Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 91

Gyisɛse Kilehile Wɔ Boka Bie Azo

Gyisɛse Kilehile Wɔ Boka Bie Azo

NEA kɛ Gyisɛse de ɛke a. Ɔlɛkilehile menli ɛhye mɔ kɔsɔɔti wɔ boka bie azo wɔ Galeli. Menli mɔɔ de bikye ye kpalɛ la a le ye ɛdoavolɛma ne. Yekpa bɛ nuhua 12 kɛ bɛyɛ ye ɛzoanvolɛma. Ɛzoanvolɛma ne le Gyisɛse ɛdoavolɛma titile. Ɛze bɛ aluma ɔ?

Yɛlɛ Saemɔn Pita nee ɔ diema Andelu wɔ ɛkɛ. Akee yɛlɛ Gyemise nee Dwɔn, noko mɔɔ bɛle mediema a. Bɛfɛlɛ ɛzoanvolɛ ko noko Gyemise yɛɛ bɛfɛlɛ bieko Saemɔn. Bɛfɛlɛ ɛzoanvolɛma nwiɔ Dwudase. Ko a le Dwudase Yesekaleɔto yɛɛ bɛfɛlɛ Dwudase ko ne mɔɔ ɛha la noko Tadease. Akee yɛlɛ Felepe nee Natanayɛle (mɔɔ eza bɛfɛlɛ ye Baatɔlomiyu), yɛɛ Mateyu nee Tɔmase.

Mɔɔ Gyisɛse vi Samɛlea rale la anzi, ɔbɔle ɔ bo kɛ ɔka edwɛkɛ ne wɔ mekɛ mɔɔ lumua la anu kɛ: ‘Anwuma belemgbunlililɛ ne ɛbikye.’ Ɛze mɔɔ zɔhane belemgbunlililɛ ne de la ɔ? Ɔle Nyamenle arane. Gyisɛse a le zolɛ belemgbunli a. Ɔbali tumi yeavi anwuma na yeava anzondwolɛ yeara azɛlɛ ye azo. Nyamenle belemgbunlililɛ ne bayɛ azɛlɛ ye amuala paladaese kɛnlɛma.

Gyisɛse ɛlɛkilehile menli ne belemgbunlililɛ ne anwo debie wɔ ɛke. Ɔlɛkilehile nuhua kɛ: ‘Bɛyɛ nzɛlɛlɛ a bɛyɛ ye zɛhae. Yɛ Ze mɔɔ wɔ anwuma, wɔ duma nwo ɛde. Wɔ belemgbunlililɛ ɛrɛla. Bɛyɛ wɔ ɛhulolɛdeɛ wɔ azɛlɛ ye azo, kɛmɔ bɛyɛ ye wɔ anwuma lɔ la.’ Menli dɔɔnwo fɛlɛ ɛhye ‘Awulae Nzɛlɛlɛ Ne.’ Bie mɔ fɛlɛ ye ‘Yɛ Ze Mɔɔ wɔ Anwuma’ ne. Ɛbahola wɔaha nzɛlɛlɛ ne amuala ɔ?

Gyisɛse eza ɛlɛkilehile menli ne kɛzi ɔwɔ kɛ bɛ nee bɛ nwo di la. Ɔse: ‘Mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ.’ Asoo saa menli nee wɔ di ye wɔ atiakunlukɛnlɛma nu a ɛngulo ɔ? Yemɔti, Gyisɛse ɛlɛka ahile yɛ kɛ, ɔwɔ kɛ yɛ nee awie mɔ di ye wɔ atiakunlukɛnlɛma nu. Asoo wɔ paladaese azɛlɛ ne azo mekɛ mɔɔ awie biala ɛlɛyɛ ɛhye la ɔnrɛyɛ kɛnlɛma ɔ?