo wɔ mekɛ mɔɔ ɔlɛyɛ Baebolo ɛzukoalɛ mɔɔ bɛlumua bɛyɛ nwolɛ ngyehyɛleɛ na nolobɔlɛnli nrenya mɔɔ bɛtɛsɔnenle ye mɔɔ ɔnle ɔ hu wɔ ɛkɛ la.

^ ɛden. 2 Saa ɛkpondɛ nwolɛ edwɛkɛ dɔɔnwo a, nea The Watchtower, February 15, 2015, mukelɛ 30; July 15, 2002, mukelɛ 26-27, yɛɛ February 15, 1977, mukelɛ 125-128.