Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 3

Releehabe Nyianle Gyihova Anu Diedi

Releehabe Nyianle Gyihova Anu Diedi

Maa yɛva ye kɛ yɛwɔ Gyɛleko sua ne azo. Suakpole ɛhye wɔ Keena maanle ne anu, menli mɔɔ wɔ ɛkɛ la ɛnlɛ Gyihova anu diedi. Ɛke a raalɛ bie mɔɔ bɛfɛlɛ ye Releehabe la de a.

Mekɛ mɔɔ Releehabe le kakula bɛlɛra la, ɔdele kɛzi Mosisi manle Nyevile Kɔkɔlɛ ne anu hyɛle nwiɔ na ɔlile Yizilayɛma anyunlu ɔmanle bɛvile Yigyibiti la anwo edwɛkɛ. Eza ɔdele kɛzi Gyihova boale bɛ manle bɛhonle bɛtiale bɛ agbɔvolɛ na bɛlile konim la anwo edwɛkɛ. Akee yede kɛ Yizilayɛma ɛyɛ bɛ azokoɛleɛ wɔ Gyɛleko sua ne anzi!

Releehabe vale menli nwiɔ ne veale ɔluakɛ ɔnyianle Gyihova anu diedi

Kenle ko nɔsolɛ bie, Yizilayɛma nwiɔ hɔle Gyɛleko kɛ bɛkanleɛnlea sua ne azo. Bɛhɔle Releehabe sua nu ɛkɛ. Ɔmanle bɛ ɛleka bɛdɛnlanle. Aleɛ dwole la, Gyɛleko belemgbunli ne dele kɛ menli nwiɔ ɛra sua ne azo na bɛhɔ Releehabe sua nu ɛkɛ. Yemɔti belemgbunli ne zoanle menli kɛ bɛhɔhye bɛ. Releehabe vale menli nwiɔ ne veale ye sua ne ati zo anwuma na ɔhanle ɔhilele menli mɔɔ belemgbunli ne zoanle bɛ la kɛ: ‘Menli bie rale me sua nu ɛke, noko bɛziale na sɛnzɛne ne adɔ. Saa bɛkpo bɛ a, bɛbado bɛ wɔ adenle nu!’ Ɛze deɛmɔti Releehabe ɛlɛfa menli nwiɔ ne avea la ɔ?— Ɔboalekɛ ɔlɛ Gyihova anu diedi yɛɛ ɔze kɛ ɔbava Keena azɛlɛ ne yeamaa Yizilayɛma.

Kolaa na menli nwiɔ ne avi Releehabe ɛkɛ la, bɛbɔle ɛwɔkɛ kɛ saa bɛlɛsɛkye Gyɛleko a bɛbabɔ ɔ nee ye abusua ne anwo bane. Asoo ɛze mɔɔ bɛhanle bɛhilele ye kɛ ɔyɛ la?— Bɛhanle kɛ: ‘Fa nyɛma kɔkɔlɛ kenda wɔ nvɛnzɛlɛ ne. Saa ɛyɛ zɔ a awie biala mɔɔ wɔ wɔ sua nu ɛke la banyia ngoane.’ Releehabe yɛle mɔɔ menli nwiɔ ne hanle kɛ ɔyɛ la pɛpɛɛpɛ. Ɛze debie bieko mɔɔ zile la ɔ?—

Gyihova liele Releehabe nee ye abusua ne ngoane

Ɛhye anzi mekɛ ekyi bie anu, Yizilayɛma yɛle koonwu bɔle sua ne anwo mgbɔlɔka yiale. Wɔ kenle nsia anu bɛbɔle sua ne anwo mgbɔlɔka bɛyiale, kenle ko biala bɛkɔ ko. Noko kenle nsuu ne azo, bɛbɔle sua ne anwo mgbɔlɔka bɛyiale fane nsuu. Akee bɛ muala bɛdeanle nu kpole. Gyihova manle suakpole ne anwo bane  ne bule guale aze. Noko sua ne mɔɔ nyɛma kɔkɔlɛ ne henda ye nvɛnzɛlɛ ne anwo la ambu! Ɛnwu ye wɔ nvoninli ne anu ɔ?— Releehabe nee ye abusua ne ɛnyia ngoane!

Duzu a ɛsukoa ɛfi Releehabe ɛkɛ a?— Releehabe nyianle Gyihova anu diedi ɔlua nwanwane ninyɛne mɔɔ ɔdele kɛ yeyɛ la ati. Ɛdawɔ noko ɛlɛsukoa nwanwane ninyɛne dɔɔnwo mɔɔ Gyihova ɛyɛ la anwo debie. Asoo ɛdie ye ɛdi kɛmɔ Releehabe yɛle la?— Yɛze kɛ ɛdie ye ɛdi!

KENGA FI WƆ BAEBOLO NU