Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Paladaese Azɛlɛ Ne

Paladaese Azɛlɛ Ne

Gyihova baye ninyɛndane mɔɔ Seetan ɛyɛ la kɔsɔɔti avi ɛkɛ ne bɔkɔɔ. Gyihova ɛva Gyisɛse ɛzie azɛlɛ ye kɔsɔɔti azo belemgbunli. Wɔ Gyisɛse tumililɛ bo, azɛlɛ ne bayɛ paladaese.—Daneɛle 7:13, 14; Luku 23:43.

Gyihova a ɛva ninyɛne ɛhye mɔ ɛbɔ ɛwɔkɛ:

  • ALEƐ BABU: “Azɛlɛ ye ɛhye aleɛ dɔɔnwo ɛmaa yɛ, Nyamenle, yɛ Nyamenle ne, ɛyila yɛ.” “Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo.”—Edwɛndolɛ 67:6; 72:16.

  • KONLE ƐNLE ƐKƐ BIEKO: ‘Bɛrɛla, baranlea Gyihova gyima mɔɔ ɛli . . . Yemaa bɛgyakyi konle wɔ azɛlɛ ye amuala azo.’—Edwɛndolɛ 46:8, 9.

  • ƐTANEVOLƐMA BAVI ƐKƐ: “Bɛbaminli amumuyɛma abo zo . . . Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye.”—Edwɛndolɛ 37:9, 10.

  •  ANWODOLƐ, NYANE, ANZƐƐ EWULE ƐNLE ƐKƐ BIEKO: “Anyenzinlirama anye badukue, anzondilirama anzo badukue. Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.”—Ayezaya 35:5, 6.

    “Nyamenle mumua ne nee bɛ badɛnla na yeayɛ bɛ Nyamenle. Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:3, 4.

Gyihova ɛnle kɛ Seetan nee sunsum evinli ne mɔ la, ɔmbɔ adalɛ. Ɛwɔkɛ biala mɔɔ ɔbɔ la ba nu. (Luku 1:36, 37) Gyihova kulo wɔ na ɔkpondɛ kɛ ɛtɛnla Paladaese ne mɔɔ ɔbayɛ la anu bie. Yemɔti kpondɛ Gyihova Alasevolɛ ne mɔ na sukoa nɔhalɛ mɔɔ wɔ Nyamenle Edwɛkɛ ne anu la anwo ninyɛne dɔɔnwo. Saa ɛfa nɔhalɛ ne ɛbɔ wɔ ɛbɛla a, ɛbanyia fanwodi wɔavi adalɛ ngilehilelɛ nee diedi mgbane nwo. Mekɛ ɛlɛkɔ la, bɛbalie wɔ bɛavi ɛtane nee ewule akɛlɛ ɛzonlenlɛ bo. Na kɛmɔ Gyisɛse hanle la: “Bɛbanwu nɔhalɛ ne, na nɔhalɛ ne bamaa bɛanyia bɛ ti.”—Dwɔn 8:32.