1. Duzu a le Nyamenle Belemgbunlililɛ ne?

Duzu a maa Gyisɛse fɛta kɛ Belemgbunli a?​—MAAKE 1:40-42.

Nyamenle Belemgbunlililɛ ne le arane mɔɔ wɔ anwuma. Ɔbaye arane mɔɔ ɛha la kɔsɔɔti yeavi ɛkɛ na yeamaa bɛayɛ Nyamenle ɛhulolɛdeɛ wɔ anwuma nee aze. Mɔɔ Nyamenle Belemgbunlililɛ ne bayɛ la le edwɛkpa. Ɔnrɛhyɛ Nyamenle Belemgbunlililɛ ne bamaa alesama asa aha arane kpalɛ. Ɔbaha menli mɔɔ de azɛlɛ ye azo la amuala yeabɔ nu.​—Kenga Daneɛle 2:44; Mateyu 6:9, 10; 24:14.

Belemgbunlililɛ biala lɛ ye belemgbunli. Gyihova ɛkpa ɔ Ra, Gyisɛse Kelaese kɛ Ye Belemgbunlililɛ ne azo Belemgbunli.​—Kenga Yekile 11:15.

2. Duzu ati a Gyisɛse le Belemgbunli mɔɔ ɔfɛta ɛ?

Nyamenle Ara ne le Belemgbunli mɔɔ ɔfɛta ɔboalekɛ ɔ ti akunlu le kɛnlɛma yɛɛ ɔkulo tenlene. (Mateyu 11:28-30) Eza ɔlɛ tumi ɔkola ɔboa menli ɔluakɛ ɔbadɛnla anwuma yeali tumi wɔ azɛlɛ ye azo. Wɔ ye ewudwazo ne anzi, ɔhɔle anwuma ɔhɔhendɛle wɔ Gyihova asa fema zo. (Hibuluma 10:12, 13) Awieleɛ kolaa ne, Nyamenle manle ye tumi kɛ ɔli ebia.​—Kenga Daneɛle 7:13, 14.

3. Nwane mɔ a nee Gyisɛse bali tumi a?

Menli ekpunli bie mɔɔ bɛfɛlɛ bɛ “Anwuma Anwumanli ne menli” la nee Gyisɛse bali tumi wɔ anwuma. (Daneɛle 7:27) Gyisɛse nɔhalɛ ɛzoanvolɛ ne mɔ a bɛlumuale bɛkpale bɛ a. Gyihova ɛhɔ zo ɛkpa nɔhavoma kɛ anwodelɛma  dedee yeradwu ɛnɛ. Saa bɛdwazo bɛ a bɛmaa bɛ sunsum nu sonlabaka, kɛmɔ bɛyɛle Gyisɛse la.​—Kenga Dwɔn 14:1-3; 1 Kɔlentema 15:42-44.

Menli nyɛ a bahɔ anwuma a? Gyisɛse vɛlɛle bɛ “mboane ekpunli ekyi.” (Luku 12:32) Bɛ dodo bayɛ 144,000. Bɛ nee Gyisɛse bɛali belemgbunli wɔ azɛlɛ ye azo.​—Kenga Yekile 14:1.

4. Gyisɛse bɔle ɔ bo kɛ ɔdi tumi la duzu a zile a?

Nyamenle Belemgbunlililɛ ne bɔle ɔ bo kɛ ɔdi tumi wɔ ɛvolɛ 1914. * Debie mɔɔ Gyisɛse lumuale yɛle kɛ Belemgbunli la a le kɛ ɔvuandinle Seetan nee ye sunsum ɛtane ne mɔ ɔguale azɛlɛ ye azo. Seetan vale ɛya kpole na ɔbɔle ɔ bo kɛ ɔfa ngyegyelɛ yeara azɛlɛ ye azo ɛleka biala. (Yekile 12:7-10, 12) Ɔvi zɔhane mekɛ ne, alesama ngyegyelɛ ɛyɛ kpole. Konle, ɛhɔne, ewulenzane, yɛɛ azɛlɛkpusulɛ boka sɛkɛlɛneɛ mɔɔ maa yɛnwu kɛ ɔnrɛhyɛ Belemgbunlililɛ ne babɔ ɔ bo azie azɛlɛ ye la anwo.​—Kenga Luku 21:7, 10, 11, 31.

5. Duzu a Nyamenle Belemgbunlililɛ ne bayɛ a?

Ɔlua edwɛkɛ ne mɔɔ bɛlɛka ye ewiade amuala la azo, Nyamenle Belemgbunlililɛ ne ɛha menli pemgbenleamgbe mɔɔ bɛvi maanle ngakyile nu la ɛbɔ nu. Bɛlɛvoma mgbe dɔɔnwo ɛlɛbɛlɛ bɛ nwo aze amaa Gyisɛse. Nyamenle Belemgbunlililɛ ne babɔ bɛ nwo bane wɔ mekɛ mɔɔ ɔlɛsɛkye ewiade ɛtane ɛhye la. Yemɔti ɔwɔ kɛ menli mɔɔ kulo kɛ bɛnyia Nyamenle Belemgbunlililɛ ne nyilalɛ ne bie la kɔsɔɔti bɛlɛ bɛ nwo aze maa Gyisɛse.​—Kenga Yekile 7:9, 14, 16, 17.

Wɔ ɛvolɛ 1,000 anu, Belemgbunlililɛ ne bamaa Nyamenle bodane mɔɔ ɔlɛ ɔmaa alesama la ara nu. Azɛlɛ ne amuala bayɛ paladaese. Awieleɛ ne, Gyisɛse bazia ava Belemgbunlililɛ ne amaa ɔ Ze. (1 Kɔlentema 15:24-26) Ɛlɛ awie mɔɔ ɛbahulo kɛ ɛka Nyamenle Belemgbunlililɛ ne anwo edwɛkɛ ɛkile ye ɔ?​—Kenga Edwɛndolɛ 37:10, 11, 29.

 

^ ɛden. 6 Saa ɛkulo kɛ ɛnwu kɛzi Baebolo ngapezo hanle ɛvolɛ 1914 anwo edwɛkɛ dole ɛkɛ la a, nea Duzu A Baebolo Ne Kola Kilehile Yɛ A? buluku ne mukelɛ 217-220.