ASOO ɛze adɔma ekyi ɛhye sonla holɛ? Ɛhɛe, Gyisɛse ɔ. Bɛwole ye mboane tunli ne anu la ɛtɛkyɛle. Mɛle ɛlɛfa Gyisɛse ado mboane adidi ɛlɛka ne anu, ɛleka mɔɔ nane ne mɔ di aleɛ la. Na duzu ati a Mɛle nee Dwosefi nee nane ne mɔ a wɔ ɛke a? Tɛ ɛke a ɔwɔ kɛ bɛwo adɔma a, anzɛɛ ɔle zɔ?

Kyɛkyɛ ɔnle zɔ. Noko edwɛkɛ ɛhye ati a bɛwɔ ɛke a: Wulomu maanle maanle kpanyinli ne, mɔɔ bɛfɛlɛ ye Siza Ɔgɛsetɛse la lile mɛla kɛ awie biala ɛzia ɛhɔ sua mɔɔ bɛwole ye zo la azo ɔmaa bɛdia ye. Bɛtelɛhɛm ɛke a bɛwole Dwosefi a. Noko mekɛ mɔɔ ɔ nee Mɛle bɛdwule ɛkɛ ne la, bɛannyia sua wɔ ɛleka biala. Ɛhye ati ɛnee ɔwɔ kɛ bɛbaboka nane ne mɔ anwo wɔ ɛke. Na kenle zɔhane anu ala a Mɛle wole Gyisɛse a! Noko, kɛmɔ ɛkola ɛnwu ye la, ɔte kpɔkɛ.

Wɔnwu mboaneneavolɛma ne mɔ mɔɔ ɛlɛba aranlea Gyisɛse la ɔ? Ɛnee bɛwɔ fiene ne azo bɛlɛnea bɛ mboane nɔe ne, na wienyi kɛnlɛma bie dale bɛ nwo zo. Ɛnee anwumabɔvolɛ ɔ! Ɛzulolɛ kpole hanle mboaneneavolɛma ne mɔ. Noko anwumabɔvolɛ ne hanle kɛ: ‘Bɛmmasulo! Melɛ amaneɛ kpalɛ melɛbɛlɛ bɛ. Ɛnɛ kenle ye, bɛwo Kelaese ne mɔɔ le Awulae la wɔ Bɛtelɛhem. Ɔbalie menli ne ngoane! Bɛbanwu kɛ bɛva avuazinli bɛkyekye ɔ nwo na bɛva ye bɛdo mboane adidi ɛlɛka nu.’ Arɛlevilɛ nu ala anwumbɔvolɛma dɔɔnwo rale na bɛbɔle ɔ bo kɛ bɛye Nyamenle ayɛlɛ. Ndɛndɛ ne ala mboaneneavolɛma ne hɔle kɛ bɛkakpondɛ Gyisɛse, na akee bɛnwu ye.

Asoo ɛze deɛ mɔɔ ɔti Gyisɛse le ngakyile la? Asoo ɛze ye sonla holɛ? Kakye kɛ, wɔ buluku ɛhye ɛzukoalɛdeɛ ne mɔɔ lumua la anu yɛhanle Nyamenle Ara ne mɔɔ lumua la anwo edwɛkɛ. Ralɛ ɛhye nee Gyihova yɛle gyima wɔ mekɛ mɔɔ ɔbɔ anwuma nee aze yɛɛ debie biala la. Sonla ɛhye a le Gyisɛse!

Ɛhɛe, Gyihova yele ɔ Ra ne ngoane vile anwuma na ɔvale ɔwulale Mɛle akunlu. Ɛkɛ ne ala kakula ne bɔle ɔ bo kɛ ɔnyi wɔ ɔ kunlu kɛmɔ ngakula mɔɔ ɛha la nyi wɔ bɛ nli mɔ akunlu la. Noko ɛnee kakula ɛhye le Nyamenle Ara. Awieleɛ kolaa bɛwole Gyisɛse wɔ mboane tunli nu wɔ Bɛtelɛhɛm ɛke. Asoo akee ɛnwu deɛ mɔɔ ɔti ɛnee anwumabɔvolɛma ne anye ɛlie somaa kɛ bɛka bɛahile menli kɛ bɛwo Gyisɛse la?