Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 Ɛzukoalɛdeɛ 23

Kɛzi Bɛkɛlɛ Yɛ Mbuluku Ne Mɔ Na Bɛkile Ɔ Bo Ɛ?

Kɛzi Bɛkɛlɛ Yɛ Mbuluku Ne Mɔ Na Bɛkile Ɔ Bo Ɛ?

Kɛlɛvolɛma Gyimayɛlɛleka, U.S.A.

South Korea

Armenia

Burundi

Sri Lanka

Amaa yɛahola yɛabɔ ‘edwɛkpa’ ne nolo ‘yɛahile menli ngakyile, mbusua ekpunli, aneɛ ngakyile, nee maanle biala la,’ yɛyɛ mbuluku wɔ aneɛ kɛyɛ 750 anu. (Yekile 14:6) Kɛzi yɛkola yɛyɛ gyima kpole ɛhye ɛ? Yɛdua kɛlɛvolɛma mɔɔ vi maanle ngakyile nu nee ekpunli bie mɔɔ bɛdu bɛ nwo bɛmaa mɔɔ kile aneɛ bo la moalɛ zo a yɛyɛ zɔ a​—bɛ muala bɛle Gyihova Alasevolɛ.

Bɛdumua bɛkɛlɛ edwɛkɛ ne wɔ Nrelenza nu. Neazo Eku ne nea Kɛlɛvolɛma Gyimayɛlɛleka ne azo wɔ yɛ asafo ti ɛkɛ. Gyimayɛlɛleka ɛleka ɛhye di kɛlɛvolɛma mɔɔ sonle wɔ asafo ti nee ɔfese bie mɔ anu la gyima ne anwo ngitanwo. Kɛmɔ kɛlɛvolɛma ne vi ɛleka ngakyile la ati, ɔmaa yɛkola yɛka amaamuo biala anu edwɛkɛ mɔɔ maa maanle biala anu amra anye die yɛ mbuluku ne anwo la.

Bɛfa edwɛkɛ ne bɛkɔmaa menli mɔɔ bahile ɔ bo la. Saa bɛneɛnlea edwɛkɛ ne anu bɛwie na bɛdie bɛto nu a, bɛfa bɛdua kɔmputa zo bɛnwa menli mɔɔ bahile ɔ bo wɔ ewiade amuala, mɔɔ bɛyɛ bɛ ekpunli ngakyile na bɛkile edwɛkɛ ne abo, bɛneɛnlea nu, na bɛkenga edwɛkɛ ne bɛtie la. Bɛbɔ mɔdenle bɛkpondɛ ‘edwɛkɛ mɔɔ le nɔhalɛ’ mɔɔ bamaa Nrelenza ne anu ala ɛkɛ wɔ bɛ aneɛ ne anu la.​—Nolobɔvo ne 12:10.

Kɔmputa maa gyima ne kɔ zo ndɛndɛ. Yɛnrɛhola yɛnrɛva kɔmputa yɛnrɛzie menli mɔɔ kɛlɛ edwɛkɛ ne nee bɛdabɛ mɔɔ bɛkile ɔ bo la agyakɛ anu. Noko akee, saa bɛfa kɔmputa zo edwɛbohilelɛ nee zolɛ ninyɛne ngakyile bɛyɛ neɛnleanu a ɔmaa bɛ gyima ne kɔ zo ndɛndɛ. Gyihova Alasevolɛ yɛle Multilanguage Electronic Publishing System (MEPS) mɔɔ bɛkola bɛfa bɛkile aneɛ dɔɔnwo abo, bɛfa nvoninli bɛboka nwo na bɛsiezie ye bɛfa bɛyɛ mbuluku la.

Duzu ati a yɛbɔ mɔdenle yɛyɛ ɛhye mɔ kɔsɔɔti, bɔbɔ wɔ aneɛ mɔɔ menli ekyi bie a ka la anu ɛ? Ɔluakɛ Gyihova kpondɛ kɛ “menli kɔsɔɔti nwu nɔhalɛ ne na bɛnyia ngoane.”​—1 Temɔte 2:3, 4.

  • Adenle boni a bɛdua zo bɛkɛlɛ yɛ mbuluku ne a?

  • Duzu ati a yɛkile yɛ mbuluku ne abo yɛkɔ aneɛ dɔɔnwo anu a?