Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 4

Nwane A Le Gyisɛse Kelaese?

Nwane A Le Gyisɛse Kelaese?

1. Nienwu a Gyisɛse vi rale a?

Gyisɛse subane boni mɔ a manle menli bikyele ye a?​—MATEYU 11:29; MAAKE 10:13-16.

Gyisɛse ɛnle kɛ dasanli biala la, ɛnee ɔwɔ anwuma kɛ sunsum nu sonla kolaa na bɛawo ye wɔ azɛlɛ ye azo. (Dwɔn 8:23) Ɛnee ɔle Nyamenle abɔdeɛ mɔɔ lumua na ɔboale wɔ ninyɛne mɔɔ ɛha la kɔsɔɔti ɛbɔlɛ nu. Ɔ ngomekye ala a Gyihova angome bɔle ye a, ɛhye ati a bɛfɛlɛ ye Nyamenle Ara “kokye la.” (Dwɔn 1:14) Ɛnee Gyisɛse le Nyamenle Kpɔmavolɛ, yemɔti eza bɛfɛlɛ ye “Edwɛkɛ ne.”​—Kenga Mrɛlɛbulɛ 8:22, 23, 30; Kɔlɔsaema 1:15, 16.

2. Duzu ati a Gyisɛse rale azɛlɛ ye azo a?

Nyamenle zoanle ɔ Ra ne wɔ azɛlɛ ye azo. Ɔyele ye ngoane ne ɔwulale Dwuunli belamunli raalɛ bie mɔɔ bɛfɛlɛ ye Mɛle la awodeɛ nu. Yemɔti Gyisɛse annyia dasanli selɛ. (Luku 1:30-35) Gyisɛse rale azɛlɛ ye azo (1) kɛ ɔbahilehile Nyamenle anwo nɔhalɛ ne, (2) kɛ ɔbayɛ kɛzi bɛgyinla ngyegyelɛ nu bɛyɛ Nyamenle ɛhulolɛdeɛ la anwo neazo, na (3) yeava ye ngoane ne mɔɔ di munli la yeayɛ “ɛkpɔnedeɛ.”​—Kenga Mateyu 20:28.

3. Duzu ati a yɛhyia ɛkpɔnedeɛ ɛ?

Ɛkpɔnedeɛ le ezukoa mɔɔ bɛtua bɛdie awie na bɛangu ye. (Adendulɛ 21:29, 30) Ɛnee ewule nee ɛrelerayɛlɛ ɛmboka Nyamenle bodane mɔɔ ɔlɛ ɔmaa alesama la anwo. Duzu ati a yɛka ye zɔ ɛ? Nyamenle hanle hilele Adam, sonla mɔɔ lumua la kɛ saa ɔyɛ mɔɔ Baebolo ne fɛlɛ ye “ɛtane” la a ɔbawu. Yemɔti, saa Adam anyɛ ɛtane a anrɛɛ ɔnrɛwu ɛlɛ. (Mɔlebɛbo 2:16, 17; 5:5) Kɛmɔ Baebolo ne kile la ewule luale Adam anwo  zo a “rale” ewiade a. Adam vale ɛtane nee ye ahatualɛ, ewule gyakyile ɔ bo zo amra kɔsɔɔti. Ɛhye ati, ɛnee ɔhyia kɛ bɛkpɔne yɛ bɛfi ewule mɔɔ Adam vale gyakyile yɛ la abo.​—Kenga Wulomuma 5:12; 6:23.

Nwane a bahola adua ɛkpɔnedeɛ ne na yealie yɛ yeavi ewule nu a? Saa yɛwu a, yɛtua yɛdayɛ mumua ne yɛ ɛtane nwo kakɛ ala. Sonla mɔɔ ɛnli munli la ɛnrɛhola ɛnrɛdua awie mɔ ɛtane nwo kakɛ.​—Kenga Edwɛndolɛ 49:7-9.

4. Duzu ati a Gyisɛse wule a?

Gyisɛse di munli. Yeanyɛ ɛtane biala, yemɔti tɛ ɔdaye ye ɛtane ti a ɔwule a. Emomu, awie mɔ ɛtane ti a Gyisɛse wule a. Nyamenle lale ɛlɔlɛ kpole ali na ɔmanle ɔ Ra ne rawule manle yɛ. Gyisɛse noko hilele kɛ ɔkulo yɛ ɔlua ɔ Ze mɔɔ ɔdiele ye na ɔvale ye ngoane ɔkpɔdale yɛ ɛtane la azo.​—Kenga Dwɔn 3:16; Wulomuma 5:18, 19.

Nea Duzu Ati A Gyisɛse Wule A? vidio ne.

5. Duzu a Gyisɛse ɛlɛyɛ ye kɛkala a?

Gyisɛse rale azɛlɛ ye azo la ɔyɛle wuleravolɛma ayile, ɔdwazole mɔwuamra, na ɔliele menli mɔɔ bɛ ngoane la esiane nu la. Ɛhye maa yɛnwu mɔɔ ɔbayɛ ye kenlebie yeamaa menli kɔsɔɔti mɔɔ bɛyɛ tieyɛ la. (Mateyu 15:30, 31; Dwɔn 5:28) Gyisɛse wule la, Nyamenle dwazole ye rale ngoane nu kɛ sunsum nu sonla. (1 Pita 3:18) Gyisɛse hendɛle wɔ Nyamenle asa fema zo hɔkpulale kɛ Gyihova manle ye tumi kɛ ɔli Belemgbunli wɔ azɛlɛ ye kɔsɔɔti azo la. (Hibuluma 10:12, 13) Kɛkala, Gyisɛse ɛlɛdi Belemgbunli wɔ anwuma, na ye ɛdoavolɛma ɛlɛbɔ edwɛkpa ɛhye nolo wɔ ewiade amuala.​—Kenga Daneɛle 7:13, 14; Mateyu 24:14.

Ɔnrɛhyɛ, Gyisɛse bava tumi mɔɔ ɔlɛ kɛ Belemgbunli la yeaye amaneɛnwunlɛ kɔsɔɔti nee menli mɔɔ fa ba la yeavi ɛkɛ. Menli mɔɔ die Gyisɛse di na bɛtie ye la amuala banyia ngoane wɔ paladaese azɛlɛ ne azo.​—Kenga Edwɛndolɛ 37:9-11.