Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 105

Bɛlɛkendɛ Wɔ Gyɛlusalɛm

Bɛlɛkendɛ Wɔ Gyɛlusalɛm

MENLI ɛhye mɔ mɔɔ wɔ ɛke la le Gyisɛse ɛdoavolɛma. Bɛdie ye na bɛdɛnla Gyɛlusalɛm. Na wɔ mekɛ mɔɔ bɛ muala bɛlɛkendɛ la, alɛra anzɛɛ dede bie yile sua ne anu amuala. Ɔyɛle kɛ ahumu kpole bie la. Na akee senle ndafinlima bɔle ɔ bo kɛ ɔsinze ɛdoavolɛma ne ko biala ati zo. Asoo ɛnwu senle ne mɔɔ ɛzinze bɛ nuhua ko biala ati zo la? Ɔ muala kile duzu?

Ɔle nwanwane debie! Gyisɛse ɛzia ɛhɔboka ɔ Ze anwo wɔ anwuma, na ɔlɛmaa Nyamenle sunsum nwuanzanwuanza ne ara ye ɛdoavolɛma ne anwo zo. Asoo ɛze mɔɔ sunsum ɛhye hanle bɛ manle bɛyɛle a? Bɛ muala bɛbɔle ɔ bo kɛ bɛka aneɛ ngakyile.

Menli dɔɔnwo mɔɔ wɔ Gyɛlusalɛm la dele alɛra ne mɔɔ yɛle kɛ ahumu kpole la, na bɛrale kɛ bɛbanlea mɔɔ ɛlɛsi la. Menli ne bie mɔ vi maanle gyɛne gyɛne nu a ɛra ɛke kɛ bɛbali Yizilayɛma Pɛntekɔso ɛvoyia ne a. Nea debie nwanwane mɔɔ nyɛvolɛ ɛhye mɔ nwunle ye a! Bɛdele kɛ ɛdoavolɛma ne ɛlɛka nwanwane ninyɛne mɔɔ Nyamenle ɛyɛ la wɔ bɛ sua zo aneɛ nu.

Nyɛvolɛ ne mɔ hanle kɛ: ‘Menli ɛhye mɔ amuala le Galelima. Na kɛ ɔyɛle mɔɔ akee yɛte kɛ bɛlɛka yɛdayɛ yɛ maanle nu aneɛ ɛ?’

Akee Pita dwazole kɛ ɔkilehile nuhua yeahile bɛ. Ɔmanle ɔ ne zo na ɔhanle kɛ bɛzile bɛhunle Gyisɛse nee kɛ Gyihova zile dwazole ye vile ewule nu la anwo edwɛkɛ ɔhilele menli ne. Pita hanle kɛ: ‘Kɛkala Gyisɛse wɔ anwuma na ɔde Nyamenle asa fema zo. Na yemaa sunsum nwuanzanwuanza ne mɔɔ ɔbɔle nwolɛ ɛwɔkɛ la ɛra yɛ nwo zo. Ɛhye ati a bɛde na bɛnwu nwanwane ninyɛne ɛhye mɔ la.’

Mekɛ mɔɔ Pita hanle edwɛkɛ ɛhye mɔ wiele la, menli ne anu dɔɔnwo nlunle bɛ nwo wɔ mɔɔ bɛyɛle Gyisɛse la anwo. Bɛbizale kɛ: ‘Duzu a ɔwɔ kɛ yɛyɛ a?’ Pita zele bɛ kɛ: ‘Ɔwɔ kɛ bɛkakyi bɛ ɛbɛlabɔlɛ na bɛmaa bɛsɔne bɛ.’ Yemɔti kenle zɔhane ala menli kɛyɛ 3,000 manle bɛzɔnenle bɛ na bɛrayɛle Gyisɛse ɛdoavolɛma.