Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Ɔle Kpalɛ Kɛ Ɛkɛde Nganeɛ Zɛhae Ɔ?

Asoo Ɔle Kpalɛ Kɛ Ɛkɛde Nganeɛ Zɛhae Ɔ?

NRENYA bie mɔɔ ye awie ɛwu la hɛlɛle kɛ: “Mɔɔ mele kakula wɔ England la, bɛhilele me kɛ ɔnle kɛ meda me nganeɛdelɛ ali wɔ menli nu. Mekakye kɛ me papa mɔɔ ɛnee le sogyanli la, hanle ɔ gye zile zo ɛsesebɛ zele me wɔ mekɛ mɔɔ ɛnee melɛdi nyane la kɛ, ‘Mmasu!’ Mengakye bɔbɔ kɛ me mame vole yɛ nuhua bie (ɛnee yɛlua nna) anloa anwo anzɛɛ vale yɛ nuhua bie bɔle ye ɛbolɛ. Mekɛ mɔɔ me papa wule la ɛnee menyia ɛvolɛ 56. Mendele nganeɛ kɛ meminli debie kpole. Noko, mɔlebɛbo ne, meangola su.”

Wɔ maanle bie mɔ anu, menli da bɛ nganeɛdelɛ ali wɔ bagua nu. Saa bɛlɛdi nyane o, bɛ nye ɛlie o, bɛmaa menli nwu ye. Noko, wɔ maanle bie mɔ anu, titile Europe sɔlɔ nehane yɛɛ Britain, bɛtete bɛ menli ne, ɛnganga mrenya, wɔ adenle mɔɔ maa bɛfea bɛ nganeɛdelɛ zo, bɛdi ye bɛ kunlu na bɛnla ye ali la azo. Noko asoo ɔle nvonleɛ kɛ ɛkɛli nyane wɔ mekɛ mɔɔ wɔ kulovolɛ bie ɛwu la ɔ? Duzu a Baebolo ne ka ye ɛhye anwo a?

Menli Mɔɔ Zunle wɔ Baebolo ne Anu

Hibuluma mɔɔ de Mɛdetɛlenia aduduleɛ maanzinli nu, mɔɔ le menli mɔɔ da bɛ nganeɛdelɛ ali la a hɛlɛle Baebolo ne a. Menli mɔɔ lale bɛ nganeɛdelɛ ali wɔ bagua nu la anwo neazo dɔɔnwo wɔ Baebolo ne anu. Belemgbunli Devidi zunle ɔ ra Amenɔn mɔɔ bɛhunle ye la. Nɔhalɛ nu, Baebolo ne ka kɛ: “Bɛdukuele nuhua bɛzunle bɛmanle belemgbunli . . . zunle bie.” (2 Samoɛle 13:28-39) Devidi zunle ɔ ra maamɔvo Abesalɛm bɔbɔ mɔɔ bɔle mɔdenle kɛ ɔdie belemgbunlililɛ ne yeavi ɔ sa nu la wɔ ye ewule nu. Baebolo ne bɔ yɛ amaneɛ kɛ: “Nyane hanle belemgbunli ne [Devidi] kpole kpalɛ. Ɔhɔle ekpumgbunli ne mɔɔ wɔ anuhɔlɛ kpole ne ati zo la anu na ɔhɔzunle. Mɔɔ ɔkɔ kɔsɔɔti la ɛnee ɔlɛsu kɛ, ‘O me ra Abesalɛm, me ra, me ra Abesalɛm! Ɛnee ɛmmaa mame menwu, o me ra, me ra Abesalɛm.’” (2 Samoɛle 18:33) Devidi zunle kɛmɔ selɛ biala kɛzu la. Na nea kɛzi ɔyɛ a awovolɛ te nganeɛ kɛ anrɛɛ bɛmɛ bɛwule tɛla kɛ bɛ mra kɛwu a! Ɔnle kɛ ɔba ye kɛ kakula bawu kolaa na ye awovolɛ awu.

Duzu a Gyisɛse yɛle wɔ mekɛ mɔɔ ɔ gɔnwo Lazalɛse wule la ɛ? Mɔɔ ɔdwule ye nla ne anwo la ɔzunle. (Dwɔn 11:30-38) Nzinlii, Mɛle mɔɔ vi Magedala la zunle wɔ mekɛ mɔɔ ɔhɔle Gyisɛse sɛka ne azo la. (Dwɔn 20:11-16) Nɔhalɛ nu, Keleseɛnenli mɔɔ lɛ ewudwazo anyelazo mɔɔ Baebolo ne ka  nwolɛ edwɛkɛ nwo ndelebɛbo la ɛnli nyane ɛmmaa ɔmbo zo, kɛmɔ menli mɔɔ ɛnlɛ Baebolo ngyinlazo kpalɛ biala wɔ diedi mɔɔ bɛlɛ ye wɔ gyinlabelɛ mɔɔ mɔwuamra wɔ nu anwo la yɛ la. Noko kɛ sonla mɔɔ lɛ nganeɛdelɛ la, nɔhalɛ Keleseɛnenli mɔɔ lɛ ewudwazo anyelazo bɔbɔ la, di ye dɔvolɛ bie ewule nwo nyane na ɔsu ye.​—1 Tɛsalonaekama 4:13, 14.

Ɔwɔ Kɛ Ɛsu Anzɛɛ Ɔnle Kɛ Ɛsu

Na mɔɔ yɛyɛ ye ɛnɛ noko la ɛ? Asoo ɔyɛ se ɔmaa wɔ anzɛɛ ɔyɛ wɔ nyiane kɛ ɛkɛla wɔ nganeɛdelɛ ali? Duzu a menli mɔɔ tu folɛ la kile kɛ ɔle kpalɛ a? Fane dɔɔnwo ne ala, adwenle mɔɔ bɛlɛ ye ɛnɛ la si tete Baebolo nu nrɛlɛbɛ edwɛkɛ mɔɔ bɛluale sunsum ne azo bɛhɛlɛle la azo ala. Bɛka kɛ yɛmmadi nyane wɔ yɛ kunlu, yɛla ye ali. Na ɛhye maa yɛkakye mrenya nɔhavoma mɔɔ dɛnlanle aze tete ne mɔɔ le kɛ Dwobu, Devidi, nee Gyɛlɛmaya mɔɔ yɛnwu bɛ nganeɛdelɛ mɔɔ bɛlale ye ali wɔ Baebolo ne anu la. Ɔda ali  wienyi kɛ bɛanvea bɛ nganeɛdelɛ zo. Ɛhye ati, nrɛlɛbɛ ɛnle nu kɛ yɛkɛde yɛ nwo yɛkɛvi menli nwo. (Mrɛlɛbulɛ 18:1) Nɔhalɛ nu, asolo maanle biala nee adenle mɔɔ bɛfa zo bɛda nyanelilɛ ali wɔ nu la, yɛɛ eza ɔgyi ɛzonlenlɛ nu diedi * mɔɔ wɔ ɛkɛ ne la noko azo.

Na saa ɔyɛ wɔ kɛ ɛzu ɛ? Ɔle sonla subane kɛ ɔkɛzu. Kakye kɛ mekɛ mɔɔ Lazalɛse wule la, “nyane kpole hanle [Gyisɛse] . . . Gyisɛse zunle.” (Dwɔn 11:33, 35) Ɔyɛle ɛhye ɔvale ɔhilele kɛ awie dɔvolɛ wu a ɔkola ɔsu.

Saa dɔvolɛ bie wu a ɔle kpalɛ kɛ ɛbali nyane na wɔazu

Mɔɔ dole ninli bie mɔɔ bɛfɛlɛ ye Anne, mɔɔ SIDS (Sudden Infant Death Syndrome [Ngakula Arɛlevilɛ nu Ewule]) hunle ɔ ra adɔma Rachel la foa edwɛkɛ ɛhye azo. Ɔ hu hanle kɛ mɔɔ si me nwo la a le kɛ: “Me nee Anne yɛ mu nwiɔ biala anzu ɛzɛne ne abo. Menli mɔɔ ɛha la biala zunle.” Anne hilele ɛhye anu kɛ: “Ɔle zɔ, noko mezu kpole kpalɛ memaa yɛ mu nwiɔ. Ɔhanle me kpalɛ wɔ mekɛ mɔɔ edwɛkɛ ne zile na dapɛne ekyi guale nu wɔ kenle ko mɔɔ ɛnee me ngomekye a mewɔ sua nu la. Menzunle kenle ko demua ne kɔsɔɔti. Na medie medi kɛ ɔboale me. Ɔmanle me nwo dɔle me. Ɛnee ɔwɔ kɛ mesu me ra ne mɔɔ ɛwu la. Medie meto nu bɔkɔɔ kɛ ɔwɔ kɛ bɛmaa menli mɔɔ ɛlɛdi nyane la nyia adenle su. Ɔwɔ nuhua kɛ menli ta ka kɛ ‘mmasu’ ɛdeɛ noko yemɔ ɛmboa kpalɛ biala.”

Mɔɔ Bie mɔ Yɛ La

Duzu a bie mɔ yɛ wɔ mekɛ mɔɔ bɛ dɔvolɛ bie ewule ɛlɛmaa bɛali nyane la ɛ? Kɛ neazo la, suzu mɔɔ dole Juanita la anwo. Ɔze kɛzi adɔma ewule yɛ nyane la. Ɔ ko ɛkpɔne fane nnu. Akee ɔnrenzɛle bieko. Yemɔti ɔnyɛ azibɛnwo kɛ ɔ rɛle bɔle wɔ mekɛ mɔɔ kale esiane manle bɛvale ye bɛhɔdole asopiti la. Ye dapɛne nwiɔ anzi, ɔ ko hanle ye mɔɔ ɛnee ɔ ra ne ɛtɛtinle a. Yeangyɛ biala yɛɛ ɔwole Vanessa a​—ɛnee ye ɛlomboɛ le kilogilame 0.9. Juanita hanle kɛ, “Me nye liele kpole kpalɛ.” Ɔdoale zolɛ kɛ, “Akee medame mewo me ra!”

 Noko ye anyelielɛ ne angyɛ. Ye kenle nna ne azo Vanessa wule. Juanita hanle kɛ: “Meyɛ mgbane. Me ra ne ɛwu. Mendele nganeɛ kɛ medɔ sinli. Mɔɔ ɛnee ɔyɛ nyane bɔbɔ la a le kɛ mekɛra sua nu na mekɛhɔ sua ne mɔɔ yɛziezie yɛmaa Vanessa la anu mekɛhɔnwu ngakula adɛladeɛ mɔɔ metotɔ memaa ye la. Wɔ siane ekyi mɔɔ doɔdoa zo la anu, mɔɔ zile kenle mɔɔ menwole ye la gyinlegyinlanle me nye zo. Ɛnee memkpondɛ kɛ mete awie biala ane bɔbɔ.”

Asoo ɔle nganeɛdelɛ mɔɔ bo zo ɔ? Bie a ɔbayɛ se kɛ menli kɛde ɔ bo, noko menli mɔɔ le kɛ Juanita mɔɔ edwɛkɛ zɛhae bie ɛdo bɛ la kilehile nu kɛ nyane mɔɔ bɛlile ye wɔ bɛ ra adɔma ne anwo la le kɛ mɔɔ anrɛɛ bɛbali ye wɔ awie mɔɔ nyinle na yeawu la anwo ala. Bɛka kɛ, mekɛ tendenle kolaa na bɛawo kakula bie la ye awovolɛ bɔ ɔ bo nyia ɔ nwo ɛlɔlɛ. Kakula ne nee ɔ nli nyia abusuabɔlɛ titile. Saa zɔhane kakula ne wu a, ɔ nli te nganeɛ kɛ sonla mumua ɛwu. Na ɛhye a ɔwɔ kɛ menli nwu ye a.

Kɛzi Ɛyavalɛ nee Fɔlɛbualɛ Kola Ka Wɔ La

Ninli fofolɛ hanle nganeɛ mɔɔ ɔdele wɔ mekɛ mɔɔ bɛhanle bɛhilele ye kɛ ahonle ewule ɛhu ɔ ra nrenya mɔɔ ɛli ɛvolɛ nsia arɛlevilɛ nu la. “Mendele nganeɛ ngakyile dɔɔnwo​—menyɛle titilii, ɛnee menlie menli, mendele fɔlɛlilɛ nganeɛ, yɛɛ menvale me hu nee dɔketa ne anwo ɛya kɛ bɛannwu kɛzi ɛnee ye ewule ne anu yɛ se la.”

Ɛyavalɛ bahola ayɛ nyanelilɛ nwo sɛkɛlɛneɛ bieko. Ɔbahola yeayɛ dɔketama nee nɛɛsema anwo ɛya, ɔlua nganeɛ mɔɔ bɛte kɛ anrɛɛ ɔwɔ kɛ bɛyɛ dɔɔnwo bɛboa ahenle mɔɔ ɛwu la ati. Anzɛɛ ɔbahola yeayɛ agɔnwolɛma nee mbusua mɔɔ bie mɔ ka anzɛɛ yɛ ninyɛne mɔɔ ɛnle kpalɛ la anwo ɛya. Bie mɔ fa ahenle mɔɔ ɛwu la anwo ɛya kɛ ɔbule ɔ nye ɔguale ye kpɔkɛdelɛ zo la. Stella ka kɛ: “Mekakye kɛ menvale me hu anwo ɛya ɔluakɛ ɛnee meze kɛ anrɛɛ ɔbahola yeayɛ nwolɛ debie. Ɛnee ɔnde kpɔkɛ fee zɛhae, noko ɔbule ɔ nye ɔguale dɔketa ne kɔkɔbɔlɛ ne azo.” Ɔdwu mekɛ ne bie noko a bɛfa ahenle mɔɔ ɛwu la anwo ɛya ɔluakɛ ye ewule ne fa adesoa to ahenle mɔɔ ɔkɛgyakyi ye ɔ nzi la anwo zo.

Ɛya maa menli bie mɔ bua bɛ nwo fɔlɛ​—bɛyɛ ɛhye bɛfa bɛkile ɛya mɔɔ bɛva la. Bie mɔ fu bɛ nwo wɔ bɛ dɔvolɛ ne ewule nwo. Bɛka kɛ: “Saa memanle ɔhɔnwunle dɔketa ne ndɛ” anzɛɛ “memanle  ɔhɔnwunle dɔketa fofolɛ” anzɛɛ “memanle ɔnleanle ye kpɔkɛdelɛ zo boɛ” a “anrɛɛ yeanwu.”

Kakula ewule yɛ nyane kpole​—arɛlekyekyelɛ nee ndelebɛbo kpalɛ bahola aboa awovolɛ ne mɔ

Bie mɔ bua bɛ nwo fɔlɛ kpole, titile saa bɛ dɔvolɛ ne wule arɛlevilɛ nu, mɔɔ bɛ nye ɛnla la a. Bɛbɔ ɔ bo bɛkakye mekɛ bie mɔɔ bɛvale ahenle mɔɔ ɛwu la anwo ɛya anzɛɛ bɛ nee ye zule kpolera la. Anzɛɛ bie a bɛte nganeɛ kɛ bɛanyɛ mɔɔ anrɛɛ ɔwɔ kɛ bɛyɛ bɛmaa ahenle mɔɔ ɛwu la.

Kɛzi ninlima dɔɔnwo di nyane kyɛ la foa mɔɔ menli mɔɔ ze ɛhye anwo edwɛkɛ la anu dɔɔnwo ka la azo kɛ, saa kakula wu a, ɔmaa awovolɛ ne mɔ te nganeɛ kɛ bɛminli debie kpole, titile ninli ne.

Saa Wɔ Bokavolɛ Wu A

Debie bieko mɔɔ yɛ nyane kpole la a le kɛ bokavolɛ bie kɛwu, titile saa bɛ mu nwiɔ bɛbɔle nu bɛbɔle ɛbɛla a. Ɔbahola yeahile bɛ azedɛnlanlɛ, adendulɛ, gyima, ninyɛne mɔɔ bɛfa bɛdielie bɛ nye, nee kɛzi bɛboa bɛ nwo bɛ nwo la awieleɛ.

Eunice hilehilele mɔɔ zile wɔ mekɛ mɔɔ ahonle ewule hunle ɔ hu arɛlevilɛ nu la anu. “Wɔ dapɛne mɔɔ lumua la anu, menyɛle titilii kɛ asɛɛ me sonlabaka ne ɛgyakyi gyimayɛlɛ la. Me nloa anu dole yɛɛ ɛnee mende debie ɛvuanlɛ. Me adwenle agyinla ɛleka ko. Ɔluakɛ menwunle mɔdenle mɔɔ bɛbɔle bɛluale  ndenle ngakyile zo kɛ bɛyɛ me hu ayile la ati, ye ewule ne anzi me nwo. Noko akee, me nwo bubule me kpole, kɛ asɛɛ me nye gyi kale bie mɔɔ ɛlɛkɔ ahɔdɔ kuma bie anu la anwo na mengola nwolɛ ɛhwe yɛ la.”

Asoo ɔzunle? “Ɛhɛe, menzunle, titile wɔ mekɛ mɔɔ mengengale arɛlekyekyelɛ ngɛlata ɛya ɛya mɔɔ me sa hanle bɛ la. Ko biala manle menzunle. Ɔboale me ɔmanle mengyinlanle mekɛ mɔɔ ɛha la anu. Noko edwɛkɛ biala mɔɔ bɛbizale me wɔ kɛzi mete nganeɛ la anwo la angola amboa me. Ɔda ali kɛ me nwo yɛle alɔbɔlɛ.”

Duzu a boale Eunice manle ɔgyinlanle ye nyanelilɛ ne anloa a? Ɔka kɛ, “Mekanwu ye la ɛnee mezi kpɔkɛ kɛ mebahɔ zo meabɔ me ɛbɛla.” Eza ɔhanle kɛ, “Noko akee, debie mɔɔ tɛgyegye me la a le mekɛ mɔɔ mekɛhakye kɛ me hu kulo ngoane kpole, na akee ye ngoane ɛvi ɔ sa la.”

“Mmamaa Awie mɔ Kile . . . ”

Leavetaking​—When and How to Say Goodbye buluku ne kɛlɛvolɛma tu folɛ kɛ: “Mmamaa awie mɔ kile kɛzi ɔwɔ kɛ ɛyɛ wɔ nyɛleɛ anzɛɛ ɛte nganeɛ la. Awie biala lɛ kɛzi ɔdi nyane la. Bie mɔ bamaa wɔanwu kɛ bɛsuzu kɛ ɛlɛdi nyane somaa anzɛɛ ɛnli nyane kpalɛ. Fa kyɛ bɛ na ye fi wɔ adwenle nu. Saa ɛbɔ mɔdenle kɛ ɛdi nyɛleɛ bie mɔɔ awie mɔ anzɛɛ menli ekpunli bie ka la azo a, ɔnrɛmaa ɛnrɛhola ɛnrɛli nyane mɔɔ ɛlɛdi la azo.”

Nɔhalɛ nu, asolo kɛzi awie biala di nyane la. Tɛ mɔɔ yɛkulo kɛ yɛkile la a le kɛ adenle mɔɔ awie fa zo yɛ ye ɛdeɛ la le kpalɛ tɛla awie ɛdeɛ. Noko akee, saa ahenle mɔɔ ɛlɛdi nyane la angyakyi a ɔbava ngyegyelɛ yeara. Saa ɔba ye zɛhae a, ɔbahyia moalɛ yeavi agɔnwolɛma mɔɔ se anwunvɔne la ɛkɛ. Baebolo ne ka kɛ: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.” Ɛhye ati mmasulo kɛ ɛbakpondɛ moalɛ, ɛbadendɛ, yɛɛ ɛbazu.​—Mrɛlɛbulɛ 17:17.

Nvonleɛ biala ɛnle nyane mɔɔ awie bali wɔ ye dɔvolɛ bie ewule nwo la anwo, yɛɛ ɔnle ɛtane kɛ ɛbamaa menli anwu kɛ ɛlɛdi nyane. Noko kpuyia bie mɔ wɔ ɛkɛ mɔɔ hyia nyelebɛnloa a: ‘Kɛzi mebahola meagyinla me nyanelilɛ nloa ɛ? Asoo ɔle kpalɛ kɛ mekɛde fɔlɛbualɛ nganeɛ anzɛɛ mekɛva ɛya? Kɛzi ɔwɔ kɛ medi nganeɛdelɛ ɛhye mɔ anwo gyima ɛ? Duzu a baboa me amaa meagyinla ewule ne nee nyanelilɛ ne anloa ɛ?’ Foa ne mɔɔ doa zo la babua kpuyia ɛhye mɔ nee fofolɛ mɔɔ boka nwo la.

^ ɛden. 8 Kɛ neazo la, Yorubama mɔɔ wɔ Nigeria la lɛ diedi mɔɔ kile kɛ saa awie wu a ɔsia ɔba ɔmaa bɛwo ye bieko. Ɛhye ati saa ɛrɛladane bie ara wu a, ɔdi nyane kpole kpalɛ noko ɔyɛ ɛhye wɔ mekɛ ezinra bie ala anu, ɔluakɛ Yorubama ta ka kɛ: “Nzule ne a ɛbutu a. Na awa ne mɔɔ, ɔtɛkpakyele.” Edwɛkɛ ɛhye mɔɔ Yorubama ka la kile kɛ, awa ne mɔɔ nzule ne wɔ nu, ɛrɛladane ne, kola wo kakula fofolɛ​—mɔɔ bie bɔbɔ a ɔkola ɔyɛ kɛ kakula ne mɔɔ ɛwu la a ɛzia ɛra ɛmaa bɛwo ye bieko a. Gyihova Alasevolɛ ɛnli amaamuo mɔɔ gyi diedi mgbane mɔɔ vi adalɛ adwenle mɔɔ kile kɛ ɛkɛla ne ɛnwu anzɛɛ saa sonla wu a ɔsia ɔba ɔmaa bɛwo ye bieko, mɔɔ nee Baebolo nu edwɛkɛ ɛnle ko la anzi.​—Nolobɔvo ne 9:5, 10; Yizikeɛle 18:4, 20.