Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 81

Nyamenle Moalɛ Nu Anwodozo

Nyamenle Moalɛ Nu Anwodozo

MENLI apenle dɔɔnwo dule adenle tendenle ne vile Babelɔn hɔle Gyɛlusalɛm. Noko bɛhɔdwule la, ɛnee Gyɛlusalɛm ɛbɔ bɔkɔɔ. Ɛnee awie biala ɛnde ɛkɛ. Na ɛnee ɔwɔ kɛ Yizilayɛma ne yɛ debie biala fofolɛ.

Ninyɛne mɔɔ bɛlumua bɛyɛle la anu ko a le afɔle mokyea ne. Ɛhye le ɛleka mɔɔ bɛbahola bɛava nane anzɛɛ ninyɛne gyɛne bɛabɔ afɔle bɛamaa Gyihova a. Mekɛ ekyi anzi, Yizilayɛma ne bɔle ɛzonlenlɛ sua ne ɛzilɛ bo. Noko ɛnee agbɔvolɛ mɔɔ dede azɛlɛ mɔɔ bikye bɛ la azo la ɛmkpondɛ kɛ Yizilayɛma ne si ɛzonlenlɛ sua ne. Ɔti bɛbɔle mɔdenle kɛ bɛnwulonwunla bɛ bɛamaa bɛagyakyi. Awieleɛ kolaa ne, agbɔvolɛ ɛhye mɔ manle Pɛhyea belemgbunli fofolɛ ne lile mɛla duale sua ne ɛzilɛ.

Mekɛ hɔle bie. Na ɛnee akee Yizilayɛma ne vile Babelɔn ziale rale la yenyia ɛvolɛ 17. Gyihova zoanle ye ngapezoma Hagae yɛɛ Zɛkalaya kɛ bɛraze menli ne kɛ bɛbɔ sua ne ɛzilɛ bo bieko. Menli ne vale bɛ nwo dole Nyamenle moalɛ zo, na bɛdiele ngapezoma ne. Bɛbɔle ɔ bo kɛ bɛsi sua ne, ɔnvane nwolɛ kɛ ɛnee mɛla kile kɛ bɛmmasi la.

Yemɔti Pɛhyea amɛnlado Tatenae rale rabizale Yizilayɛma ne adenle mɔɔ bɛlɛ kɛ bɛsi ɛzonlenlɛ sua ne la. Yizilayɛma ne zele ye kɛ mɔɔ bɛwɔ Babelɔn la Belemgbunli Saelɛse zele bɛ kɛ: ‘Bɛhɔ Gyɛlusalɛm na bɛhɔzi Gyihova, bɛ Nyamenle ne, ɛzonlenlɛ sua ne.’

Tatenae manle bɛvale kɛlata bɛhɔle Babelɔn bɛhɔbizale saa Saelɛse, mɔɔ ɛnee ɛwu la, amgba hanle zɔ a. Yeangyɛ biala yɛɛ kɛlata vi Pɛhyea belemgbunli fofolɛ ne ɛkɛ ne rale a. Ɔhanle kɛ amgba Saelɛse hanle zɔ. Yemɔti belemgbunli ne hɛlɛle kɛ: ‘Bɛmaa Yizilayɛma ne adenle bɛmaa bɛzi bɛ Nyamenle ne ɛzonlenlɛ sua ne. Na mese wɔ kɛ ɛboa bɛ.’ Wɔ ɛvolɛ kɛyɛ nna anu bɛwiele ɛzonlenlɛ sua ne si, na Yizilayɛma ne anye liele kpole.

Ɛvolɛ dɔɔnwo pɛle nu. Bɛwiele ɛzonlenlɛ sua ne si la ye ɛvolɛ asɛɛ 48 ɛne. Na ɛnee menli mɔɔ wɔ Gyɛlusalɛm la le ehyiavolɛma, na ɛnee suakpole ne azo yɛɛ Nyamenle ɛzonlenlɛ sua ne ɛnle kɛnlɛma fee zɛ. Wɔ Babelɔn ɛkɛ ne, Yizilayɛnli Ɛzela ranwunle ɛhyianlɛ mɔɔ ɔhyia kɛ bɛsiezie Nyamenle ɛzonlenlɛ sua ne la. Ɔti ɛze mɔɔ ɔyɛle a?

Ɛzela hɔnwunle Pɛhyea belemgbunli, Atazɛzɛse, na belemgbunli atikunlukɛnlɛma ɛhye manle Ɛzela ahyɛlɛ ninyɛne dɔɔnwo manle ɔvale ɔziale ɔhɔle Gyɛlusalɛm. Ɛzela zɛlɛle Yizilayɛma mɔɔ wɔ Babelɔn la kɛ bɛboa ye bɛmaa ɔva ahyɛlɛ ninyɛne ne mɔ ɔhɔ Gyɛlusalɛm. Menli kɛyɛ 6,000 a liele dole nuhua kɛ bɛkɛhɔ a. Ɛnee bɛlɛ dwɛtɛ fufule nee nvutuke yɛɛ ninyɛne gyɛne mɔɔ sonle bolɛ la dɔɔnwo bɛsoa bɛkɔ.

Ɛzela arɛle bɔle, ɔluakɛ ɛnee nindavoma dɔɔnwo wɔ adenle nu. Ɛnee menli ɛhye mɔ bahola aza bɛ alie bɛ dwɛtɛ fufule ne nee bɛ nvutuke ne mɔ, na bɛahu bɛ. Yemɔti Ɛzela vɛlɛle menli ne na ɔyiale bɛ, kɛmɔ yɛnwu ye wɔ nvoninli ye anu la. Akee bɛzɛlɛle Gyihova kɛ ɔbɔ bɛ nwo bane wɔ bɛ adenle tendendenlenle ne mɔɔ bɛtu bɛazia bɛahɔ Gyɛlusalɛm la anu.

Gyihova bɔle bɛ nwo bane. Na bɛvale bɛ nwo kɔlɔɔnwo bɛhɔdwule Gyɛlusalɛm, wɔ mekɛ mɔɔ ɛnee bɛdu adenle toonwo siane nna la. Asoo ɛhye ɛngile kɛ Gyihova kola bɔ bɛdabɛ mɔɔ bɛfa bɛ nwo bɛto ɔ nwo zo bɛkpondɛ moalɛ la anwo bane ɔ?

Ɛzela tile 2 kɔdwu 8.