1. Duzu ati a Nyamenle kyekyele tete Yizilayɛ ɛ?

Nyamenle hanle tete selɛ Ebileham abo zo amra bɔle nu yɛle bɛ maanle na ɔvale ye mɛla ɔmanle bɛ. Ɔvɛlɛle maanle ne ‘Yizilayɛ’ na ɔvale ye nɔhalɛ ɛzonlenlɛ nee ye edwɛkɛ ne ɔmanle bɛ. (Edwɛndolɛ 147:19, 20) Yemɔti ɛnee maanle kɔsɔɔti bahola alua Yizilayɛma anwo zo anyia nvasoɛ.​—Kenga Mɔlebɛbo 22:18.

Nyamenle kpale Yizilayɛma kɛ ye alasevolɛ. Bɛ tetedwɛkɛ maa yɛnwu kɛ menli mɔɔ di Nyamenle mɛla zo la nyia nvasoɛ. (Mɛla ne 4:6) Ɛhye ati, ɛnee menli gyɛne balua Yizilayɛma anwo azo anwu nɔhalɛ Nyamenle ne.​—Kenga Ayezaya 43:10, 12.

2. Duzu ati a bɛhyehyɛ Keleseɛnema ɛ?

Nzinlii Nyamenle anye anlie Yizilayɛma anwo bieko, yemɔti Gyihova vale Keleseɛne asafo ne ziele maanle zɔhane agyakɛ anu. (Mateyu 21:43; 23:37, 38) Yemɔti nɔhalɛ Keleseɛnema ɛrali Yizilayɛma abo zo na bɛsonle kɛ Gyihova alasevolɛ.​—Kenga Gyima ne 15:14, 17.

Gyisɛse hanle ye ɛdoavolɛ ne mɔ bɔle nu amaa bɛaha edwɛkɛ ne wɔ maanle kɔsɔɔti anu na bɛamaa menli arayɛ ye ɛdoavolɛ. (Mateyu 10:7, 11; 24:14; 28:19, 20) Kɛkala bɛlɛyɛ gyima ɛhye kpole wɔ ewiade ɛhye awieleɛ mekɛ ye anu. Gyihova ɛha menli mgbe dɔɔnwo mɔɔ vi maanle ngakyile nu la ɛbɔ nu wɔ nɔhalɛ ɛzonlenlɛ nu. Ɛhye bie ɛtɛsile ɛlɛ. (Yekile 7:9, 10) Bɛha nɔhalɛ Keleseɛnema bɛbɔ nu amaa bɛaboa bɛ nwo na bɛamaa bɛ nwo anwosesebɛ. Bɛdi Baebolo ɛzukoalɛ nwo ngyehyɛleɛ ko azo wɔ ewiade amuala.​—Kenga Hibuluma 10:24, 25.

 3. Kɛzi ɛnɛ mekɛ ye Gyihova Alasevolɛ ahyehyɛdeɛ ne bɔle ɔ bo ɛ?

Wɔ ɛvolɛ 1870 ne anu, Baebolo sukoavoma ekpunli ekyi bie bɔle ɔ bo kɛ bɛnwu nɔhalɛ edwɛkɛ mɔɔ wɔ Baebolo ne anu la. Ɛnee bɛze kɛ Gyisɛse manle Keleseɛne asafo ne bɔle edwɛkpa ne nolo, yemɔti bɛdabɛ noko bɛbɔle ɔ bo kɛ bɛbɔ Belemgbunlililɛ ne nolo wɔ ewiade amuala. Bɛvale duma Gyihova Alasevolɛ bɛdole bɛ nwo zo wɔ ɛvolɛ 1931.​—Kenga Gyima ne 1:8; 2:1, 4; 5:42.

4. Kɛzi bɛhyehyɛ Gyihova Alasevolɛ ne mɔ ɛ?

Wɔ ɛvoya ne mɔɔ lumua la anu, Keleseɛne asafo ne mɔ nyianle nvasoɛ vile neazo eku bie mɔɔ ɛnee die di kɛ Gyisɛse a le asafo ne Ati la ɛkɛ. (Gyima ne 16:4, 5) Ɛnɛ noko Gyihova Alasevolɛ mɔɔ bɛwɔ ewiade amuala la nyia nvasoɛ fi Neazo Eku bie mɔɔ mgbanyima mɔɔ bɛlɛ anwubielɛ dɔɔnwo a wɔ nu la ɛkɛ. Ɔnea Gyihova Alasevolɛ ɔfese ne mɔ azo ɔmaa bɛyɛ mbuluku, bɛkile ɔ bo, na bɛkyehyɛ mbuluku mɔɔ bɛfa bɛsukoa Baebolo ne la wɔ aneɛ mɔɔ bo 600 la anu. Ɔlua ɛhye azo Neazo Eku ne kola fa adehilelɛ nee edwɛkɛ mɔɔ maa anwosesebɛ mɔɔ gyi Ngɛlɛlera ne azo la maa asafo mɔɔ bo 100,000 la wɔ ewiade amuala. Mrenya mɔɔ bɔ mɔdenle la sonle kɛ mgbanyima anzɛɛ neavolɛ wɔ asafo biala anu. Mrenya ɛhye mɔ fi ɛlɔlɛ nu nea Nyamenle mboane ne.​—Kenga 1 Pita 5:2, 3.

Gyihova Alasevolɛ ɛha ɛbɔ nu ɛlɛbɔ edwɛkpa ne nolo na bɛamaa menli arayɛ ɛdoavolɛma. Yɛka edwɛkɛ ne wɔ azua nu kɛmɔ ɛzoanvolɛ ne mɔ yɛle la. (Gyima ne 20:20) Eza yɛ nee menli mɔɔ kulo nɔhalɛ ne la sukoa Baebolo ne. Noko Gyihova Alasevolɛ ɛnle ahyehyɛdeɛ ala. Yɛle abusua yɛɛ yɛ Ze lɛ ɛlɔlɛ. Yɛle mediema mrenya nee mraalɛ mɔɔ yɛdwenle yɛ gɔnwo mɔ anwo. (2 Tɛsalonaekama 1:3) Kɛmɔ bɛha Gyihova menli bɛbɔ nu amaa bɛayɛ mɔɔ sɔ Nyamenle anye na bɛaboa awie mɔ la ati, bɛle abusua mɔɔ anye die kpole kpalɛ wɔ azɛlɛ ye azo a.​—Kenga Edwɛndolɛ 33:12; Gyima ne 20:35.