NEA abubule ne mɔɔ ɛlɛdwu aradɛnla nrenya ne ati zo la. Nrenya ne a le Gyisɛse. Yeli ɛvolɛ kɛyɛ 30 kɛkala. Na nrenya ne mɔɔ boka ɔ nwo la a le Dwɔn. Yɛlumua yɛzukoa ɔ nwo debie. Asoo ɛkakye mekɛ mɔɔ Mɛle hɔkpɔlale ye busuanli Ɛlezabɛte, na adɔma ne mɔɔ la Ɛlezabɛte akunlu la vale anyelielɛ wulule la ɔ? Zɔhane adɔma ne mɔɔ ɛnee bɛtɛwole ye la a le Dwɔn. Na duzu a Dwɔn nee Gyisɛse ɛlɛyɛ ye kɛkala a?

Kɛkala ala a Dwɔn ɛva Gyisɛse ɛwula Azule Dwɔdan ne anu a. Kɛ bɛsɔne sonla la ɛne. Mɔɔ lumua la, bɛfa ye bɛwula nzule bo, na bɛamaa ye zo bieko. Ɔluakɛ ɛhye a le debie mɔɔ Dwɔn yɛ maa menli la ati, bɛfɛlɛ ye Dwɔn Sɔnevolɛ ne. Na duzu ati a Dwɔn ɛzɔne Gyisɛse a?

Dwɔn yɛle ye zɔ ɔluakɛ Gyisɛse rale na ɔzele Dwɔn kɛ ɔzɔne ye la ati ɔ. Dwɔn sɔne menli mɔɔ kpondɛ kɛ bɛnu bɛ nwo wɔ ninyɛne ɛtane mɔɔ bɛyɛle la anwo la. Noko asoo Gyisɛse yɛle debie ɛtane ɛlɛ mɔɔ ɔwɔ kɛ ɔnu ɔ nwo wɔ nwolɛ ɔ? Kyɛkyɛ, Gyisɛse anyɛ zɔ ɛlɛ, ɔluakɛ ɔle Nyamenle mumua ne Ara mɔɔ vi anwuma a. Yemɔti ɔhanle ɔhilele Dwɔn kɛ ɔzɔne ye wɔ debie gyɛne bie anwo. Maa yɛnlea mɔɔ ɛnee zɔhane deɛ ne de la.

Kolaa na Gyisɛse ara Dwɔn anwo wɔ ɛke la ɛnee ɔle kapentanli. Kapentanli a le sonla mɔɔ ɔfa mbaka ɔyɛ ninyɛne mɔɔ le kɛ ɛkponle nee mbia la. Ɛnee Mɛle ɔ hu Dwosefi le kapentanli, na ɔhilehilele Gyisɛse noko ɔmanle ɔrayɛle bie. Noko Gyihova anzoa ɔ Ra ne amba azɛlɛ ye azo kɛ ɔrayɛ kapentanli. Ɛnee ɔlɛ gyima titile ɔmaa ye kɛ ɔyɛ, na ɛnee mekɛ ɛdwu kɛ Gyisɛse bɔ ɔ bo yɛ. Yemɔti amaa yeahile kɛ akee yera kɛ ɔbayɛ ɔ Ze ɛhulolɛdeɛ la, Gyisɛse zele Dwɔn kɛ ɔzɔne ye. Asoo ɛhye sɔ Nyamenle anye ɔ?

Ɛhɛe, ɔsɔ ɔ nye, ɔluakɛ, mɔɔ Gyisɛse vi azule ne anu vole file zo la, ɛnelɛ bie vi anwuma zele kɛ: ‘Ɛhye a le me Ra, mɔɔ me nye die ɔ nwo la.’ Eza ɔbayɛ kɛ anwuma bukele na abubule ɛhye dwule rale Gyisɛse anwo zo. Noko tɛ abubule kpalɛ ɔ. Ɔzɔho bie ala. Nyamenle sunsum nwuanzanwuanza ne ɔ.

Kɛkala Gyisɛse lɛ ninyɛne dɔɔnwo mɔɔ ɔwɔ kɛ ɔdwenle nwolɛ a, yemɔti ɔhɔdɛnlanle ɛleka bie mɔɔ ɔle koonwu la kenle 40. Seetan hɔle ɔ nwo ɛkɛ ne. Seetan bɔle mɔdenle fane nsa kɛ ɔmaa Gyisɛse ayɛ debie mɔɔ ɔtia Nyamenle mɛla la. Noko Gyisɛse anyɛ.

Yemɔ anzi, Gyisɛse ziale hɔle na ɔ nee menli bie mɔɔ lumua rayɛle ye menli mɔɔ li ɔ nzi, anzɛɛ ye ɛdoavolɛma la yiale. Bɛ aluma ne bie mɔ a le Andelu, Pita (mɔɔ eza bɛfɛlɛ ye Saemɔn), Felepe yɛɛ Natanayɛle (mɔɔ eza bɛfɛlɛ ye Baatɔlomiyu). Gyisɛse nee ɛdoavolɛma fofolɛ ɛhye mɔ hɔle Galeli maanzinli ne anu. Bɛdwule Galeli la bɛhɔle Natanayɛle sua zo mɔɔ yemɔ a le Kana la. Wɔ ɛkɛ ne Gyisɛse hɔle atɔfolɛlielɛ kpole bie abo, na ɔyɛle ye nwanwane gyima mɔɔ lumua la. Ɛze deɛ holɛ ko ɔ? Ɔmanle nzule hakyile nwanye.