Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 76

Bɛzɛkyele Gyɛlusalɛm

Bɛzɛkyele Gyɛlusalɛm

NƐBUKADENƐZA vale Yizilayɛma mɔɔ ze nwoma kpalɛ la amuala hɔle Babelɔn la ɛvolɛ 10 ɛpɛ nu. Kɛkala nea mɔɔ ɛlɛsi a! Bɛlɛyela Gyɛlusalɛm. Na bɛlɛfa Yizilayɛma mɔɔ bɛangu bɛ la bɛahɔ Babelɔn kɛ pilizama.

Kakye kɛ, ɛhye a Gyihova ngapezoma ne bɔle nwolɛ kɔkɔ kɛ saa menli ne angyakyi bɛ nyɛleɛ ɛtane ne a ɔbazi a. Noko Yizilayɛma ne andie ngapezoma ne. Kɛ anrɛɛ bɛkɛzonle Gyihova la bɛhɔle zolɛ bɛzonlenle awozonle. Ɔti menli ne fɛta ndeanlɛ. Yɛze ɛhye ɔluakɛ Nyamenle ngapezonli Yizikeɛle ka ninyɛndane mɔɔ ɛnee Yizilayɛma ne ɛlɛyɛ la anwo edwɛkɛ kile yɛ.

Asoo ɛze Yizikeɛle ɔ? Ɔboka mgbavolɛ mɔɔ belemgbunli Nɛbukadenɛza vale bɛ hɔle Babelɔn ɛvolɛ 10 nee ɔ nzi kolaa na Gyɛlusalɛm ɛzɛkyelɛ ne adwu zo la anwo. Mekɛ zɔhane ala anu a bɛvale Daneɛle nee ɔ gɔnwo mɔ nsa ne, Hyeedelake, Mehyake nee Abɛdenɛgo noko bɛhɔle Babelɔn a.

Mekɛ mɔɔ Yizikeɛle tɛbɔ Babelɔn la, Gyihova yele ninyɛndane mɔɔ ɛnee ɛlɛkɔ zo wɔ Gyɛlusalɛm ɛzonlenlɛ sua ne anu la hilele ye. Gyihova luale nwanwane adenle zo a yɛle ɛhye a. Ɛnee Yizikeɛle tɛbɔ Babelɔn amgba, noko Gyihova manle ɔnwunle debie biala mɔɔ ɛlɛkɔ zo wɔ ɛzonlenlɛ sua ne anu la. Na mɔɔ Yizikeɛle nwunle ye la ɛnee yɛ azibɛnwo!

Gyihova zele Yizikeɛle kɛ: ‘Nea ninyɛndane mɔɔ menli ne ɛlɛyɛ ye wɔ ɛzonlenlɛ sua ye anu la. Nea kɛ bɛdolɔdolɔ nwɔlɛ nee nane ngakyile bɛgua bane ne anwo ɛ. Na nea kɛ Yizilayɛma ɛlɛsonle bɛ ɛ!’ Ɛnee Yizikeɛle kola nwu ninyɛne ɛhye mɔ amuala, na ɔhɛlɛle mɔɔ ɛlɛkɔ zo la ɔdole ɛkɛ.

Gyihova bizale Yizikeɛle kɛ: ‘Ɛze mɔɔ Yizilayɛ mgbanyima ɛlɛyɛ ye wɔ fealera nu la ɔ?’ Ɛhɛe, ɔnwunle ɛhye noko. Bɛle menli 70, na ɛnee bɛ muala bɛlɛsonle adalɛ nyamenle. Ɛnee bɛlɛka kɛ: ‘Gyihova ɛnwu yɛ. Ɔ rɛle ɛvi maanle ne.’

Akee Gyihova hilele Yizikeɛle mraalɛ bie mɔɔ bɛwɔ sɔlɔ ɛzonlenlɛ sua ne anlenkɛ ne anyunlu la. Ɛnee bɛdede ɛkɛ ne bɛlɛsonle bozonle Tamɛze. Na nea mrenya ne mɔ mɔɔ wɔ Gyihova ɛzonlenlɛ sua ne anlenkɛ ne anyunlu la! Bɛdodo kɛyɛ 25. Yizikeɛle nwunle bɛ. Ɛnee bɛlɛbɔ bɛ ti aze aduduleɛ bɛazonle sɛnzɛne ne!

Gyihova zele kɛ: ‘Menli ɛhye ɛmbu me fee. Tɛ kɛ asɛɛ ninyɛndane ngome a bɛyɛ a, na bɔbɔ bɛba me ɛzonlenlɛ sua ne anu na bɛyɛ ye wɔ ɛkɛ ne!’ Ɔti Gyihova bɔle ɛwɔkɛ kɛ: ‘Bɛbade me ɛya ne nganeɛ. Na saa bɛsɛkye bɛ a menrɛze bɛ anwuvɔne.’

Gyihova yele ninyɛne ɛhye hilele Yizikeɛle la ye ɛvolɛ kɛyɛ nsa anzi yɛɛ Yizilayɛma dele atua tiale Belemgbunli Nɛbukadenɛza a. Ɔti ɔ nee bɛ hɔhonle. Wɔ ɛvolɛ ko ne foa anzi Babelɔnma bule Gyɛlusalɛm bane ne guale na bɛvale senle bɛyelale suakpole ne dwɛɛ. Bɛhunle menli ne dɔɔnwo anzɛɛ bɛvale bɛ kɛ pilizama bɛhɔle Babelɔn.

Duzu ati a Gyihova manle ɛzɛkyelɛ kpole ɛhye rale Yizilayɛma anwo zo ɛ? Ɛhɛe, ɔluakɛ bɛandie Gyihova yɛɛ bɛanli ye mɛla zo la ati ɔ. Ɛhye kile kɛzi nwolɛ hyia kɛ dahuu yɛyɛ mɔɔ Nyamenle ka kile yɛ la.

Alumua ne menli ekyi bie yɛɛ bɛgyakyile bɛ wɔ Yizilayɛ azɛlɛ ne zo a. Belemgbunli Nɛbukadenɛza vale Dwuunli bie mɔɔ bɛfɛlɛ ye Gɛdalaya la kɛ ɔnlea menli ɛhye anwo zo. Noko Yizilayɛma bie mɔ hunle Gɛdalaya. Ɛnee akee menli ne sulo kɛ Babelɔnma bazɛkye bɛ muala ɔluakɛ bɛyɛ ɛtane ɛhye la ati. Ɔti Bɛvale Gyɛlɛmaya bɛbokale bɛ nwo na bɛnriandile bɛhɔle Yigyibiti.

Ɛhye manle Yizilayɛ azɛlɛ ne dɔle mgbane mɔɔ ɛnee awie biala ɛnde zolɛ a. Awie andɛnla azɛlɛ ne azo ɛvolɛ 70. Ɔdɔle mgbane bɔkɔɔ. Noko Gyihova bɔle ɛwɔkɛ kɛ ɛvolɛ 70 anzi ɔbava ye menli ne yeazia yeara azɛlɛ ne azo. Kɔkpula zɔhane mekɛ ne, duzu yɛɛ ɛlɛsi Nyamenle menli mɔɔ wɔ Babelɔn, ɛleka mɔɔ bɛva bɛ bɛhɔ la anwo zo a? Maa yɛnlea.

2 Arelemgbunli 25:1-26; Gyɛlɛmaya 29:10; Yizikeɛle 1:1-3; 8:1-18.