Nowa

Ebileham nee Sɛla

Mosisi

Gyisɛse Kelaese

Menli dɔɔnwo dwenle kɛ Gyihova Alasevolɛ le ɛzonlenlɛ fofolɛ bie duma. Noko akee, mɔɔ bo ɛvolɛ 2,700 mɔɔ ɛze ɛhɔ la, ɛnee bɛfɛlɛ nɔhalɛ Nyamenle ne azonvolɛ kɛ ye “alasevolɛ.” (Ayezaya 43:10-12) Badwu 1931, ɛnee bɛfɛlɛ yɛ Baebolo Sukoavoma. Duzu ati a yɛvale duma Gyihova Alasevolɛ yɛdole yɛ nwo zo ɛ?

Ɔmaa bɛnwu yɛ Nyamenle ne. Tete bɛsanloangɛlɛlera ne mɔ kile kɛ, Nyamenle duma, Gyihova ne, finde fane dɔɔnwo wɔ Baebolo ne anu. Wɔ Baebolo dɔɔnwo ne ala anu, bɛva amodinli mɔɔ le kɛ, Awulae anzɛɛ Nyamenle la bɛzie duma ɛhye agyakɛ anu. Noko, nɔhalɛ Nyamenle mumua ne yele ɔ nwo hilele Mosisi kɛ ye duma a le, Gyihova, na ɔzele kɛ: ‘Ɛhye a le me duma dahuu a.’ (Adendulɛ 3:15) Wɔ adenle ɛhye azo ɔyɛle ɔ nwo ngakyile wɔ adalɛ nyamenle kɔsɔɔti anwo. Ɔyɛ yɛ fɛ kɛ Nyamenle duma nwuanzanwuanza ne la yɛ nwo zo a.

Ɔmaa bɛnwu yɛ gyima ne. Tete ne, menli dɔɔnwo mɔɔ bɔ ye wɔ Ebɛle anwo zo la, lile diedi mɔɔ bɛlɛ ye wɔ Gyihova anu la anwo daselɛ. Wɔ ɛvoya dɔɔnwo anu, Nowa, Ebileham, Sɛla, Mosisi, Devidi nee menli gyɛne rabokale “dasevolɛma pemgbenleamgbe” ɛhye mɔ anwo. (Hibuluma 11:4–12:1) Kɛmɔ awie bahola ali daselɛ wɔ kɔɔto amaa awie mɔɔ ɛnze nwolɛ bie la, yɛdayɛ noko yɛsika yɛ bo kɛ yɛmaa bɛanwu yɛ Nyamenle ne anwo nɔhalɛ ne.

Yɛlɛsukoa Gyisɛse. Baebolo ne fɛlɛ ye “nɔhalɛ dasevolɛ ne.” (Yekile 3:14) Gyisɛse mumua ne hanle kɛ ‘yela Nyamenle duma ne ali’ na ɔhɔle zo ɔlile Nyamenle anwo “nɔhalɛ ne anwo daselɛ.” (Dwɔn 17:26; 18:37) Ɛhye ati, ɔwɔ kɛ Kelaese nɔhalɛ ɛdoavolɛma fa duma Gyihova ne to bɛ nwo zo, na bɛda ye ali. Ɛhye a Gyihova Alasevolɛ ɛlɛbɔ mɔdenle kɛ bɛbayɛ a.

  • Duzu ati a Baebolo Sukoavoma ne vale duma Gyihova Alasevolɛ dole bɛ nwo zo ɛ?

  • Mekɛ tendenle nyɛ a Gyihova ɛnyia alasevolɛ wɔ azɛlɛ ye azo a?

  • Nwane a le Gyihova Dasevolɛ kpole kpalɛ ne a?