Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 1

Duzu A Le Edwɛkpa Ne?

Duzu A Le Edwɛkpa Ne?

1. Duzu edwɛkɛ a vi Nyamenle ɛkɛ a?

Nyamenle kulo kɛ menli anye die wɔ azɛlɛ ye azo. Ɔbɔle azɛlɛ ne nee debie biala mɔɔ wɔ zo la ɔluakɛ ɔkulo alesama. Ɔnrɛhyɛ ɔbamaa menli mɔɔ wɔ ɛleka biala la anyia asetɛnla kpalɛ. Ɔbaye ninyɛne mɔɔ maa alesama nwu amaneɛ la.​—Kenga Gyɛlɛmaya 29:11.

Arane biala ɛtɛkolale ɛtɛyele basabasayɛlɛ, anwodolɛ, anzɛɛ ewule. Noko edwɛkpa wɔ ɛkɛ. Ɔnrɛhyɛ, Nyamenle bava ɔdaye mumua ne ye arane yeazie alesama arane ne mɔ agyakɛ anu. Ye maanlema banyia anzondwolɛ nee kpɔkɛdelɛ kpalɛ.​—Kenga Ayezaya 25:8; 33:24; Daneɛle 2:44.

2. Duzu ati a edwɛkpa ne anwo hyia ndɛndɛ ɛnɛ a?

Saa Nyamenle sɛkye ɛtanevolɛma a yɛɛ amaneɛnwunlɛ bo bapɛ a. (Zɛfanaya 2:3) Mekɛ boni a ɔbayɛ ɛhye a? Nyamenle Edwɛkɛ ne hanle ninyɛne mɔɔ ɛnɛ gyegye alesama la dole ɛkɛ. Ninyɛne mɔɔ ɛlɛsisi la kile kɛ Nyamenle mekɛ ne ɛbikye.​—Kenga 2 Temɔte 3:1-5.

3. Duzu a ɔwɔ kɛ yɛyɛ a?

Ɔwɔ kɛ yɛsukoa Nyamenle anwo debie wɔ ye Edwɛkɛ Baebolo ne anu. Ɔle kɛ kɛlata mɔɔ vi selɛ mɔɔ lɛ ɛlɔlɛ la ɛkɛ. Ɔkile mɔɔ yɛyɛ a yɛ nye balie wɔ ɛbɛlabɔlɛ nu na yɛanyia dahuu ngoane wɔ azɛlɛ ye azo kenlebie la. Menli bie mɔ ɛnrɛhulo kɛ ɛbamaa awie aboa wɔ amaa wɔade Baebolo ne abo kpalɛ. Noko ɔnle kɛ ɛmaa awie biala si wɔ adenle kɛ ɛbanyia kenlebie asetɛnla kɛnlɛma ɛhye.​—Kenga Mrɛlɛbulɛ 29:25; Yekile 14:6, 7.