Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 Ɛzukoalɛdeɛ 24

Kɛzi Yɛbɔ Yɛ Ewiade Amuala Gyima Ne Anwo Kakɛ Ɛ?

Kɛzi Yɛbɔ Yɛ Ewiade Amuala Gyima Ne Anwo Kakɛ Ɛ?

Nepal

Togo

Britain

Yɛ ahyehyɛdeɛ ne yɛ Baebolo nee mbuluku gyɛne mgbe dɔɔnwo ɛvolɛ biala na ɔfa ɔmaa mɔɔ ɔnlie ezukoa a. Yɛsi Belemgbunlililɛ Asalo nee ɔfese ngakyile na yɛnea zolɛ. Yɛboa Bɛtɛlema nee edwɛkpatɛlɛvolɛma apenle apenle, yɛɛ yɛfa moalɛ yɛmaa wɔ esiane mekɛ nu. Yemɔti bie a ɛbabiza kɛ, ‘Kɛzi yɛnyia ezukoa yɛfa yɛyɛ ɛhye mɔ kɔsɔɔti ɛ?’

Yɛnlie taete, adwule, anzɛɛ ezukoa. Kakɛ mɔɔ yɛbɔ ye wɔ edwɛkɛhanlɛ gyima ne anwo la le kpole ɛdeɛ, noko yɛnlielie ezukoa. Mɔɔ bo ɛvoya mɔɔ ɛze ɛhɔ la anu, Ɛzinzalɛ Arane ne mɔɔ tɔ zo nwiɔ la hanle kɛ yɛdie yɛdi kɛ Gyihova gyi yɛ nzi yemɔti “yɛnrɛzɛlɛ anzɛɛ yɛnrɛkpa menli kyɛlɛ kɛ bɛboa yɛ”​—na yɛtɛyɛle zɔ ɛlɛ!​—Mateyu 10:8.

Ndoboa a yɛfa yɛyɛ yɛ gyima ne a. Menli dɔɔnwo anye die yɛ Baebolo ngilehilelɛ gyima ne anwo na bɛye nwolɛ ndoboa. Alasevolɛ ne mɔ fi anyelielɛ nu fa bɛ mekɛ, bɛ anwosesebɛ, bɛ ezukoa nee ninyɛne gyɛne boa maa bɛyɛ Nyamenle ɛhulolɛdeɛ wɔ azɛlɛ ye kɔsɔɔti azo. (1 Edwɛkɛsisilɛ 29:9) Wɔ Belemgbunlililɛ Asalo nee yɛ nyianu ngyikyi yɛɛ mgbole bo, bɛlɛ ndoboa nlɛka wɔ ɛkɛ amaa bɛdabɛ mɔɔ bɛkulo kɛ bɛye ndoboa la ahola ayɛ zɔ. Anzɛɛ ɛbahola wɔalua yɛ wɛbsaete, jw.org anzɛɛ Belemgbunlililɛ Asalo mɔɔ bikye wɔ la azo wɔaye ndoboa. Fane dɔɔnwo ne ala, menli mɔɔ ye ndoboa la ɛnle sukoavolɛma, bɛle kɛ kunlavolɛ raalɛ ehyianli ne mɔɔ vale ɛkpɔsɛba nwiɔ guale ɛzonlenlɛ sua ne gya ne anu mɔɔ Gyisɛse hanle ɔ nwo edwɛkɛ kpalɛ la. (Luku 21:1-4) Ɛhye ati, awie biala bahola ‘ade ezukoa bie ado ahane’ kɛ ‘ɔfa mɔɔ yezuzu nwo wɔ ye ahonle nu la yeamaa.’​—1 Kɔlentema 16:2; 2 Kɔlentema 9:7.

Yɛdie yɛdi kɛ Gyihova bahɔ zo aha menli mɔɔ kulo kɛ ‘fa bɛ anwonyia di Gyihova eni’ la ahonle yeamaa bɛaboa Belemgbunlililɛ gyima ne, amaa ye ɛhulolɛdeɛ ayɛ ɛkɛ.​—Mrɛlɛbulɛ 3:9.

  • Duzu a maa yɛ ahyehyɛdeɛ ne yɛ ngakyile fi ɛzonlenlɛ mɔɔ ɛha la anwo a?

  • Kɛzi bɛfa ndoboa mɔɔ bɛye la bɛdi gyima ɛ?