1. Nwane a le Baebolo ne Kɛlɛvolɛ a?

Edwɛkpa mɔɔ kile kɛ menli badɛnla azɛlɛ ye azo dahuu la wɔ Baebolo ne anu. (Edwɛndolɛ 37:29) Mbuluku ngyikyi 66 a wɔ Baebolo ne anu a. Nyamenle manle menli kɛyɛ 40 mɔɔ di nɔhalɛ la a hɛlɛle a. Mosisi a hɛlɛle mbuluku nnu ne mɔɔ lumua la wɔ ɛvolɛ kɛyɛ 3,500 mɔɔ ɛze ɛhɔ la a. Ɛzoanvolɛ Dwɔn a hɛlɛle buluku ne mɔɔ li awieleɛ la wɔ ɛvolɛ kɛyɛ 1,900 mɔɔ ɛze ɛhɔ la a. Nwane edwɛkɛ a Baebolo kɛlɛvolɛma ne hɛlɛle a? Nyamenle luale ye sunsum nwuanzanwuanza ne azo dendɛle hilele menli mɔɔ hɛlɛle la. (2 Samoɛle 23:2) Nyamenle adwenle a bɛhɛlɛle a na tɛ bɛdabɛ mumua ne bɛ adwenle ɔ. Yemɔti Gyihova a le Baebolo ne Kɛlɛvolɛ a.​—Kenga 2 Temɔte 3:16; 2 Pita 1:20, 21.

2. Kɛ ɔkɛyɛ na yɛanwu kɛ Baebolo ne le nɔhalɛ ɛ?

Yɛze kɛ Baebolo ne vi Nyamenle ɛkɛ ɔluakɛ ɔka mɔɔ bazi kenlebie la. Dasanli biala ɛnrɛhola ɛnrɛyɛ zɔ. (Dwɔhyua 23:14) Nyamenle Tumivolɛ Bedevinli ne angomekye a kola nwu alesama kenlebie a.​—Kenga Ayezaya 42:9; 46:10.

Ɔwɔ kɛ buluku mɔɔ vi Nyamenle ɛkɛ la yɛ ngakyile, na zɔhane a Baebolo ne de a. Bɛva Baebolo ne mgbe mgbe dɔɔnwo bɛmaa wɔ aneɛ ngakyile dɔɔnwo anu. Ɔwɔ nuhua kɛ Baebolo ne ɛhyɛ ɛdeɛ noko ɔ nee abɔdeɛ nwo nrɛlɛbɛ yia. Bieko, menli 40 ne anu biala angɛlɛ edwɛkɛ mɔɔ tia ɔ gɔnwo ɛdeɛ a. * Ɛlɔlɛ Nyamenle ne angomekye ala a bahola aha ɛlɔlɛ nwo edwɛkɛ mɔɔ wɔ Baebolo ne anu la. Baebolo ne eza kola maa menli kakyi bɛ subane na bɛbɔ ɛbɛla kpalɛ. Edwɛkɛ ɛhye mɔ ɛmaa menli dɔɔnwo ɛlie ɛli kɛ Baebolo ne le Nyamenle Edwɛkɛ.​—Kenga 1 Tɛsalonaekama 2:13.

 3. Duzu a Baebolo ne ka nwolɛ edwɛkɛ a?

Baebolo ne anu edwɛkɛ titile ne fane bodane mɔɔ Nyamenle lɛ maa alesama la anwo. Ngɛlɛlera ne kilehile kɛzi asetɛnla kpalɛ wɔ paladaese azɛlɛ zo vile sonla sa nee kɛzi yɛ sa baha paladaese ne bieko la anu.​—Kenga Yekile 21:4, 5.

Ngyinlazo, mɛla nee folɛdulɛ eza wɔ Nyamenle Edwɛkɛ ne anu. Bieko, kɛzi Nyamenle nee menli lile wɔ tete ne la anwo edwɛkɛ wɔ nu na ɔmaa yɛnwu Nyamenle subane. Yemɔti Baebolo ne baboa wɔ yeamaa wɔanwu Nyamenle. Ɔkile mɔɔ ɛyɛ a ɛbarayɛ ɔ gɔnwo la.​—Kenga Edwɛndolɛ 19:7, 11; Gyemise 2:23; 4:8.

4. Kɛ ɔkɛyɛ na wɔade Baebolo ne abo ɛ?

Buluku ɛhye balua adenle mɔɔ Gyisɛse luale zo la azo yeamaa wɔade Baebolo ne abo. Ɔhwenle adwenle hɔle Baebolo ne azo na “ɔhilehilele nu.”​—Kenga Luku 24:27, 45.

Edwɛkpa ne mɔɔ vi Nyamenle ɛkɛ la yɛ anyelielɛ tɛla ninyɛne dɔɔnwo. Noko bie mɔ ɛndwenle nwolɛ yɛɛ ɔka bie mɔ ɛya bɔbɔ. Mmamaa ɛ sa nu to. Nyamenle anwo nrɛlɛbɛ mɔɔ ɛbanyia la bamaa wɔanyia dahuu ngoane.​—Kenga Dwɔn 17:3.

 

^ ɛden. 3 Nea A Book for All People buluku ne mɔɔ wɔ Nrelenza nu la.