Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE 9

‘Bɛnriandi Nla Nwo Ɛbɛlatane’

‘Bɛnriandi Nla Nwo Ɛbɛlatane’

‘Ɔwɔ kɛ bɛku nwonane nu atiakunluwɔzo ne mɔ mɔɔ wɔ bɛ nu, mɔɔ le kɛ nla nwo ɛbɛlatane, ɛbɛla mgbane mgbane ɛbɔlɛ, nla nwo ɛhulolɛ ɛtane, atiakunluwɔzo ɛtane, yɛɛ anyebolo, mɔɔ le awozonle ɛzonlenlɛ la.’​—KƆLƆSAEMA 3:5.

1, 2. Adwenle boni a Beelam bɔle kɛ ɔfa yeagyegye Gyihova menli a?

FƐLƐKYEVOLƐ ne kɔ ɛleka mɔɔ ɔta ɔkye fɛlɛ la. Ɔze fɛlɛ mɔɔ ɔkpondɛ la. Yemɔti ɔfa nwolɛ kɔleɛ ɔbɔ koba ne ati na ɔto ye azule ne anu. Ɔngyɛ, boya ne noma, nyɛma ne anu sa na ɔtwe fɛlɛ ne ɔto file zo. Ɔsele, ɔluakɛ ɔnwu kɛ ɔvale kɔleɛ mɔɔ fɛlɛ ne kulo la.

2 Wɔ ɛvolɛ 1473 K.Y.M., nrenya bie mɔɔ bɛfɛlɛ ye Beelam la dwenlenle adenle mɔɔ ɔbalua zo yeazua menli bie ɛhane la anwo kpalɛ. Nyamenle menli ne mɔɔ ɛnee bɛyɛ bɛ azokoɛleɛ wɔ Mowabe Fienemgbole ne anu wɔ Ɛwɔkɛ Azɛlɛ ne ɛweɛne zo la yɛɛ ɛnee ɔkulo kɛ ɔkye bɛ a. Beelam yɛle ɔ nwo kɛ ɔle Gyihova ngapezonli, noko ɛnee ɔle anyebolo sonla mɔɔ bɛbɔ ye ɛkpa kɛ ɔwa Yizilayɛma amonle a. Gyihova vale ɔ nwo liele nu yemɔti mɔɔ Beelam holale yɛle la ala a le kɛ ɔyilale Yizilayɛma. Kɛmɔ ɛnee yebɔ kpɔkɛ kɛ ɔnrɛmaa ye ahatualɛ ne ɛnrɛbɔ ye la ati, Beelam nwunle kɛ saa ɔmaa Yizilayɛma yɛ ɛtane kpole a, ɔbahola yeamaa Nyamenle awa ye menli ne amonle. Mekɛ mɔɔ ɛhye wɔ ye adwenle nu la, Beelam zuale ye ɛhane ne​—ɔvale Mowabe mbɛlɛra mɔɔ anwo yɛ fɛ la ɔlile gyima.​—Ɛdianlɛ 22:1-7; 31:15, 16; Yekile 2:14.

3. Kɛzi adwenle mɔɔ Beelam bɔle la yɛle gyima ɛ?

3 Asoo adwenle ne mɔɔ ɔbɔle la yɛle gyima? Ɛhɛe, ɔyɛle gyima. Yizilayɛ mrenya apenle dɔɔnwo dɔle ɛhane ne anu ɔlua ‘Mowabe mraalɛ mɔɔ bɛ nee bɛ bɔle nla nwo ɛbɛlatane’ la azo.  Bɛbɔle ɔ bo bɛzonlenle Mowabe awozonle ne mɔ mɔɔ Beeyale mɔɔ wɔ Piyɔ, awolɛ anzɛɛ nla nyamenle ne, boka nwo la. Ɔlua ɛhye azo Yizilayɛma 24,000 wule Ɛwɔkɛ Azɛlɛ ne ɛweɛne zo. Nea munzule kokye mɔɔ dole bɛ a!​—Ɛdianlɛ 25:1-9.

4. Duzu ati a Yizilayɛma apenle dɔɔnwo bɔle ɛbɛlatane a?

4 Duzu a vale munzule ɛhye rale a? Ɛnee menli ne anu dɔɔnwo ɛnyia ahonle ɛtane ɔluakɛ ɛnee bɛhwe bɛ nwo bɛvi Gyihova, Nyamenle ne mɔɔ liele bɛ vile Yigyibiti, manle bɛ aleɛ wɔ ɛsɛlɛ ne azo, na ɔlile bɛ nyunlu ɔhɔle azɛlɛ ne mɔɔ yeva yebɔ bɛ ɛwɔkɛ anloa la anwo. (Hibuluma 3:12) Mekɛ mɔɔ ɛzoanvolɛ Pɔɔlo ɛlɛdwenledwenle edwɛkɛ ɛhye anwo la, ɔhɛlɛle kɛ: ‘Ɔnle kɛ yɛbɔ nla nwo ɛbɛlatane kɛmɔ bɛ bie mɔ bɔle a bɛ nuhua 23,000 dɔle kenle ko la.’ *​—1 Kɔlentema 10:8.

5, 6. Duzu ati a ɛtane mɔɔ Yizilayɛma yɛle wɔ Mowabe Fienemgbole ne anu la anwo kɛlɛtokɛ ne hyia kpalɛ maa yɛ ɛnɛ a?

5 Ɛzukoalɛdeɛ dɔɔnwo wɔ Ɛdianlɛ edwɛkɛ ne anu maa Nyamenle menli ɛnɛ, mɔɔ ɔnrɛhyɛ biala na bɛahɔ ɛwɔkɛ azɛlɛ kpole bie azo la. (1 Kɔlentema 10:11) Kɛ neazo la, nla nwo adwenle mɔɔ ɛbu zo wɔ ewiade ɛnɛ la le kɛ tete Mowabe ɛdeɛ ne la, noko yezɛkye yedɛla zɔ. Bieko, ɛvolɛ biala Keleseɛnema  apenle dɔɔnwo fa bɛ nwo wula ɛbɛlatane nu​—deɛ ko ne ala mɔɔ dole Yizilayɛma la. (2 Kɔlentema 2:11) Ɛnɛ, menli mɔɔ nee Nyamenle menli tu la bie mɔ ɛzukoa Zemelae mɔɔ yeanyɛ ye nyiane kɛ ɔbava Medean raalɛ yeaze Yizilayɛma anye zo wɔ bɛ azokoɛleɛ ɛkɛ ne yeahɔ ye ɛdanlɛ sua ne anu la, na bɛfa bɛ ɛbɛlatane ne bɛgyegye awie mɔ wɔ Keleseɛne asafo ne anu.​​—Ɛdianlɛ 25:6, 14; Dwuudu 4.

6 Asoo ɛnwu ɛ nwo kɛ ɛwɔ Mowabe Fienemgbole ne azo ɛnɛ? Asoo ɛnwu kɛ ɔnrɛhyɛ biala ɛ sa baha wɔ ahatualɛ ne​—ewiade fofolɛ ne mɔɔ wɔva mekɛ tendenle wɔhendɛ la? Saa zɔhane a ɔde a, ɛnee bɔ mɔdenle yɛ debie biala mɔɔ bamaa wɔahɔ zo wɔadɛnla Nyamenle ɛhulolɛ ne anu ɔlua mɛla ɛhye mɔɔ ɛbali zo la azo: “Bɛnriandi nla nwo ɛbɛlatane.”​—1 Kɔlentema 6:18, NW.

Nea Mowabe Fienemgbole ne

DUZU A LE NLA NWO ƐBƐLATANE?

7, 8. Duzu a le ‘nla nwo ɛbɛlatane,’ na kɛzi menli mɔɔ fa bɛ nwo wula nu la bu mɔɔ bɛdua la ɛ?

7 Kɛmɔ bɛhile wɔ Baebolo ne anu la, “nla nwo ɛbɛlatane” (Giliki, por·neiʹa) kile nla nwo ngitanwolilɛ biala mɔɔ menli mɔɔ bɛtɛgyale kɛmɔ Baebolo ne kile fa bɛ nwo wula nu la. Agyalɛzɛkyelɛ, tuutuubɔlɛ, yɛɛ nla nwo ngitanwolilɛ mɔɔ kɔ zo wɔ menli mɔɔ bɛnle agyalɛma avinli, yɛɛ awie anwo mɔɔ bɛtafe anzɛɛ bɛfa bɛdi nwɔhoa nee ɔ nzi mɔɔ bɛfa ye la boka nwolɛ. Mɔɔ boka nwo bieko a le nrenya mɔɔ fa nrenya nee raalɛ mɔɔ fa raalɛ yɛɛ nane mɔɔ bɛ nee ye da la. *

8 Ngɛlɛlera ne ka ye wienyi kɛ: Bɛdabɛ mɔɔ bɛbɔ nla nwo ɛbɛlatane la ɛnrɛhola ɛnrɛdɛnla Keleseɛne asafo ne anu yɛɛ bɛnrɛnyia dahuu ngoane. (1 Kɔlentema 6:9; Yekile 22:15) Bieko, bɛyia ngyegyelɛ dɔɔnwo ɛnɛ ɔluakɛ menli ɛnlie bɛ ɛnli, bɛnlɛ ɛbulɛ, bɛ agyalɛ nu le edwɛkɛ ngome, bɛ adwenle bua bɛ fɔlɛ, bɛnrenzɛ wɔ mekɛ mɔɔ bɛ nye ɛnla, bɛnyia  ewule ngakyile, na bɔbɔ bɛwu. (Bɛgenga Galeehyeama 6:7, 8.) Duzu ati a ɔwɔ kɛ ɛyɛ debie mɔɔ bamaa wɔayia ngyegyelɛ dɔɔnwo a? Mɔɔ yɛ nyane la a le kɛ, menli dɔɔnwo ɛlɛyɛ debie mɔɔ lumua mɔɔ fa ngyegyelɛ ɛhye mɔ ba la a bɛndwenle nwolɛ, fane dɔɔnwo ne ala ɔta ɔyɛ nlanwonvoninli.

NLANWONVONINLI​—DEBIE MƆƆ LUMUA

9. Asoo nlanwonvoninli ɛmboda, kɛmɔ bie mɔ kile la? Kilehile nu.

9 Wɔ maanle dɔɔnwo anu, nlanwonvoninli ɛbu zo wɔ bɛ adwelie ngɛlata, bɛ edwɛne, yɛɛ bɛ tɛlevihyɛne zo gyimalilɛ nu, na bɛ Intanɛte zo ɛdeɛ bɛnga. * Asoo ɔmboda, kɛmɔ bie mɔ ka la? Ɔboda! Menli mɔɔ nea nlanwonvoninli la bahola ava bɛ nwo awula bɛnwobɔlɛ nu na yeaha bɛ ɛkɛ na bɛanyia “atiakunluwɔzo ɛtane,” mɔɔ bie a ɔbamaa bɛ adwenle ahɔ nla zo, bɛanyia atiakunluwɔzo ɛtane, bɛayia ngyegyelɛ kpole wɔ bɛ agyalɛ nu, na bɔbɔ yeava ewolebɔlɛ yeara. * (Wulomuma 1:24-27; Ɛfɛsɛsema 4:19) Awie bie mɔɔ yɛ neɛnleanu la, vale bɛ nwo mɔɔ bɛngola ye sɔ wɔ nla nwo la dole kansa nwo. Ɔka kɛ: “Ɔkɔ zo ɔyɛ kpole na ɔtɛlɛ, ɔngyakyi, yɛɛ ye ayileyɛlɛ nee ye ɛhɔlɛ yɛ se kpalɛ.”

Nrɛlɛbɛ wɔ nu kɛ bɛbava Intanɛte bazie wienyi nu wɔ sua nu

10. Ndenle boni azo a yɛbahola yɛava ngyinlazo ne mɔɔ wɔ Gyemise 1:14, 15 la yɛali gyima ɛ? (Eza nea ɛlɛka “ Kɛzi Membɔle Mɔdenle Kɛ Mebabɔ Ɛbɛla Kpalɛ La.”)

10 Suzu edwɛkɛ mɔɔ bɛhɛlɛ ye wɔ Gyemise 1:14, 15 mɔɔ ka kɛ: “Sonla ɔdaye ye atiakunluwɔzo ɛtane ne a sɔ ye nea na ɔtwe ye ɔfi Nyamenle anwo. Saa ye munzule atiakunluwɔzo ne nrenzɛ a ɔwo ɛtane, yɛɛ ɛtane wie nyi a ɔwie ewule” la anwo. Yemɔti, saa atiakunluwɔzo ɛtane bie ba wɔ adwenle nu a, yɛ nwolɛ debie ndɛndɛ na ye adwenle zɔhane fi ɛkɛ! Kɛ neazo la, saa ɛ nye kɔbɔ nvoninli bie mɔɔ twehwe nla nwo  atiakunluwɔzo la azo a, ye ɛ nye to ahane ndɛndɛ, anzɛɛ nua kɔmputa ne, anzɛɛ kakyi TV ne to ɛleka fofolɛ. Yɛ debie biala mɔɔ ɔhyia la fa koati atiakunluwɔzo ɛtane kolaa na yeali ɛ nwo zo konim!​—Bɛgenga Mateyu 5:29, 30.

11. Kɛ ɔkɛyɛ na yɛahile kɛ yɛfa yɛ nwo yɛto Gyihova anwo zo wɔ mekɛ mɔɔ yɛlɛko yɛatia atiakunluwɔzo ɛtane la ɛ?

11 Ndelebɛbo kpalɛ bie ati, Ahenle mɔɔ ze yɛ kpalɛ tɛla kɛzi yɛze yɛ nwo la, tu yɛ folɛ kɛ: ‘Ɔwɔ kɛ bɛku nwonane nu atiakunluwɔzo ne mɔ mɔɔ wɔ bɛ nu, mɔɔ le kɛ nla nwo ɛbɛlatane, ɛbɛla mgbane mgbane ɛbɔlɛ, nla nwo ɛhulolɛ ɛtane, atiakunluwɔzo ɛtane, yɛɛ anyebolo, mɔɔ le awozonle ɛzonlenlɛ la.’ (Kɔlɔsaema 3:5) Nɔhalɛ nu, ɔhyia mɔdenlebɔlɛ kpalɛ na yɛahola yɛayɛ ɛhye. Noko, kakye kɛ yɛ anwuma Selɛ ne mɔɔ lɛ ɛlɔlɛ nee abotane la wɔ ɛkɛ mɔɔ yɛbahola yɛazɛlɛ ye  moalɛ a. (Edwɛndolɛ 68:19) Ɛhye ati, saa adwenle ɛtane bie ba ɛ ti anu a, kɔ ye ɛkɛ ne ndɛndɛ. Sɛlɛ ye “tumi bedevinli ne,” na bɔ mɔdenle dwenle debie fofolɛ nwo.​—2 Kɔlentema 4:7; 1 Kɔlentema 9:27; nea ɛlɛka “ Kɛ Ɔkɛyɛ Na Meagyakyi Subane Ɛtane Bie Ɛ?

12. Yɛ “ahonle” ne a le duzu, na duzu ati a ɔwɔ kɛ yɛbɔ nwolɛ bane a?

12 Nrenya nrɛlɛbɛvolɛ Sɔlɔmɔn hɛlɛle kɛ: “Bɔ wɔ ahonle ne anwo bane tɛla mɔɔ ɛfa ɛsie la amuala, ɔluakɛ nuhua yɛɛ ngoane vi ba a.” (Mrɛlɛbulɛ 4:23, NW) Yɛ “ahonle” ne gyi ɛkɛ ne maa kɛzi yɛde, sonla holɛ ko mɔɔ yɛde wɔ Nyamenle anyunlu. Bieko, mɔɔ Nyamenle nwu ye wɔ yɛ ahonle ne anu la a bahile kɛ yɛbanyia dahuu ngoane anzɛɛ yɛnrɛnyia dahuu ngoane a, na tɛ kɛzi yɛde wɔ menli nye zo la ɔ. Ye sikalɛ ne ala ɛne. Noko, ɔle anyebolo edwɛkɛ. Amaa nɔhavo Dwobu annea raalɛ bie wɔ adenle ɛtane zo la, ɔ nee ɔ nye yɛle ngyekyeleɛ. (Dwobu 31:1) Nea kɛzi ɛhye le neazo kɛnlɛma maa yɛ a! Edwɛndolɛnli ne nyianle adwenle ko ne ala bie na ɔyɛle asɔne kɛ: “Ye me nye fi ninyɛne mgbane mgbane nwo.”​—Edwɛndolɛ 119:37.

DAENA ZILE KPƆKƐ ƐTANE

13. Nwane a le Daena, na duzu ati a yeamkpa agɔnwolɛ nrɛlɛbɛ nu a?

13 Kɛmɔ yɛnwunle ye wɔ Tile 3 ne la, yɛ gɔnwo mɔ bamaa yeahola yɛayɛ debie kpalɛ anzɛɛ debie ɛtane. (Mrɛlɛbulɛ 13:20; bɛgenga 1 Kɔlentema 15:33.) Suzu tete selɛ Gyekɔbo ara raalɛ Daena neazo ne anwo. Ɔnyianle ndetelɛ kpalɛ ɛdeɛ, noko Daena yɛle koasea na ɔvale Keena mbɛlɛra agɔnwolɛ. Ɛnee Keenama le kɛ Mowabema mɔɔ bɛ ɛbɛla ɛzɛkye bɔkɔɔ la. (Sɛlɛvolɛma 18:6-25) Wɔ Hyikɛm mɔɔ “bɛdi ye eni kpalɛ” wɔ ye abusua ne anu nee Keena mrenya mɔɔ ɛha la anye zo, ɛnee Daena le raalɛ mɔɔ bɛbahola bɛ nee ye ala a.​—Mɔlebɛbo 34:18, 19.

14. Kɛzi agɔnwolɛ mɔɔ Daena vale la hɔwiele munzule nu ɛ?

14 Ɔbayɛ kɛ ɛnee nla nwo adwenle biala ɛnle Daena ati anu wɔ mekɛ mɔɔ ɔnwunle Hyikɛm la. Noko, Hyikɛm yɛle mɔɔ  Keenama dɔɔnwo bayɛ wɔ mekɛ mɔɔ bɛnyia nla nwo atiakunluwɔzo la. Mɔdenle biala mɔɔ Daena bɔle kɛ ɔdie ɔ nwo la yɛle mgbane, ɔluakɛ Hyikɛm “nee ye lale” na “ɔguale ɔ nyunlu aze.” Ɔbayɛ kɛ amozi Hyikɛm ‘hulole’ Daena, noko ɛnee yeyɛ mɔɔ ɔyɛ la yewie. (Bɛgenga Mɔlebɛbo 34:1-4.) Tɛ Daena angome a nwunle ɛhye anwo amaneɛ a. Agɔnwolɛ mɔɔ ɔvale la vale anyiemgba rale na ɔmanle evinli hanle ye abusua ne amuala.​—Mɔlebɛbo 34:7, 25-31; Galeehyeama 6:7, 8.

15, 16. Kɛ ɔkɛyɛ na yɛanyia nɔhalɛ nrɛlɛbɛ ɛ? (Eza nea ɛlɛka “ Ngɛlɛlera Mɔɔ Ɔwɔ Kɛ Ɛdwenledwenle Nwo.”)

15 Saa Daena zukoale debie titile bie vile nu a, ɛnee ɔvɛlɛ nwolɛ na yeazukoa. Ɔngyia kɛ bɛdabɛ mɔɔ bɛkulo Gyihova na bɛtie ye la, maa edwɛkɛ to bɛ na bɛazukoa debie bɛavi nu. Kɛmɔ bɛtie Nyamenle la ati, bɛ nee “nrɛlɛbɛvolɛma tu.” (Mrɛlɛbulɛ 13:20a) Ɛhye ati bɛte “adenle kpalɛ biala abo” na bɛkoati ngyegyelɛ nee nyanelilɛ mɔɔ anwo ɛngyia la.​—Mrɛlɛbulɛ 2:6-9; Edwɛndolɛ 1:1-3.

 16 Nrɛlɛbɛ mɔɔ vi Nyamenle ɛkɛ la wɔ ɛkɛ maa awie biala mɔɔ kulo na ɔdua asɔneyɛlɛ, Nyamenle Edwɛkɛ ne nee mbuluku mɔɔ akɛlɛ nɔhavo nee nrɛlɛbɛvolɛ ne ɛyɛ mɔɔ ɔbazukoa ye dahuu la azo anyia bie. (Mateyu 24:45; Gyemise 1:5) Debie bieko mɔɔ hyia la a le mɛlɛbɛnwoaze, ɛhye da ali wɔ mekɛ mɔɔ yɛkɛnyia ɛhulolɛ kɛ yɛbadie folɛdulɛ mɔɔ gyi Ngɛlɛlera ne azo la. (2 Arelemgbunli 22:18, 19) Kɛ neazo la, Keleseɛnenli  bahola alie ado nu kɛ ye ahonle le mɛlɛbɛla na yezɛkye yebo zo. (Gyɛlɛmaya 17:9) Noko saa edwɛkɛ bie ba a, asoo ɔbabɛlɛ ɔ nwo aze yealie folɛdulɛ nee moalɛ mɔɔ bɛbavi ɛlɔlɛ nu bɛava bɛamaa ye la yeado nu ɔ?

17. Ka edwɛkɛ mɔɔ bahola azi abusua bie anu la, na kile kɛzi selɛ bie nee ɔ ra raalɛ bahola azuzu nwolɛ la.

17 Suzu edwɛkɛ ɛhye anwo nea. Selɛ bie ɛmmaa ɔ ra raalɛ nee Keleseɛnenli kpavolɛ bie ɛnvinde mɔɔ awie ɛmboka bɛ a. Kakula raalɛ ne ka kɛ: “Me papa, ɛnlie me ɛnli ɔ? Yɛnrɛbɔ ɛbɛla ɛtane biala!” Ɔbahola yeara ye kɛ kakula raalɛ ne kulo Gyihova yɛɛ ɔlɛ adwenle kpalɛ ɛdeɛ, noko asoo ‘ɔlɛfa nrɛlɛbɛ mɔɔ vi Nyamenle ɛkɛ ne la yealua’ ɔ? Asoo ‘ɔlɛnriandi nla nwo ɛbɛlatane’? Anzɛɛ ɔlɛyɛ koasea ‘yeava ɔ rɛle yeado ɔ ngome ɔ nwo zo’? (Mrɛlɛbulɛ 28:26) Bie a ɛbahola wɔanwu ngyinlazo bieko mɔɔ baboa selɛ zɛhae nee ɔ ra raalɛ ne yeamaa bɛazuzu edwɛkɛ ne anwo kpalɛ la.​—Nea Mrɛlɛbulɛ 22:3; Mateyu 6:13; 26:41.

DWOSEFI NRIANDILE NLA NWO ƐBƐLATANE

18, 19. Sɔnea boni a dole Dwosefi a, na kɛzi ɔlile nwolɛ gyima ɛ?

18 Kpavolɛ kɛnlɛma bie mɔɔ kulo Nyamenle mɔɔ nriandile nla nwo ɛbɛlatane la a le Daena papa ara Dwosefi. (Mɔlebɛbo 30:20-24) Dwosefi ngakula nu, ɔnwunle mɔɔ zile wɔ mekɛ mɔɔ ɔ diema raalɛ ne anva nrɛlɛbɛ anli gyima la. Ɔnyɛ nwanwane kɛ ninyɛne ɛhye mɔ mɔɔ ɛnee wɔ Dwosefi adwenle nu, nee ɛhulolɛ mɔɔ ɔlɛ kɛ ɔbazie ɔ nwo wɔ Nyamenle ɛhulolɛ ne anu la, bɔle ɔ nwo bane wɔ ɛvolɛ dɔɔnwo anzi wɔ Yigyibiti, mekɛ mɔɔ ɔ menle aye ne bɔle mɔdenle “alehyenlɛ biala” kɛ ɔ nee ye kɛla la. Nɔhalɛ nu, kɛmɔ Dwosefi le akɛlɛ la ati, yeangola yeangyakyi gyima mɔɔ ɛnee ɔyɛ la yeangɔ! Ɛnee ɔwɔ kɛ ɔfa nrɛlɛbɛ nee akɛnrasesebɛ a ɔdi tɛnlabelɛ ne anwo gyima a. Mɔɔ ɔyɛle la a le kɛ yeandie Pɔtefaa aye ne yɛɛ ɔ nee ye anla, na awieleɛ ne, ɔnriandile ɔvile ɔ nwo ɛkɛ.​—Bɛgenga Mɔlebɛbo 39:7-12.

19 Dwenle nwolɛ nea: Saa ɛnee Dwosefi de a ɔka nla nwo  ɛlalɛ anzɛɛ ɔdwenledwenlenle raalɛ ne anwo a, asoo anrɛɛ ɔbahola yeali nɔhalɛ yeahɔ awieleɛ? Anrɛɛ ɔnrɛhola fee. Kɛ anrɛɛ ɔbadwenledwenle ninyɛndane nwo la, Dwosefi bule agɔnwolɛvalɛ mɔɔ ɔ nee Gyihova lɛ la kɛ ɔsonle bolɛ kpole, na ɔhanle nwolɛ edwɛkɛ ɔhilele Pɔtefaa aye ne. Ɔhanle ɔhilele ye kɛ: ‘Me menle ɛtɛtuale me kɛ memmafa me sa meka debie biala kɛ ɛdawɔ ala, ɔboalekɛ ɔ ye a le wɔ. Duzu ati yɛɛ akee menwɔyɛ amumuyɛ kpole ɛhye, na menwɔyɛ ɛtane menwɔtia Nyamenle ɛ?’​—Mɔlebɛbo 39:8, 9.

20. Adenle boni azo a Gyihova vale ɔ nwo liele Dwosefi edwɛkɛ ne anu a?

20 Nea kɛzi Gyihova anye liele wɔ mekɛ mɔɔ ɔnwunle kɛ kpavolɛ Dwosefi mɔɔ ɛnee ɛmbikye ye abusua ne fee la, ɛlɛdi nɔhalɛ alehyenlɛ ko biala la! (Mrɛlɛbulɛ 27:11) Nzinlii, Gyihova vale ɔ nwo liele edwɛkɛ ne anu, yemɔti bɛyele Dwosefi bɛvile efiade na eza bɛyɛle ye kpanyinli mɔɔ nea Yigyibiti azɛlɛ ne kɔsɔɔti nee aleɛ zo a! (Mɔlebɛbo 41:39-49) Nea kɛzi edwɛkɛ mɔɔ wɔ Edwɛndolɛ 97:10 yɛle zɔ a: “[Gyihova] kulo bɛdabɛ mɔɔ bɛkyi ɛtane la; ɔbɔ ɔdaye ye menli ne anwo bane; ɔdie bɛ ɔfi amumuyɛma asa anu”!

21. Kɛzi adiema kakula nrenya bie mɔɔ wɔ Africa maanle bie anu la vale akɛnrasesebɛ bɔle ɛbɛla kpalɛ ɛ?

21 Ɛnɛ noko, Nyamenle azonvolɛ dɔɔnwo kile kɛ ‘bɛkyi mɔɔ le ɛtane la, na bɛkulo mɔɔ le kpalɛ la.’ (Emɔso 5:15) Adiema nrenya kakula bie mɔɔ wɔ Africa maanle bie anu la ka kɛ  bɛlɛra bie mɔɔ ɔ nee ye kɔ sukulu la vale akɛnrasesebɛ hanle hilele ye kɛ saa ɔboa ye wɔ mgbondabulɛ nwo sɔnea nu a ɔbamaa ɔ nee ye ala. Adiema nrenya kakula ne hanle kɛ: “Meamkponle mɔɔ ɔhanle la azo. Nɔhalɛ mɔɔ menlile la ati menyianle ɛbulɛ nee enililɛ, ninyɛne mɔɔ sonle bolɛ tɛla nvutuke nee dwɛtɛ fufule la.” Nɔhalɛ nu, anyelielɛ mɔɔ ɛtaneyɛlɛ fa ba la le “mekɛ ekyi bie” ɛdeɛ, noko alufudeɛ anyelielɛ zɛhae ta fa nyanelilɛ dɔɔnwo ba. (Hibuluma 11:25) Bieko, saa yɛfa yɛto dahuu anyelielɛ mɔɔ yɛyɛ tieyɛ yɛmaa Gyihova a yɛnyia la anwo a, ɔle ekyi bie.​—Mrɛlɛbulɛ 10:22.

MAA ANWUNVƆNEZELƐ NYAMENLE NE ƐBOA WƆ

22, 23. (a) Saa Keleseɛnenli bie yɛ ɛtane kpole a, duzu ati a ye tɛnlabelɛ ne ɛnle mɔɔ anyelazo ɛnle nu a? (b) Moalɛ boni a wɔ ɛkɛ ne maa awie mɔɔ kɛyɛ ɛtane la ɛ?

22 Kɛmɔ yɛnli munli la ati, yɛ kɔsɔɔti yɛbɔ mɔdenle yɛkomo nwonane ne atiakunluwɔzo zo, na yɛayɛ mɔɔ sɔ Nyamenle anye la. (Wulomuma 7:21-25) Gyihova ze ɛhye, na “ɔkakye kɛ yɛle ndɛtɛlɛ ala.” (Edwɛndolɛ 103:14) Ɔdwu mekɛ ne bie a, Keleseɛnenli bie bahola ayɛ ɛtane kpole. Asoo ɛhye kile kɛ anyelazo biala ɛnle ɛkɛ ɛmmaa ye ɔ? Ɔngile zɔ fee! Nɔhalɛ nu, ɛtanevolɛ ne banwu mɔɔ yeyɛ la anwo amaneɛ kɛmɔ Belemgbunli Devidi nwunle ye la. Noko akee, “fakyɛ wɔ [Nyamenle] afoa” yɛɛ ɔlɛ ɛhulolɛ kɛ dahuu ɔbava bɛdabɛ mɔɔ bɛnu bɛ nwo nɔhalɛ nu na ‘bɛka bɛ ɛtane’ la ɛtane yeahyɛ bɛ.​—Edwɛndolɛ 86:5; Gyemise 5:16; bɛgenga Mrɛlɛbulɛ 28:13.

23 Bieko, Nyamenle ɛvi atiakunlukɛnlɛma nu ɛmaa yɛ ‘menli nu ahyɛlɛdeɛ’​—mboaneneavolɛma mɔɔ ɛnyi sunsum nu mɔɔ bɛfɛta na bɛlɛ ɛhulolɛ kɛ bɛbaboa la​—wɔ Keleseɛne asafo ne anu. (Ɛfɛsɛsema 4:8, 12; Gyemise 5:14, 15) Bɛ bodane a le kɛ bɛbaboa ɛtanevolɛ bie bɛamaa ɔ nee Nyamenle anyia agɔnwolɛvalɛ bieko, na kɛmɔ nrɛlɛbɛvolɛ ne hanle la, yeanyia “ndelebɛbo” amaa yeanzia yeangɔnyɛ ye ɛtane ne bieko.​—Mrɛlɛbulɛ 15:32.

 “NYIA NDELEBƐBO”

24, 25. (a) Kɛzi kpavolɛ ne mɔɔ bɛha ɔ nwo edwɛkɛ wɔ Mrɛlɛbulɛ 7:6-23 la hilele kɛ “ɔnze nrɛlɛbɛ fee” ɛ? (b) Kɛ ɔkɛyɛ na ‘yɛanyia ndelebɛbo’ ɛ?

24 Baebolo ne ka menli mɔɔ ‘ɛnze nrɛlɛbɛ fee’ yɛɛ bɛdabɛ mɔɔ bɛlɛ “ndelebɛbo” la anwo edwɛkɛ. (Mrɛlɛbulɛ 7:7) Kɛmɔ awie mɔɔ ‘ɛnze nrɛlɛbɛ fee’ la ɛtɛwiele Nyamenle anwo ninyɛne bo te yɛɛ ɔnlɛ Nyamenle ɛzonlenlɛ nu anwubielɛ la ati, bie a, ɔnrɛva nwunu nee ndelebɛbo ɔnrɛli gyinlabelɛ bie anwo gyima. Sonla zɛhae le kɛ kpavolɛ ne mɔɔ bɛha ɔ nwo edwɛkɛ wɔ Mrɛlɛbulɛ 7:6-23 la, ɔnrɛyɛ se kɛ ɔbayɛ ɛtane kpole. Noko, sonla mɔɔ lɛ “ndelebɛbo” la fa asɔneyɛlɛ sukoa Nyamenle Edwɛkɛ ne dahuu na ɔdua zo ɔsiezie sonla holɛ ko mɔɔ ɔde la. Ɔnli munli ɛdeɛ, noko ɔbɔ mɔdenle biala kɛ ɔbamaa ye nzuzulɛ, ye atiakunluwɔzo, ye nganeɛdelɛ nee mɔɔ gyi ɔ nye zo wɔ ɛbɛlabɔlɛ nu la nee Nyamenle ɛhulolɛdeɛ ayɛ ko. Ɛhye kile kɛ ɔle sonla mɔɔ “kulo ɔ nwo” anzɛɛ yila ɔ nwo, na ‘ɔbakpazi.’​—Mrɛlɛbulɛ 19:8.

25 Biza ɛ nwo kɛ: ‘Asoo medie meto nu bɔkɔɔ kɛ Nyamenle ngyinlazo le kpalɛ? Asoo melɛ diedi kpundii kɛ saa mefa ngyinlazo ne mɔ medi gyima a mebanyia anyelielɛ kpole ɔ?’ (Edwɛndolɛ 19:7-10; Ayezaya 48:17, 18) Saa wɔ adwenle yɛ wɔ kesee ekyi bɔbɔ wɔ edwɛkɛ ɛhye mɔ bie anwo a, di nwolɛ gyima. Suzu mɔɔ ɛbu ɛ nye ɛgua Nyamenle mɛla zo a ɔbavi nu yeara la anwo. Bieko, fa nɔhalɛ ne bɔ wɔ ɛbɛla na fa ninyɛne kpalɛ mɔɔ lɛ duma, mɔɔ le fɔɔnwo, mɔɔ anwo te, mɔɔ le kɛnlɛma, yɛɛ mɔɔ sɔ ɛnyelɛ la sie wɔ adwenle nu na dua zo ‘sɔ Gyihova nea na nwu kɛ ɔle kpalɛ.’ (Edwɛndolɛ 34:8; Felepaema 4:8, 9) Ɛbanwu kɛ, mekɛ mɔɔ ɛlɛkɔ zo wɔayɛ ɛhye la ɛbanyia ɛlɔlɛ kpole wɔamaa Nyamenle, wɔahulo mɔɔ ɔkulo, na wɔahyi mɔɔ ɔkyi la. Ɛnee Dwosefi ɛnli munli. Noko, ɔholale ‘ɔnriandile nla nwo ɛbɛlatane’ ɔluakɛ ɔmanle Gyihova nyianle adenle tetele ye wɔ ɛvolɛ dɔɔnwo  anu, amaa yeanwu nrɛlɛbɛ. Ɔrɛla ye kɛ ɛdawɔ noko ɛbayɛ zɔ.​—Ayezaya 64:8.

26. Edwɛkɛ mɔɔ hyia la boni a yɛbazuzu nwo a?

26 Yɛ Bɔvolɛ ne anyɛ yɛ awodeɛ ne mɔ kɛ yɛva yɛli nwɔhoa ala, emomu, ɔyɛle kɛ yɛva yɛwo na eza yɛva yɛlie yɛ nye wɔ agyalɛ nu. (Mrɛlɛbulɛ 5:18) Yɛbazuzu Nyamenle adwenle mɔɔ lɛ wɔ agyalɛ nwo la wɔ tile nwiɔ mɔɔ doa zo la anu.

^ ɛden. 4 Ɔda ali kɛ, menli dodo ne mɔɔ wɔ Ɛdianlɛ la gyi ɛkɛ maa “Yizilayɛ mgbanyima ne mɔ” mɔɔ ndɛnebuavolɛma ne hunle bɛ, mɔɔ ɔbayɛ kɛ bɛ dodo le 1,000, yɛɛ akee bɛdabɛ mɔɔ Gyihova mumua ne hunle bɛ la.​—Ɛdianlɛ 25:4, 5.

^ ɛden. 7 Saa ɛkpondɛ nyɛleɛ evinli nee ɛbɛlatane mɔɔ bɛnze nwolɛ nyiane la anu ngilehilenu dɔɔnwo a, nea “Question From Readers” mɔɔ wɔ The Watchtower, July 15, 2006, mɔɔ Gyihova Alasevolɛ ɛyɛ la anu.

^ ɛden. 9 “Nlanwonvoninli” mɔɔ bɛha nwolɛ edwɛkɛ wɔ ɛke la kile nvoninli ngakyile, edwɛkɛ biala mɔɔ bɛkɛlɛ anzɛɛ bɛka bɛfa bɛtwehwe nla nwo atiakunluwɔzo la. Nlanwonvoninli bahola ayɛ awie mɔɔ ɛye ɔ nwo mɔɔ bɛpɛ ye nvoninli yɛɛ menli nwiɔ anzɛɛ dɔɔnwo mɔɔ ɛlɛfa bɛ nwo la anwo nvoninli mɔɔ yɛ ayahanlɛ la.

^ ɛden. 9 Bɛha bɛnwobɔlɛ nwo edwɛkɛ wɔ Mokanwo edwɛkɛ Di Bɛnwobɔlɛ Zo Konim anu.