Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 10

Gyisɛse Yɛle Tieyɛ Dahuu

Gyisɛse Yɛle Tieyɛ Dahuu

Ɔnyɛ se kɛ ɛbadie wɔ awovolɛ dahuu ɔ?— Ɔdwu mekɛ ne bie a ɔyɛ se. Ɛze kɛ Gyisɛse diele Gyihova nee ye awovolɛ ɔ?— Ye neazo ne bahola aboa wɔ yeamaa wɔadie wɔ awovolɛ wɔ mekɛ bɔbɔ mɔɔ yɛ se la anu. Maa yɛzukoa ɛhye anwo debie dɔɔnwo.

Kolaa na Gyisɛse ara azɛlɛ ye azo la, ɛnee ɔ nee ɔ Ze, Gyihova a wɔ anwuma a. Noko Gyisɛse nyianle awovolɛ wɔ azɛlɛ ye azo. Bɛfɛlɛ bɛ Dwosefi nee Mɛle. Ɛze kɛzi bɛrayɛle ye awovolɛ la ɔ?—

Gyihova yele Gyisɛse ngoane vile anwuma na ɔvale ɔwulale Mɛle akunlu amaa yeawo Gyisɛse na yeahola yeadɛnla azɛlɛ ye azo. Ɛhye le nwanwane debie! Gyisɛse nyinle wɔ Mɛle akunlu kɛmɔ ngakula nyi wɔ bɛ mame mɔ akunlu la. Kɛyɛ siane ngɔnla anzi, bɛwole Gyisɛse. Kɛ ɔyɛle mɔɔ Mɛle nee ɔ hu Dwosefi rayɛle Gyisɛse awovolɛ wɔ azɛlɛ ye azo la ɛne.

Gyisɛse nyianle ɛvolɛ 12 ala la, ɔyɛle debie mɔɔ kile kɛzi ɔkulo ɔ Ze, Gyihova kpole la. Ɛhye zile wɔ mekɛ mɔɔ Gyisɛse nee ye abusua ne dule adenle tendenle hɔle Gyɛlusalɛm kɛ bɛkali Akpabɛnwo ne la. Mekɛ mɔɔ bɛlɛsia bɛara sua nu la, Dwosefi nee Mɛle anwu Gyisɛse wɔ ɛleka biala. Ɛze ɛleka mɔɔ ɛnee ɔwɔ a?—

Duzu ati a Gyisɛse hɔle asɔne sua ne anu a?

Dwosefi nee Mɛle ziale ndɛndɛ hɔle Gyɛlusalɛm na bɛkpondɛle Gyisɛse wɔ ɛleka biala. Edwɛkɛ ne gyegyele bɛ adwenle kpalɛ ɔluakɛ ɛnee bɛnnwu ye. Noko kenle nsa anzi, bɛnwunle ye wɔ asɔne sua ne anu! Ɛze deɛmɔti Gyisɛse hɔle asɔne sua ne anu la ɔ?— Ɔboalekɛ ɔbahola yeazukoa ɔ Ze, Gyihova anwo debie wɔ ɛkɛ. Ɛnee ɔkulo Gyihova na ɔkpondɛ kɛ ɔnwu kɛzi ɔbahola yeazɔ ɔ nye la. Mekɛ mɔɔ Gyisɛse nyinle na ɔyɛle nrenya bɔbɔ la ɔdiele Gyihova dahuu. Gyisɛse yɛle tieyɛ bɔbɔ wɔ mekɛ mɔɔ ɔyɛ se kɛ ɔbayɛ zɔ na ɔkile kɛ ɔbanwu amaneɛ la. Asoo Gyisɛse diele Dwosefi nee Mɛle noko?— Ɛhɛe, Baebolo ne ka kɛ ɔyɛle zɔ.

Duzu a ɛsukoa ɛfi Gyisɛse neazo ne anu a?— Ɔwɔ kɛ ɛtie wɔ awovolɛ wɔ mekɛ bɔbɔ mɔɔ ɔyɛ se la anu. Ɛbayɛ zɔ ɔ?—