MIDIAMA nee Pɛhyeama honle vale Babelɔn la ye ɛvolɛ kɛyɛ nwiɔ ɛ. Na nea mɔɔ ɛlɛkɔ zo kɛkala la! Ɛhɛe, Yizilayɛma ne ɛlɛfi Babelɔn. Kɛ bɛzile bɛnyianle bɛ ti ɛ? Nwane a manle bɛ adenle kɛ bɛhɔ a?

Saelɛse, Pɛhyea belemgbunli ne, a manle bɛ adenle a. Mekɛ tendenle kolaa na bɛawo Saelɛse la, Gyihova manle ye ngapezonli Ayezaya hɛlɛle ɔ nwo edwɛkɛ dole ɛkɛ ne kɛ: ‘Ɛbayɛ mɔɔ mekpondɛ kɛ ɛyɛ la pɛpɛɛpɛ. Bɛbabukebuke nlenkɛ mgbole ne mɔ bɛagua nwolɛ amaa wɔaho wɔava sua kpole ne.’ Na Saelɛse lile bɛ nyunlu manle bɛhonle bɛvale Babelɔn. Midiama nee Pɛhyeama ne vale nlenkɛ mɔɔ bɛbukebuke bɛgua nwo la anu nɔɔzo a hɔle sua kpole ne azo a.

Noko Gyihova ngapezonli Ayezaya eza hanle kɛ Saelɛse bazi ɔ gyakɛ aze yeamaa bakyekye Gyɛlusalɛm nee ye ɛzonlenlɛ sua ne bieko. Asoo Saelɛse yɛle ɛhye? Ɛhɛe, ɔyɛle zɔ. Mɔɔ Saelɛse zele Yizilayɛma ne la ɛne: ‘Bɛhɔ Gyɛlusalɛm na bɛhɔzi Gyihova, bɛ Nyamenle ne, ɛzonlenlɛ sua ne.’ Na ɛhye a Yizilayɛma agyakɛ wɔ zo ɛlɛkɔ ahɔyɛ a.

Noko tɛ Yizilayɛma mɔɔ wɔ Babelɔn la amuala a bahola adu adenle tendenle ne azia ahɔ Gyɛlusalɛm a. Ɔle adenle tendenle kpalɛ mɔɔ bayɛ mayɛlɛ 500 (kilomita 800) na ɛnee bɛ nuhua dɔɔnwo ɛnyinyi somaa na bɛnlɛ anwosesebɛ mɔɔ bɛfa bɛtu adenle tendenle a. Na ɛnee bie mɔ noko lɛ adwenle gyɛne mɔɔ ɔti bɛnrɛhɔ a. Na Saelɛse hanle hilele bɛdabɛ mɔɔ bɛnrɛhɔ la kɛ: ‘Bɛmaa menli mɔɔ sia ahɔ Gyɛlusalɛm ahɔkyekye ɛzonlenlɛ sua ne la dwɛtɛ fufule nee ezukoa nvutuke yɛɛ ahyɛlɛ ninyɛne.’

Yemɔti, bɛmanle Yizilayɛma ɛhye mɔ mɔɔ ɛlɛkɔ Gyɛlusalɛm la ahyɛlɛ ninyɛne dɔɔnwo. Saelɛse eza yele ahyɛnze nee ahɔpo ne mɔ mɔɔ ɛnee wɔ Gyihova ɛzonlenlɛ sua ne anu mɔɔ Belemgbunli Nɛbukadenɛza yeyele hɔle wɔ mekɛ mɔɔ ɔzɛkyele Gyɛlusalɛm la amuala ɔmanle bɛ. Ɛnee menli ne lɛ ninyɛne dɔɔnwo mɔɔ bɛsoa bɛahɔ a.

Mɔɔ ɛnee bɛdu adenle toonwo kɛyɛ siane nna la, Yizilayɛma ne radwule Gyɛlusalɛm wɔ mekɛ nloa. Bɛzɛkyele sua kpole ne la ɛnee ye ɛvolɛ 70 pɛpɛɛpɛ ɛ, na azɛlɛ ne lale mgbane mɔɔ ɛnee awie biala ɛnde zo a. Ɔwɔ nuhua kɛ Yizilayɛma ne ɛzia ɛra bɛ maanle nu ɛdeɛ, noko, ɛnee bɛbayia mekɛ ɛsesebɛ, kɛmɔ yɛbazukoa wɔ mɔɔ doa ye la anu la.

Ayezaya 44:28; 45:1-4; Ɛzela 1:1-11.