Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 63

Belemgbunli Sɔlɔmɔn Nrɛlɛbɛvolɛ

Belemgbunli Sɔlɔmɔn Nrɛlɛbɛvolɛ

SƆLƆMƆN rayɛle belemgbunli la ɛnee ɔtɛdwule ɛvolɛ abulanwiɔ. Ɔhulole Gyihova, na ɔlile folɛdulɛ mɔɔ ɔ ze Devidi vale manle ye la azo. Gyihova anye liele Sɔlɔmɔn anwo, yemɔti kenle ko nɔɔzo ɔhanle ɔhilele ye wɔ ɛlalɛ nu kɛ: ‘Sɔlɔmɔn, duzu a ɛkpondɛ kɛ meyɛ memaa wɔ a?’

Sɔlɔmɔn buale kɛ: ‘Gyihova me Nyamenle, mele kakula somaa kɛ mekɛli belemgbunli. Yemɔti maa me nrɛlɛbɛ maa menva menzie wɔ menli ne wɔ adenle kpalɛ zo.’

Gyihova anye liele mɔɔ Sɔlɔmɔn bizale la anwo. Yemɔti ɔzele ye kɛ: ‘Ɔluakɛ wɔbiza nrɛlɛbɛ na wɔambiza ngoane tendenle anzɛɛ anwonyia la ati, mebamaa wɔ nrɛlɛbɛ kpole mɔɔ tɛla awie biala mɔɔ ɛdɛnla azɛlɛ ye azo ɛlɛ la. Akee debie mɔɔ wɔambiza bɔbɔ la mebava meamaa wɔ, ɛbanyia ɛ nwo, wɔanyia ɛ nyunlu.’

Mekɛ ekyi guale nu la mraalɛ nwiɔ bie vale edwɛkɛ ɛsesebɛ bie radole Sɔlɔmɔn anyunlu. Ko hanle kɛ: ‘Me nee raalɛ ɛhye de aako ko anu. Menwole ralɛ nrenya na ye kenle nwiɔ anzi ɔdaye noko ɔwole kakula nrenya. Kenle ko nɔɔzo ɔ ra ne wule. Na mekɛ mɔɔ ɛnee me wɔ nafelɛ nu la ɔradwule me ra ne na ɔvale ye ɛdeɛ ne mɔɔ ɛwu la ɔdole me nwo ɛkɛ ne. Mɔɔ mendunwuele na menwunle kakula ne la, menwunle kɛ tɛ me ra ne ɔ?’

Raalɛ ko ne buale kɛ: ‘Ɔle adalɛ! Me ra ɛdeɛ ne a anye wɔ zolɛ la, ye ɛdeɛ ne a ɛwu la!’ Alumua raalɛ ne ɔdaye ɔse: ‘Kyɛkyɛ! Wɔ ɛdeɛ ne a ɛwu la, me ra ɛdeɛ ne a anye wɔ zolɛ la!’ Kɛ mraalɛ ne mɔ kpolerazulɛ ne hɔle ye la ɛne. Duzu a Sɔlɔmɔn bayɛ a?

Ɔzoanle ɔmanle bɛhɔvale dadeɛ bɛrale, na ɔhanle kɛ: ‘Bɛhyɛ kakula ne mɔɔ anye wɔ zolɛ la anu nwiɔ, na bɛmaa mraalɛ ne mɔ biala ɛva foa ko.’

Kakula ne ɔ nli mumua ne deanle nu kɛ: ‘Kyɛkyɛ! Mesɛlɛ wɔ mmaku kakula ne. Fa maa ye!’ Na raalɛ ɛhendeɛ ne dele ye ɔ nloa na ɔhanle kɛ: ‘Mmafa ɛmaa yɛ nuhua biala; maa bɛhyɛ nu.’

Awieleɛ kolaa ne Sɔlɔmɔn zele kɛ: ‘Mmaku kakula ne! Fa ye maa raalɛ ne mɔɔ lumua rale la. Ɔdaye a ɔwole kakula ne a.’ Sɔlɔmɔn nwunle ɛhye ɔluakɛ ɔ nli mumua ne kulo adɔma ne kpalɛ ɔti ɔhulole kɛ bɛkɛva ye bɛkɛmaa raalɛ ɛhendeɛ ne amaa bɛangu ye. Menli ne dele ndɛne ne mɔɔ Sɔlɔmɔn buale la, bɛ nye liele kpole kɛ bɛnyia belemgbunli mɔɔ ze nrɛlɛbɛ zɛhae a.

Mekɛ mɔɔ Sɔlɔmɔn lile ebia ne la, Nyamenle yilale menli ne na ɔmanle bɛ azɛlɛ ne hyenle aleɛ mɔɔ le kɛ vanye, feege, hwiiti nee ma ngakyile dɔɔnwo. Menli ne hedale ndanlɛ mgbalɛ na bɛdɛnlanle azua ngɛnlɛma nu. Awie biala nyianle debie biala mɔɔ ɔkpondɛ la.

1 Arelemgbunli 3:3-28; 4:29-34.