Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 110

Temɔte—Pɔɔlo Boavolɛ Fofolɛ

Temɔte—Pɔɔlo Boavolɛ Fofolɛ

KPAVOLƐ ne mɔɔ ɛnwu ye wɔ ɛke kɛ ɔgyi ɛzoanvolɛ Pɔɔlo anwo ɛkɛ ne la a le Temɔte. Temɔte nee ye abusua ne de Lesetɛla. Bɛfɛlɛ ɔ nli Yunaesi yɛɛ bɛfɛlɛ ɔ nla Loyese.

Mɔɔ tɔ zo nsa mɔɔ Pɔɔlo ba Lesetɛla la ɛne. Kɛyɛ ɛvolɛ ko mɔɔ ɛze ɛhɔ la, Pɔɔlo nee Baanabase lumua dule adenle rahanle edwɛkɛ ne wɔ ɛke. Na kɛkala Pɔɔlo nee ɔ gɔnwo Saelase ɛzia ɛra bieko.

Ɛze mɔɔ Pɔɔlo ɛlɛka ahile Temɔte a? ‘Ɛbahulo kɛ ɛkɛboka me nee Saelase anwo ɔ? Yɛbahola yɛalua wɔ moalɛ zo yɛaha edwɛkɛ ne yɛahile menli mɔɔ wɔ moamoa la.’

Temɔte buale kɛ: ‘Ɛhɛe, mebahulo kɛ mekɛhɔ.’ Yemɔti ɛhye anzi mekɛ ekyi, Temɔte gyakyile ye abusua ne ɛkɛ na ɔ nee Pɔɔlo nee Saelase hɔle. Noko kolaa na yɛazukoa bɛ adendulɛ ne anwo debie la, maa yɛnlea mɔɔ ɛnee Pɔɔlo ɛlɛyia ye la. Gyisɛse yele ɔ nwo hilele ye wɔ Dɛmasekɛse adenle ne azo la ye ɛvolɛ kɛyɛ 17 ɛne.

Kakye kɛ, Pɔɔlo rale Dɛmasekɛse kɛ ɔba yeayɛ Gyisɛse ɛdoavolɛma ne kpɔdekpɔde, noko kɛkala ɔdaye mumua ne ɔle ɛdoavolɛ! Nzinlii kpɔvolɛma yɛle kɛ bɛku Pɔɔlo ɔboalekɛ bɛngulo ye ngilehilelɛ ne mɔɔ fane Gyisɛse anwo la. Noko ɛdoavolɛma ne boale Pɔɔlo manle ɔnriandile. Bɛvale ye bɛwulale kɛndɛne nu na bɛdwulale ye wɔ suakpole ne bane ne anzi.

Ɛhye anzi Pɔɔlo hɔhanle edwɛkɛ ne wɔ Anteɔko. Ɛke a bɛlumua bɛvɛlɛle Gyisɛse ɛdovolɛma ne Keleseɛnema a. Akee bɛzoanle Pɔɔlo nee Baanabase bɛvile Anteɔko kɛ bɛdu adenle bɛhɔha edwɛkɛ ne wɔ maanle maanle mɔɔ wɔ maanɔne la azo. Azua mɔɔ bɛhɔle zolɛ la ko a le Lesetɛla, mɔɔ le Temɔte sua zo la.

Akee, kɛyɛ ɔ nzi ɛvolɛ ko, Pɔɔlo ziale rale Lesetɛla wɔ adendulɛ mɔɔ tɔ zo nwiɔ la azo. Mɔɔ Temɔte nee Pɔɔlo nee Saelase vile ɛkɛ ne la, ɛze ɛleka mɔɔ bɛhɔle a? Nea azɛkɛlata ne azo, na maa yɛnleɛnlea ɛleka ne mɔ bie.

Mɔɔ lumua la, bɛhɔle Ayekoneɛm mɔɔ bikye la azo, akee bɛhɔle sua mɔɔ tɔ zo nwiɔ mɔɔ bɛfɛlɛ ye Anteɔko la azo. Yemɔ anzi bɛhɔle Tulowase mɔɔ wɔ ye anwuma la azo, akee bɛhɔle Felepae, Tɛsalonaeka yɛɛ Bɛlia. Ɛnwu Atɛnse wɔ azɛkɛlata ne azo ɔ? Pɔɔlo hanle edwɛkɛ ne wɔ ɛkɛ. Yemɔ anzi bɛvale ɛvolɛ ko ne foa bɛhanle edwɛkɛ ne wɔ Kɔlente. Awieleɛ kolaa ne bɛdɛnlanle Ɛfɛsɛse ekyii. Akee bɛvale ɛlɛne bɛziale bɛrale Sizalia, na bɛhɔle bɛhɔdwule Anteɔko, ɛkɛ ne a Pɔɔlo dɛnlanle a.

Yemɔti Temɔte dule adenle mayɛlɛ ɛya ɛya dɔɔnwo boale Pɔɔlo manle ɔbɔle “edwɛkpa” ne nolo na ɔbɔle Keleseɛne asafo dɔɔnwo abo. Saa ɛyɛ kpanyinli a, asoo ɛbayɛ Nyamenle sonvolɛ mɔɔ di nɔhalɛ kɛ Temɔte ɔ?