Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 92

Gyisɛse Dwazo Mɔwuamra

Gyisɛse Dwazo Mɔwuamra

BƐLƐRA ne mɔɔ ɛnwu ye wɔ ɛke la ɛli ɛvolɛ 12. Gyisɛse lɛ ɔ sa, na ɔ nli nee ɔ ze gyi ɔ nwo ɛkɛ ne. Ɛze deɛ mɔɔ ɔti bɛ nye ɛlie kpole la ɔ? Maa yɛnlea.

Bɛlɛra ne ɔ ze le sonla titile mɔɔ bɛfɛlɛ ye Gyeeyaelɛse a. Kenle ko ɔ ra raalɛ ne anwo dole ye, na bɛvale ye bɛdole ɛkpa zo. Noko yeande kpɔkɛ. Ɛnee anwodolɛ ne kpole ala a ɔyɛ a. Ɔgyegyele Gyeeyaelɛse nee ɔ ye kpole, ɔluakɛ ɛnee bɛze kɛ bɛ ra raalɛ kakula ne bawu. Yemɔ a le bɛ ra raalɛ kokye a. Yemɔti Gyeeyaelɛse hɔle kɛ ɔkakpondɛ Gyisɛse. Yede nwanwane gyima mɔɔ Gyisɛse ɛlɛyɛ la anwo edwɛkɛ.

Mekɛ mɔɔ Gyeeyaelɛse nwunle Gyisɛse la, ɛnee menli dɔɔnwo ɛbɔ ɛyia ye. Noko Gyeeyaelɛse wolole menli ne anu na ɔdule ɔdɔle Gyisɛse agyakɛ anu. Ɔzele ye kɛ: ‘Me ra raalɛ ne ɛnyia ahomeka fee.’ Ɔbodole ye kɛ: ‘Mesɛlɛ wɔ, bɛla na maa ɔde kpɔkɛ.’ Gyisɛse zele kɛ ɔbahɔ.

Mekɛ mɔɔ bɛlɛkɔ la, menli dɔɔnwo ne hyelele zo kpalɛ. Arɛlevilɛ nu ala Gyisɛse gyinlanle. Ɔbizale kɛ: ‘Nwane ɛva ɔ sa ɛha me la?’ Gyisɛse dele wɔ ye nu kɛ tumi vi ye nuhua ɛhɔ, yemɔti ɛnee ɔze kɛ awie ɛva ɔsa ɛha ye. Na nwane ɔ? Raalɛ bie mɔɔ anwo ɛdo ye kpole ɛvolɛ 12 la ɔ. Ɔravale ɔ sa ɔhanle Gyisɛse tɛladeɛ ne, na ɔdele kpɔkɛ!

Ɛhye manle Gyeeyaelɛse ahonle dɔle ye azule nu kpalɛ, ɔluakɛ yehola yenwu kɛzi ɔnyɛ se ɔmmaa Gyisɛse kɛ ɔkɛyɛ awie ayile la. Na ɛbɔfoɔ akee rale. Ɔzele Gyeeyaelɛse kɛ: ‘Ɛ ra raalɛ ne ɛwu, yemɔti mmagyegye Gyisɛse bieko.’ Gyisɛse dele edwɛkɛ ɛhye na ɔzele Gyeeyaelɛse kɛ: ‘Mmasulo, na ɔbade kpɔkɛ.’

Mekɛ mɔɔ bɛdwule Gyeeyaelɛse sua nu ɛkɛ ne la ɛnee menli ɛlɛsu aye awolɛ. Na Gyisɛse zele kɛ: ‘Bɛmmasu. Kakula ne ɛtɛwule. Ɔlɛdafe ala.’ Noko bɛzelele Gyisɛse na bɛgolole ɔ nwo, ɔluakɛ bɛze kɛ yewu.

Gyisɛse nee bɛlɛra ne ɔ ze nee ɔ nli yɛɛ ye ɛzoanvolɛma ne anu nsa hɔle sua ne mɔɔ kakula ne la nu la anu. Ɔzɔle ɔ sa na ɔzele kɛ: ‘Dwazo!’ Na ɔdwazole ɔrale ngoane nu, kɛmɔ ɛnwu ye wɔ ɛke la. Na ɔdwazole na ɔdiediale! Ɛhye ati a ɔ nli nee ɔ ze anye ɛlie kpole kpalɛ la.

Tɛ sonla ɛhye a lumua mɔɔ Gyisɛse dwazole ye vile ewule nu a. Nuhua ne mɔɔ lumua mɔɔ Baebolo ne ka nwolɛ edwɛkɛ la a le kunlavolɛ raalɛ ne mɔɔ wɔ Neeyen suakpole ne azo la ara nrenya ne. Nzinlii, Gyisɛse eza dwazole Lazalɛse, mɔɔ ɔle Mɛle nee Maata adiema nrenya ne, vile ewule nu. Mekɛ mɔɔ Gyisɛse kɛli tumi kɛ Nyamenle belemgbunli la, ɔbadwazo menli dɔɔnwo mɔɔ ɛwu la yeara ngoane nu bieko. Asoo yɛ nye ɛnrɛlie nwolɛ ɔ?