Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 89

Gyisɛse Te Ɛzonlenlɛ Sua Ne Anwo

Gyisɛse Te Ɛzonlenlɛ Sua Ne Anwo

ƆZƆHO kɛ Gyisɛse amgba ɛva ɛya wɔ ɛke, ɔnle zɔ ɔ? Asoo ɛze deɛ mɔɔ ɔti yeva ɛya kpole la? Kɛmɔ menli ɛhye mɔ mɔɔ wɔ Nyamenle ɛzonlenlɛ sua ne anu wɔ Gyɛlusalɛm la le anyebolo kpole la ati ɔ. Bɛlɛbɔ mɔdenle kɛ bɛkɛnyia ezukoa dɔɔnwo bɛkɛvi menli mɔɔ ɛra ɛke kɛ bɛbazonle Nyamenle la ɛkɛ.

Asoo ɛnwu nlankɛ mralɛ yɛɛ mboane yɛɛ mɔlɔnoma ɛhye mɔ kɔsɔɔti? Nyɛ, menli ne ɛlɛtɔne nane ɛhye mɔ wɔ ɛzonlenlɛ sua ne anu ɛke. Ɛze deɛ mɔɔ ɔti bɛlɛyɛ zɔ la ɔ? Ɔluakɛ Yizilayɛma ne hyia nane nee nloma mɔɔ bɛfa bɛabɔ afɔle bɛamaa Nyamenle la ati ɔ.

Nyamenle mɛla ne hanle kɛ saa Yizilayɛnli yɛ ɛtane a, ɔwɔ kɛ ɔbɔ nwolɛ afɔle ɔmaa Nyamenle. Na ɛnee mekɛ ne bie, noko, wɔ ɛkɛ ne mɔɔ ɛnee ɔwɔ kɛ Yizilayɛma bɔ afɔle a. Noko ɛnee nienwu a Yizilayɛnli banyia nloma nee nane ava abɔ afɔle amaa Nyamenle a?

Ɛnee Yizilayɛma bie mɔ lɛ nloma nee nane. Yemɔti ɛnee bɛkola bɛbɔ afɔle ɛhye mɔ. Noko ɛnee Yizilayɛma dɔɔnwo ɛnlɛ nane anzɛɛ nloma. Na ɛnee bɛ nuhua bie mɔ ɛmbikye Gyɛlusalɛm na ɛnee bɛngola bɛnva bɛ nane ne mɔ anu ko bɛmba ɛzonlenlɛ sua ne anu. Yemɔti bɛradɔle nane nee nloma mɔɔ bɛhyiale nwolɛ la wɔ ɛke. Noko ɛnee bolɛ mɔɔ menli ɛhye mɔ die menli ne la yɛ se somaa. Ɛnee bɛlɛsisi menli ne. Ɛye yemɔ ɛsie ahane a, ɔnle kɛ bɛdi gua wɔ Nyamenle ɛzonlenlɛ sua ne anu wɔ ɛke.

Ɛhye a ɛmaa Gyisɛse ɛva ɛya la. Yemɔti ɔbutubutule menli ne ɛkponle ne mɔ mɔɔ ezukoa ne gua zolɛ la na ɔzandele bɛ ezukoa ne. Eza, ɔvale nyɛma ɔyɛle empele na ɔvale ɔvoanle nane ne mɔ kɔsɔɔti ɔvile ɛzonlenlɛ sua ne anu. Ɔzele bɛdabɛ mɔɔ bɛlɛtɔne mɔlɔnoma ne la kɛ: ‘Bɛva bɛ bɛvinde! Bɛmmafa me Ze sua ne bɛyɛ gua nu.’

Ɛnee Gyisɛse ɛdoavolɛma ne bie mɔ boka ɔ nwo wɔ ɛke wɔ Gyɛlusalɛm ɛzonlenlɛ sua ne anu. Bɛnwunle mɔɔ Gyisɛse ɛlɛyɛ la na ɔzinle bɛ nwo. Akee bɛhakyele kɛ bɛha bɛdo ɛkɛ ne wɔ Baebolo ne anu bɛvane Nyamenle Ara ne anwo kɛ: ‘Nyamenle sua ne anwo ɛhulolɛ sɔ kɛ senle la wɔ ye nu.’

Mekɛ mɔɔ ɛnee Gyisɛse ɛra Gyɛlusalɛm ɛke kɛ ɔbali Akpabɛnwo ne la, ɔyɛle nwanwane ninyɛne dɔɔnwo. Nzinlii, Gyisɛse vile Dwudiya na ɔbɔle ye adendulɛ ne abo kɛ ɔsia yeahɔ Galeli. Noko ɔkɔ la, ɔvale Samɛlea maanzinli nu. Maa yɛnlea mɔɔ zile wɔ ɛkɛ ne la.