Spain

Belarus

Hong Kong

Peru

Kolaa na Gyisɛse awu la, ɔbɔle ye nolo kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.” (Mateyu 24:14) Noko, kɛzi bɛbayɛ ewiade amuala edwɛkɛhanlɛ gyima ɛhye ɛ? Ɔlua Gyisɛse neazo ne mɔɔ ɔyɛle wɔ mekɛ mɔɔ ɛnee ɔwɔ azɛlɛ ye azo mɔɔ yɛbazukoa la azo.—Luku 8:1.

Yɛbɔ mɔdenle yɛkɔ menli ne ɛkɛ wɔ bɛ azua nu. Gyisɛse tetele ye ɛdoavolɛma ne kɛ bɛha edwɛkɛ ne wɔ azua nu. (Mateyu 10:11-13; Gyima ne 5:42; 20:20) Bɛmanle ɛvoya ne mɔɔ lumua la anu edwɛkpakavolɛma azɛlɛsinli mɔɔ bɛbaha edwɛkɛ ne wɔ nu la. (Mateyu 10:5, 6; 2 Kɔlentema 10:13) Ɛnɛ noko, bɛhyehyɛ yɛ edwɛkɛhanlɛ gyima ne, na bɛmaa asafo biala ɛleka mɔɔ ɔbayɛ ye gyima la. Ɛhye ka yɛ maa yɛdi Gyisɛse edwɛkɛ mɔɔ ɔhanle kɛ, “yɛha ɔ nwo Edwɛkpa ne yehile menli kɔsɔɔti, na yɛli ɔ nwo daselɛ” la azo.—Gyima ne 10:42.

Yɛbɔ mɔdenle yɛka edwɛkɛ ne yɛkile menli wɔ ɛleka biala. Gyisɛse yɛle ɛhye anwo neazo ɔlua edwɛkɛ ne mɔɔ ɔhanle ye wɔ bagua nu, mɔɔ bie a le ɛnweazo anzɛɛ bula zo la. (Maake 4:1; Dwɔn 4:5-15) Yɛdayɛ noko yɛka Baebolo ne anu edwɛkɛ ne yɛkile menli wɔ ɛleka biala mɔɔ ɔkɛyɛ boɛ la​—gua zo, gyima gyima nu, kale agyinlaleɛ anzɛɛ telefuu zo. Eza yɛdi yɛ kpalɛzoamra, yɛ gɔnwo mɔ gyimayɛvoma, sukuluma nee yɛ mbusua daselɛ wɔ mekɛ mɔɔ yɛkɛnyia nwolɛ adenle la. Mɔdenlebɔlɛ ɛhye mɔ kɔsɔɔti ɛmaa menli mgbe dɔɔnwo mɔɔ wɔ aleɛabo la ɛde “ngoanelielɛ” edwɛkpa ne.—Edwɛndolɛ 96:2.

Nwane mɔ a ɛsuzu kɛ ɛbahola wɔaha Nyamenle Belemgbunlililɛ ne anwo edwɛkpa ne nee kɛzi ɔbaboa bɛ kenlebie la wɔahile bɛ a? Mmafea anyelazo edwɛkɛ ɛhye azo. Ɔkɛyɛ boɛ a, yɛ ye ndɛndɛ ka kile bɛ!

  • “Edwɛkpa” boni a ɔwɔ kɛ bɛbɔ ye nolo a?

  • Kɛzi Gyihova Alasevolɛ ɛlɛsukoa adenle mɔɔ Gyisɛse luale zo hanle edwɛkɛ ne la ɛ?