Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Kɛlata Mɔɔ Vi Neazo Eku Ne Ɛkɛ

Kɛlata Mɔɔ Vi Neazo Eku Ne Ɛkɛ

Kɔ Maa Yɛ Mediema Alɔvolɛ:

January 1, 2008, maanlema Nrelenza Ɛzinzalɛ Arane mɔɔ lumua la manle yɛnwunle edwɛkɛ kɛnlɛma mɔɔ ba ndoɔdoa zo mɔɔ ɔti ne se “Sukoa Bɛ Diedi” la. Ɔvi zɔhane mekɛ ne, bɛkɛlɛ edwɛkɛtile ɛhye anwo edwɛkɛ fofolɛ siane nsa biala, na yɛ nye die nwolɛ kpalɛ!

Duzu a menli mɔɔ kenga la ɛha ye wɔ nwo a? Mɔɔ raalɛ ko gengale edwɛkɛ ne mɔɔ fane Maata anwo wiele la, ɔhɛlɛle kɛ: “Mengengale la menzelele ɔluakɛ mele kɛ Maata ala la—dahuu mekulo kɛ meyɛ awie mɔɔ die nyɛvolɛ kpalɛ mɔɔ alagye ɛnle nu na me rɛle fi kɛ ɔhyia kɛ megyinla na me nee me gɔnwo mɔ nyia agɔnwolɛvalɛ.” Bɛlɛra bie mɔ ɔtɛnyianle ɛvolɛ abulanwiɔ la nwunle edwɛkɛ kɛnlɛma ɛhye wɔ Ɛseta edwɛkɛ ne anu: “Mebahola meaha ye nɔhalɛ nu kɛ ɔdwu mekɛ ne bie a yɛfa yɛ adwenle yɛsie adɛladeɛ nee ninyɛne mɔɔ ɛdwu zo la azo somaa. Ɔwɔ kɛ yɛsiezie yɛ nwo kpalɛ; noko, yɛngulo kɛ yɛyɛ yɛmaa ɔ bo zo.” Ɔdoale zo kɛ: “Gyihova dwenle kɛzi yɛdayɛ mumua ne yɛde la anwo.” Edwɛkɛ bie mɔɔ fane ɛzoanvolɛ Pita anwo la noko manle Keleseɛnenli raalɛ bie nganeɛdelɛ mɔɔ ɔyɛ anyelielɛ la lale ali: “Mengengale edwɛkɛ ne la ɛnee yeyɛ me kɛ asɛɛ mewɔ ɛkɛ ne bie na meboka mɔɔ ɛlɛkɔ zo la anwo! Menvale me adwenle membule mɔɔ edwɛkɛ ne ɛlɛka ahile me la.”

Kengavoma ɛhye mɔ nee menli gyɛne dɔɔnwo mɔɔ bɛhɛlɛ yɛ bɛla bɛ anyezɔlɛ ali wɔ edwɛkɛ ɛhye mɔ anwo la—si mɔɔ ɛzoanvolɛ Pɔɔlo hɛlɛle ye mekɛ tendenle mɔɔ ɛze ɛhɔ la azo: “Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ.” (Wulo. 15:4) Gyihova manle bɛhɛlɛle edwɛkɛ ɛhye mɔ wɔ Baebolo ne anu amaa bɛahilehile yɛ ɛzukoalɛdeɛ mɔɔ sonle bolɛ. Yɛ muala, ɔnva nwo mekɛ tendenle mɔɔ yɛva yɛnwu nɔhalɛ ne la, bahola azukoa ninyɛne avi nu.

Yɛmaa wɔ anwosesebɛ kɛ ɛgenga buluku ɛhye ndɛndɛ. Bɛva bɛboka bɛ Abusua Ɛzonlenlɛ ngyehyɛleɛ ne anwo—ngakula ne mɔ anye balie nwo! Saa bɛlɛsukoa ye wɔ Asafo Baebolo Ɛzukoalɛ bo a, mmamaa dapɛne ko bɔbɔ kpa ɛ ti! Tɔ ɛ rɛle aze kenga; mmapele nwolɛ. Fa wɔ adwenle bu edwɛkɛ ne; maa ɔyɛ kɛ ɛwɔ ɛkɛ ne bie la. Bɔ mɔdenle kɛ ɛbade nganeɛ kɛ Baebolo nu menli ne, na wɔanwu mɔɔ bɛnwunle ye la. Fa kɛzi bɛyɛle bɛ nyɛleɛ wɔ gyinlabelɛ bie mɔ anu la to mɔɔ ɛdawɔ a anrɛɛ ɛbayɛ la anwo.

Yɛ nye die kɛ yɛlɛmaa ɛdawɔ noko wɔanyia buluku ɛhye bie la. Ɔrale ye kɛ ɔbayɛ nyilalɛ yeamaa ɛ nee wɔ abusua ne. Yɛkulo bɛ somaa yɛɛ yɛdwenle bɛ nwo kpole,

Gyihova Alasevolɛ Neazo Eku