Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 109

Pita Kpɔla Kɔnileɛse

Pita Kpɔla Kɔnileɛse

ƐZOANVOLƐ Pita a gyi ɛkɛ ne la, na ɔ gɔnwo mɔ bie mɔ a gyi ɔ nzi la. Na duzu ati a nrenya ne ɛlɛkoto azonle Pita a? Asoo ɔwɔ kɛ ɔyɛ zɔ? Ɛze ahenle holɛ ko?

Nrenya ne a le Kɔnileɛse. Ɔle Wulomu ɛlɔne kpanyinli. Ɛnee Kɔnileɛse ɛnze Pita, noko bɛhanle bɛhilele ye kɛ ɔvɛlɛ ye ɔrɛla ye sua nu. Maa yɛnlea kɛzi ɛhye rale ye zɔ la.

Gyisɛse ɛdoavolɛma mɔɔ lumua la ɛnee le Dwuuma, na Kɔnileɛse ɛnle Dwuunli. Noko ɔsulo Nyamenle, yɛɛ ɔyɛ nzɛlɛlɛ wɔ ɔ nyunlu, na ɔyɛ ahunlunyele ninyɛne dɔɔnwo ɔmaa menli. Kenle ko ewiazo anwumabɔvolɛ bie vindele ɔ nwo ɛkɛ ne na ɔzele ye kɛ: ‘Nyamenle anye ɛzɔ mɔɔ wɔyɛ la, na ɔbabua wɔ nzɛlɛlɛ ne. Soa menli maa bɛhɔvɛlɛ nrenya bie mɔɔ bɛfɛlɛ ye Pita la bɛrɛla. Ɔde Dwɔpa wɔ nrenya bie mɔɔ bɛfɛlɛ ye Saemɔn la sua nu, wɔ nyevile ne anloa ɛkɛ ne.’

Ɛkɛ ne ala, Kɔnileɛse zoanle menli bie kɛ bɛhɔkpondɛ Pita. Aleɛ hyenle, na mɔɔ menli ne ɛlɛbikye Dwɔpa la, Pita vole hɔle Saemɔn sua ne ati zo. Wɔ ɛkɛ ne Nyamenle manle Pita dwenlenle kɛ yenwu ɛdanlɛ kpole bie kɛ ɔvi anwuma ɔlɛdwu aze. Nane ngakyile dɔɔnwo wɔ ɛdanlɛ ne anu. Kɛmɔ Nyamenle mɛla ne kile la, ɛnee nane ɛhye mɔ anwo ɛnde kɛ bɛdi, noko ɛnelɛ bie zele kɛ: ‘Pita, dwazo. Ku bie di.’

Pita buale kɛ: ‘Kyɛkyɛ! Debie mɔɔ nwolɛ ɛnde la metɛdile bie ɛlɛ.’ Noko ɛnelɛ ne buale Pita kɛ: ‘Debie mɔɔ Nyamenle ɛde nwolɛ la mmaka kɛ nwolɛ ɛnde.’ Ɛhye zile fane nsa. Mekɛ mɔɔ Pita ɛlɛdwenledwenle mɔɔ ɔ muala kile la anwo la, menli ne mɔɔ Kɔnileɛse zoanle bɛ la rale sua nu ɛkɛ ne na bɛbizale Pita abo zo.

Pita dwule aze na ɔzele kɛ: ‘Ahenle mɔɔ bɛkpondɛ ye la a le medame. Na bɛ ɛdialɛ nu ɛ?’ Mɔɔ menli ne hilehilele nuhua kɛ anwumabɔvolɛ bie zele Kɔnileɛse kɛ ɔvɛlɛ Pita ɔrɛla ye sua nu la, Pita kponlenle zo kɛ ɔ nee bɛ kɛhɔ. Aleɛ hyenle la Pita nee ɔ gɔnwo mɔ hɔle kɛ bɛkakpɔla Kɔnileɛse wɔ Sizalia.

Ɛnee Kɔnileɛse nee ye sua nu amra nee ɔ gɔnwo mɔ ɛwie yia. Mekɛ mɔɔ Pita rale la, Kɔnileɛse hɔyiale ye. Ɔdule ɔdɔle Pita agyakɛ anu na ɔzonlenle ye, kɛmɔ ɛnwu ye wɔ ɛke la. Na Pita zele ye kɛ: ‘Dwazo; na medame mele sonla ala.’ Ɛhɛe, Baebolo ne da ye ali kɛ ɔnle kpalɛ kɛ yɛkɛhoto na yɛkɛzonle sonla. Ɔwɔ kɛ yɛsonle Gyihova angomekye ala.

Pita akee hanle edwɛkɛ ne hilele bɛdabɛ mɔɔ bɛyia la. Pita zele kɛ: ‘Menwu ye kɛ Nyamenle die menli kɔsɔɔti mɔɔ bɛkulo kɛ bɛsonle ye la to nu.’ Mɔɔ ɔ nloa wɔ zolɛ ɔlɛtendɛ la, Nyamenle zoanle ye sunsum nwuanzanwuanza ne manle ɔrale bɛ nwo zo, na menli ne bɔle ɔ bo kɛ bɛka aneɛ ngakyile. Ɛhye zinle Dwuu ɛdoavolɛma mɔɔ nee Pita rale la anwo, ɔboalekɛ bɛdwenlenle kɛ Dwuuma angomekye ala a Nyamenle die bɛ to nu a. Yemɔti ɛhye manle bɛnwunle ye kɛ Nyamenle ɛmbu menli bie mɔ kɛ bɛle kpalɛ anzɛɛ bɛ nwo hyia Nyamenle kpalɛ tɛla menli gyɛne. Asoo yemɔ ɛnle debie kpalɛ mɔɔ ɔwɔ kɛ yɛ muala yɛkakye a?