Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 21

Bɛtɛle A Le Duzu?

Bɛtɛle A Le Duzu?

Nvoninli Gyimayɛlɛleka, U.S.A.

Germany

Kenya

Colombia

Bɛtɛle, le Hibulu duma, mɔɔ abo kile ‘Nyamenle Sua nu.’ (Mɔlebɛbo 28:17, 19) Ɔle duma mɔɔ fɛta azua ngakyile mɔɔ Gyihova Alasevolɛ ɛzi wɔ ewiade amuala na bɛfa edwɛkɛhanlɛ ne anwo adehilelɛ nee moalɛ bɛmaa wɔ ɛkɛ la. Neazo Eku ne sonle wɔ asafo ti mɔɔ wɔ New York State, U.S.A. la, ɛkɛ ne a bɛwɔ na bɛnea ɔfese mɔɔ wɔ maanle ngakyile nu la gyimayɛlɛ zo a. Bɛfɛlɛ menli mɔɔ bɔ nu yɛ gyima wɔ ɛleka ɛhye mɔ la kɛ Bɛtɛle abusua. Bɛde ɛleka ko yɛɛ bɛyɛ gyima bɛbɔ nu, bɛdi aleɛ bɛbɔ nu na bɛfa koyɛlɛ bɛsukoa Baebolo ne bɛbɔ nu kɛ abusua.​—Edwɛndolɛ 133:1.

Ɔle ɛleka kɛnlɛma mɔɔ abusua ne anu amra tu bɛ nwo maa la. Wɔ Bɛtɛle biala anu, Keleseɛne mrenya nee mraalɛ mɔɔ ɛlɛyɛ Nyamenle ɛhulolɛdeɛ na bɛlɛfa bɛ mekɛ kɔsɔɔti bɛayɛ Belemgbunlililɛ gyima la a wɔ ɛkɛ a. (Mateyu 6:33) Bɛndua bɛ kakɛ, noko bɛmaa bɛ kɔsɔɔti sua nee aleɛ yɛɛ ezukoa ekyi mɔɔ boa maa bɛtua kakɛ mɔɔ bɛkɛbɔ la. Awie biala mɔɔ wɔ Bɛtɛle la lɛ gyima mɔɔ ɔyɛ a, bie mɔ yɛ gyima wɔ ɔfese, egyaade anzɛɛ ɛleka mɔɔ bɛdi aleɛ la. Bie mɔ yɛ gyima wɔ ɛleka mɔɔ bɛyɛ mbuluku la, bie mɔ siezie sua nu, bie mɔ kpo ninyɛne, bie mɔ siezie ninyɛne mɔɔ ɛzɛkye anzɛɛ bɛyɛ ninyɛne gyɛne.

Ɔle ɛleka mɔɔ bɛyɛ gyima dahuu bɛfa bɛboa Belemgbunlililɛ nolobɔlɛ gyima ne. Bɛtɛle biala bodane titile a le kɛ bɛmaa menli dɔɔnwo anwu Baebolo ne anu nɔhalɛ ne. Nwolɛ neazo ko a le brohyua ɛhye. Neazo Eku ne a nleanle manle bɛhɛlɛle, bɛvale bɛhɔmanle menli dɔɔnwo mɔɔ bahile ɔ bo wɔ ewiade amuala, bɛvale milahyinli mɔɔ yɛ mbuluku ndɛndɛ wɔ Bɛtɛle bie mɔ anu la bɛyɛle, na bɛvale bɛhɔle asafo mɔɔ bo 110,000 la anu a. Wɔ ɛhye mɔ biala ɛyɛlɛ nu, Bɛtɛle mbusua ne fa moalɛ mɔɔ hyia la boa gyima mɔɔ hyia kpalɛ tɛla biala​—edwɛkpa ne nolobɔlɛ ne.​—Maake 13:10.

  • Nwane mɔ a sonle wɔ Bɛtɛle a, na kɛzi bɛnea bɛ ɛ?

  • Gyima mɔɔ hyia la boni a bɛyɛ wɔ Bɛtɛle biala anu bɛfa bɛboa a?